NANKABAT si nanay tan tatay ko nen 1919 diad kombension na saray Internasyonal ya Estudyante na Biblia diad Cedar Point, Ohio, U.S.A. Nankasal irad saman met lanlamang a taon. Inyanak ak nen 1922, tan say agik ya si Paul et inyanak kalabas na duay taon. Say asawak ya si Grace et inyanak nen 1930. Saray atateng ton si Roy tan Ruth Howell et Estudyante na Biblia. Say bai tan laki to met et Estudyante na Biblia tan kaaro day Brother Charles Taze Russell.

Akabat koy Grace nen 1947, tan nankasal kami nen Hulyo 16, 1949. Antis kamin nankasal, nantongtongan mi arapen mi. Nandesisyon kami ya magmaliw a full-time ed ministeryo tan agkami la manilalak. Saniba kamin ginmapon nampayunir nen Oktubre 1, 1950. Insan nen 1952, niasain kamin manlingkor ed sirkito.

Amta min kakkaukolan mi tulong pian nagawaan mi balon asainmin mi. Legan kon makakaaral ed saray eksperiensyadon brother, labay kon makaaral met si Grace. Kanian inmasingger ak ed si Marvin Holien ya abayag lan kaaro mi tan asali toy nanlingkor bilang ombiabiahen manangasikaso. Imbagak ed sikato: “Ugaw ni Grace tan anggapo ni masyadon eksperiensya to. Walay nirekomenda yon nakaiba ton magano pian nipasal?” “Wala,” so kuan to. “Si Edna Winkle, abayag lan payunir man kanian natulongan to.” Nen kien, oniay imbaga nen Grace nipaakar ed si Edna: “Pakakalmaen toy liknaan ko no turnok lay mitongtong, marunong ya mikatunongan, tan imbangat to ak ya ondengel ed ibabaga na unabung pian amtak so iyebat ko. Talagan atulongan to ak!”

Nanlingkor kami nen Grace diad duaran sirkito ed Iowa, tan arum ya parte na Minnesota tan South Dakota. Insan inyalis da kamid New York Circuit 1, ya kaibad satan so Brooklyn tan Queens. Diman mi aliklikna ya kulang  nin talagay eksperiensya mi. Kaibad sirkito mi so Brooklyn Heights Congregation, ya say aral da et diad Kingdom Hall ed Bethel tan dakel ditan so abayag lan Bethelite. Kayari unonan paliwawak ed sayan kongregasyon, inasinggeran to ak nen Brother Nathan Knorr tan oniay nanonotan kon imbaga to: “Malcolm, dugaruga iramay insimbawam ya papaaligwasen mi. Tandaan mo, no agmo kami ikdan na maaron simbawa, daiset labat so naitulong mod organisasyon. Itultuloy mo tay maabig lan nagagawaan mo.” Kayari aral, imbagak yad si Grace. Insan kami la sinmegep ed kuarto mid Bethel. Lapud kesaw tan panaburido mi, inyakis min dua.

Kayari pigaran bulan, akaawat kami sulat ya mangiimbitad sikamin manaral ed koma-24 a klase na Gilead School, ya nasumpal ed Pebrero 1955. Antis kamin onla, impaamta rad sikami ya kayari min manaral et agto labay ya ibagan magmaliw kamin misionero. Imbes, nipasal kamin mas magmaliw ya epektibo ed kimey diad sirkito tan distrito. Balibali man ya impanaral mi tan ginawa to kamin mas mapaabeba.

Kayari min nanaral, niasain kami diad kimey ed distrito. Say distrito mi et diad Indiana, Michigan, tan Ohio. Balet asurprisa kami ta nen Disyembre 1955, akaawat kami sulat ya nanlapud si Brother Knorr tan oniay inkuan to: “Ibaga yo labat so tua no antoy labay yo. No labay yoy onlad Bethel tan dia ki la . . . odino labay yoy niasain ed arum ya bansa kayari yon manlingkor a maganod Bethel, ibaga yo labat ed siak. No mas pilien yoy kimey ed distrito tan sirkito, ibaga yo met labat.” Sinmulat kami ya maliket min awaten so anggan anton asainmin. Impanreport da kamin tampol ed Bethel!

