TATE nameme oya tsakanenene mo 1919 poshigongi shoshitopolwa shAakonakonimbiimbeli yoPaigwana muCedar Point, Ohio, muAmerika. Oya hokana konima yethimbo lyontumba momumvo ogo tuu ngoka. Onda valwa mo 1922, nokonima yoomvula mbali omumwamememati Paulus okwa valwa. Grace, nekulu lyandje, okwa valwa mo 1930. Aavali ye, Roy naRuth Howell, oya li ya putudhwa ye li Aakonakonimbiimbeli, nooyinakulu ye oya li wo Aakonakonimbiimbeli noya li ookuume komumwatate Charles Taze Russell.

Onda li nda tsakanene naGrace mo 1947, notwa li twa hokana mo 16 Juli 1949. Manga inaatu hokana, otwa li twa kundathana shu ukilila kombinga yonakuyiwa yetu. Otwa li twa tokola okuya miilonga yethimbo lyu udha nokukala inaatu ipa iinakugwanithwa yokutekula aanona. Mu 1 Kotoba 1950, otwa tameke iilonga yetu yuukokolindjila pamwe. Opo nduno mo 1952, otwa li twa hiywa tu ye miilonga yuutonatelishikandjo.

Atuhe otwa li tu wete kutya otwa pumbwa ekwatho olindji tu vule okugwanitha po oshilonga shika oshipe. Manga nda li tandi ilongo kaamwatate mboka ya pyokoka, onda li wo nda kongo ekwatho opo Grace naye a kwathelwe. Onda yi kuMarvin Holien, kuume omukulukulu gwoyaandjetu ngoka e na ontseyo mokulonga e li omutonateli omweendi, nonda li nde mu pula nda ti: “Grace omugundjuka noke na ontseyo ya gwana. Mbela ito vulu oku mu pa gumwe a kale ta longo naye uule wethimbo lyontumba opo a mone edheulo lyontumba?” Okwa yamukula kutya, ‘ota vulu.’ Okwa popi ishewe a ti: “Edna Winkle omukokolindjila a pyokoka ngoka ta vulu oku mu kwathela noonkondo.” Konima, Grace okwa popi kombinga yaEdna, a ti: “Okwa li a ningitha ndje ndi kale kaandi na uumbanda uuna ndi li pegumbo lyomuntu, okwa li e shi okuungaunga nawa naamboka taya pataneke, nokwa li a longo ndje okukala handi pulakene komunegumbo sho ta popi opo ndi vule okugandja eyamukulo tali opalele. Okwa li owala shoka nda li nda pumbwa!”

Ngame naGrace otwa li twa longo miikandjo iyali moshitunda shaIowa, mwa kwatelwa oshitopolwa shaMinnesota nosho wo shaSouth Dakota. Opo nduno otwa li twa tuminwa kOshikandjo shonomola yo-1 ko-New York, shoka sha li sha kwatela mo uundoolopa womoBrooklyn nowomoQueens. Katu na esiku tu dhimbwe nkene twa li tu uvite kutya katu na ontseyo  miilonga mbyoka. Oshikandjo osha li sha kwatela mo egongalo lyaBrooklyn Heights, ndyoka lya li hali gongala mOshinyanga shUukwaniilwa shomObetel nolya li li na iilyo oyindji yuukwanegumbo waBetel ya pyokoka. Konima sho nda gandja oshipopiwa shandje shotango shiilonga kegongalo ndyoka, omumwatate Nathan Knorr okwe ya kungame e ta lombwele ndje ta ti: “Malcolm, owe tu pa omayele ngoka tu na okulongela ko kugo, notago opalele. Ino dhimbwa, ngele ito tu kwathele moku tu pa omayele gopahole, oto ka kala owala wu li ekwatho eshona kehangano. Tsikila nokulonga nuudhiginini.” Konima yokugongala, onde shi lombwele Grace. Konima, otwa yi pombanda kondunda yetu yomObetel. Molwaashoka otwa li tu na oshimpwiyu, otwa tameke okulila.

Konima yoomwedhi dhontumba, otwa li twa yakula ontumwafo yehiyo tu ka hite Osikola yaGilead onti-24, ndjoka ya li tayi ka pwa muFebuluali 1955. Otwa li twa tseyithilwa manga inaatu ya kosikola kutya edheulo lyetu kalya li lela lyoku tu longekidha tu ninge aatumwa. Ihe olya li tali ke tu kwathela tu kale twa pyokoka nawa miilonga yetu yuuyendi. Okukala posikola ndjoka okwa li oshimoniwa oshiwanawa lela, ihe otashi fupipike wo omuntu.

Sho twa mana osikola, otwa pewa tu ye miilonga yuutonateli woshitopolwa. Oshitopolwa shetu osha li sha kwatela mo oshitunda shaIndiana, shaMichigan, nosho wo shaOhio. Opo nduno, otwa li twa kumwa sho muDesemba 1955 twa yakula ontumwafo ya zi komumwatate Knorr ndjoka tayi ti: “Popyeni shu ukilila nkene mu uvite, ne tamu lombwele ndje oshili. Ngele omwa ti kutya omwa hala okuya kObetel nokukala huka . . . nenge ngele omu na ehalo lyoku ka longa koshilongo shil we konima ngele mwa kala mObetel uule wethimbo lyontumba, tseyithilii ndje. Ngele omwa hala okukala miilonga yoshitopolwa noyuutonatelishikandjo, onda hala oku shi tseya.” Otwa yamukula kutya otatu ka kala twa nyanyukilwa okulonga kehe shoka tatu pewa tu longe. Nziya, otwa li twa lombwelwa tu kale twa thika kObetel.

Oomvula dhandje dhiilonga mObetel odha li dha kwatela mo okugandja iipopiwa pokugongala nosho wo piigongi iinene niishona muAmerika alihe. Onda li nda dheula nokukwathela aalumentu oyendji aagundjuka mboka konima ya ka kala ye na iinakugwanithwa iinene mehangano lyaJehova. Konima, onda ka longa ndi li amushanga gwomumwatate Knorr mombelewa ndjoka ya li hayi unganeke iilonga yokuuvitha muuyuni awuhe.

Onda li nda nyanyukilwa unene oomvula ndhoka nda kala mOshikondo shIilonga. Moshikondo moka onda li nda vulu okulonga nomumwatate T. J. (Bud) Sullivan. Muule woomvula odhindji okwa kala omutonateli gwoshikondo shoka. Ihe opwa li pu na yalwe mboka nda li ndi ilongo oshindji kuyo. Omumwatate Fred Rusk, ngoka a li a tulwa po a dheule ndje, okwa li gumwe  gwomuyo. Otandi dhimbulukwa tandi mu pula tandi ti: “Fred, omolwashike ho ningi omalunduluko ogendji moontumwafo dhandje dhimwe?” Okwa yolo e ta gwedha ko oohapu ndhika dha kwata miiti, “Malcolm, uuna wa popi sha ohashi vulu okuyelithwa niitya ya gwedhwa po, ihe ngele wa nyola sha, unene tuu ngele tashi zi huka, oshi na okukala shi na eityo noshi li paushili ngaashi naanaa tashi vulika.” Opo nduno okwa popi nohenda a ti: “Kala wu na omukumo, oto shi enditha nawa, nomokweendela ko kwethimbo oto ka kala wu li nawa.”

Muule woomvula odhindji mObetel, Grace okwa longa iilonga yi ili noyi ili, mwa kwatelwa okukala omwoopaleki gwoondunda dhokulala. Okwa li a nyanyukilwa iilonga ye. Sigo okesiku ndika, uuna omathimbo gamwe twa tsakanene naamwatate yamwe mboka ya li aagundjuka mObetel pethimbo ndiyaka, ohaya lombwele Grace tayi imemeha taya ti: “Owa longa ndje shili okuyala ombete yandje, nameme okwa nyanyukwa molwaashoka wa ninga ngaaka.” Grace okwa li wo a nyanyukilwa okulonga moshikondo shIifo, shOontumwafo nosho wo shOkukwata Uukaseta. Okusila oshimpwiyu iinakugwanithwa yi ili no yi ili mbyoka okwa li kwe mu kwathele a kale u uvite kutya kehe shoka tatu ningi nenge kutya kehe mpoka tatu longo mehangano lyaJehova oku li uuthembahenda nelaleko nuuyamba. Oku uvite ngaaka sigo okunena.

Mokati koomvula dho 1970 nasha, otwa li twa tameke okudhimbulula kutya aavali yetu mboka taye ende taya kulupa oya pumbwa ekwatho li vule lyoshito. Otwa li tu na okuninga etokolo lya kwata miiti. Katwa li twa hala okuthiga po Obetel nosho wo aalongeli yaJehova ooyakwetu mboka tu hole noonkondo. Ihe onda li ndu uvite kutya osha li oshinakugwanithwa shandje ndi sile oshimpwiyu aavali yetu. Onkee ano, konima yethimbo otwa thigi po Obetel, netegamano kutya uuna onkalo yetu ya lunduluka, otashi vulika tu galuke.

Opo tu iyambidhidhe pashimaliwa, onda tameke okunyola aantu momahangano omakwashilipaleki. Itandi dhimbwa nando shoka menindjela gumwe a li a lombwele ndje sho nda li tandi dheulwa a ti: “Ongeshefa ndjika oyi ikolelela kokudhenga oongodhi kongulohi. Pethimbo ndyoka opo ho mono aantu. Kapu na sha shilwe sha simanenena shi vule okukala po ongulohi kehe to dhenge oongodhi.” Onde mu yamukula nda ti: “Ondi na uushili kutya oto popi oshinima wu shi shi, nonde shi simaneka. Ihe ondi na wo iinakugwanithwa yopambepo mbyoka kaandi na esiku ndi ipwililikile, nokandi ndi na edhiladhilo lyoku shi ninga ngashingeyi. Otandi ka dhenga koongulohi dhimwe, ihe kongulohi mEtiyali nomEtine, onda pumbwa okuya kokugongala kwa simana.” Jehova okwa laleka ndje nuuyamba shili sho kaanda li nda faula okugongala ndi longe iilonga yomboloto.

Otwa li twa kalela meme sigo oosho a hulithile megumbo lyaakulupe muJuli 1987. Omupangi omukuluntu megumbo moka okwe ya kuGrace e te mu lombwele ta ti: “Mee Allen, inda kegumbo wu ka vululukwe po. Kehe gumwe oku shi shi kutya opo wa kala mpaka aluhe nameemweno gwoye. Kala wu na ombili  yokomwenyo nokukala wu uvite etumba sho we mu ningila ashihe shoka wa li to vulu oku mu ningila.”

MuDesemba 1987, otwa li tu udhitha oofooloma tu ka longe ishewe kObetel, ehala ndyoka tu hole. Ihe opwa piti owala omasiku omashona, ye Grace ota monika okaankela yomendjandja enene. Konima yetando nokokwaaluka nawa, okwa li a monika kutya ke na we okankela. Konima yethimbo lyontumba, otwa yakula ontumwafo ya zi kObetel ndjoka tayi tu lombwele kutya natu tsikile nuukalele wetu megongalo lyomoshitopolwa shetu. Otwa li twa tokola toko okupula komeho niilonga yetu yUukwaniilwa.

Pethimbo mpoka opwa li pwa holoka ompito yiilonga kuTexas. Otwa li twa tokola kutya onkalo yombepo ya pupyala hoka otayi ka kala ombwanawa kutse, yo oya kala tuu shili ombwanawa. Muka muTexas, otwa kala mo uule woomvula 25 tu li mokati kaamwatate naamwameme ye na olukeno mboka tu na nayo ngashingeyi ekwatathano lyopothingo.

Grace okwa li a kwatwa ishewe kokankela yendjandja enene, yo-thyroid, nomathimbohamale okwa li a kwatwa kuyokegundji. Ihe ke na nando esiku a nyenyetele kombinga yonkalamwenyo ye nenge a kale inaa simaneka uukwamutse nokukala itaa vulika kuwo. Olundji oha pulwa taku ti: “Oshike she mu ningitha mu kale mwa nyanyukwa mu li aaihokani nosho wo mu li oohandimwe?” Oha gandja omatompelo gane: “Otu li ookuume kopothingo. Ohatu kundathana esiku kehe. Otu hole okukala pamwe. Ihatu kotha nando uusiku twa geyelathana.” Eeno shili, ohatu ningathana nayi omalupita, ihe ohatu dhiminathana po nokudhimbwa, nomukalo ngoka ohagu kwatha shili.

Momayeleko agehe ngoka twa tsakaneka monkalamwenyo yetu, otwi ilonga mo iinima yontumba iiwanawa ngaashi:

1.  Kala aluhe wi inekela muJehova nokutaamba ko ashihe shoka a pitika. Ino igameka nando koondunge dhoye mwene. — Omayel. 3:5, 6; Jer. 17:7.

2.  Kala ho kongo ewiliko mOohapu dhaJehova, kashi na nduno mbudhi kutya omushike. Osha simanenena okuvulika kuJehova nokoompango dhe. Kapu na okulya oompanda mbali, opu na owala oshinima shimwe, okukala omuvuliki nenge hasho. — Rom. 6:16; Heb. 4:12.

3.  Opu na oshinima shimwe monkalamwenyo shoka sha simanenena, shoka shi li okwiiningila edhina ewanawa naJehova. Pititha komeho iinima ye, ihe hakwiikongela iinima yopamaliko. — Omayel. 28:20; Omuuv. 7:1; Mat. 6:33, 34.

4.  Galikana wu kale to pondola nokukala to shi enditha nawa miilonga yaJehova ngaashi tashi vulika. Ukitha eitulomo kwaashoka to vulu okuninga, ihe hakwaashoka itoo vulu okuninga. — Mat. 22:37; 2 Tim. 4:2.

5.  Kala wu shi shi kutya kapu na ehangano lilwe ndyoka Jehova a laleka nuuyamba nokwe li hokwa kaali shi owala ehangano lye. — Joh. 6:68.

Ngame naGrace kehe gumwe okwa longela Jehova uule woomvula dhi vulithe po 75, notwa longa pamwe tu li aaihokani uule woomvula tadhi ihilile po 65. Otwa nyanyukilwa pamwe shili mokulongela Jehova muule woomvula adhihe ndhika omilongo. Otu na etegameno notatu galikana opo aamwatate naamwameme ayehe ya mone nkene onkalamwenyo hayi kala ombwanawa uuna wi inekele muJehova.