Kaibad asainmin kod Bethel so pampaliwawad saray kongregasyon, asemblea, tan kombension diad interon United States. Kaiba ak ya angipasal ed dakel ya kalangweran a brother ya naikday ambelat iran responsabilidad ed organisasyon nen Jehova. Insan nen kien, nagmaliw ak ya sekretaryo nen Brother Knorr diad departamento ya mangoorganisa ed panagpulong diad interon mundo.

Talagan malikeliket iramay taon ya niasain ak ed Service Department. Akatrabahok ditan si T. J. (Bud) Sullivan. Sikato so abayag ya overseer  ed satan a department. Balet wala ni ray arum ya akaaralan ko. Say sakey et si Fred Rusk, sikato so angi-train ed siak. Makakaimis ak no nanonotan ko may intepet kod sikato, “Fred, akin et dakel so uumanen mod saray sulat ko?” Akalek si Fred, balet oniay seryoso ton imbaga: “Malcolm, no mitotongtong ka, sarag mon ipaliwawan maong, balet no diad sulat, lalo la no diay nanlapuan to, kaukolan ya susto tan anggapoy lingo anggad posible.” Insan maaro ton imbaga, “Anosan mo labat—baleg lay inaligwasan mo, onsabi panaon sarasarag mo la.”

Diad pigaran taon mid Bethel, nandurumay nagmaliw ya asainmin nen Grace. Asali toy nan-housekeeper, ya manlilinis ed saray kuarto. Labalabay to man ya trabaho. Anggad natan, no wala ray nanengneng min brother ya balobalo nid Bethel ed saman ya panaon, makakaimis dan ibagad si Grace, “Imbangat yod siak no panon kon ayosen so dukolan ko, tan aliketan si nanay kod impangibangat yo.” Nantrabaho met si Grace ed arum ya departamento singa diad Magazine, Correspondence, tan Tape Duplicating. Akatulong so nanduruman asainmin to pian naapresya ton anggan anto o iner so kimey tayo, pribilehyo tan bendisyon itan a nanlapud si Jehova. Ontan nin siansiay panmoria to anggad natan.

Nen 1975, kaukolan lan asikasoen iray atateng mi ta matatken la ra. Mair-irap so mandesisyon. Agmi labay ya taynan so Bethel tan saray kapara min lingkor nen Jehova ya naar-aro min maong. Anggaman ontan, aliknak ya responsabilidad kon asikasoen iray atateng mi. Kanian pinmaway kamid Bethel, balet iilaloan mi makapawil no iyabuloy lamet na situasyon.

Pian walay pambilay mi, nantrabaho ak ed insurance company. Agko nalingwanan imay imbaga na sakey a manager legan ak ya manti-training: “Makalmo kad sayan trabaho no onla kad kaabungan kada labi. Ta seguradon nasabim iray totoo. Anggapo lay mas importante nen say iyakar mod sikara kada labi.” Say kuan ko, “Segurado ak ya duga tay ibabaga yo, tan agko kontraen itan. Balet wala ray responsabilidad kod espiritual ya agko nin balot pinaulyan, tan agkon balot implanon paulyanan. Sige, onla ak ed kaabungan no labi, balet kada Martes tan Huebes na labi, walay importantin miting ya laen ko.” Talagan benendisyonan ak nen Jehova ta agko insalat iray aral lapud trabaho.

Sanen inatey si nanay ko diad nursing home nen Hulyo 1987, wala kamid abay to. Inasinggeran na nurse si Grace tan imbaga to: “Mrs. Allen, sempet ki la tan ipainawa yo. Agkayo mapaga.  Amta min ginawa yoy anggaay nayarian yo parad katulangan yo.”

Nen Disyembre 1987, nan-aplay kami lamet ed Bethel, say lugar ya inar-aro mi. Balet kayari pigara labat ya agew, a-diagnose ya walay colon cancer nen Grace. Kayari ton naoperaan tan kinmasil la, imbaga na doktor ya anggapo lay cancer to. Balet akaawat kami sulat ya nanlapud Bethel ya say kuan tod man et maabig no itultuloy mi lay manlingkor ed kongregasyon mi. Determinado kamin ag-ontundan mankimey parad Panarian.

Asabi panaon, walay inyopresi dan trabaho ed Texas. Nandesisyon kamin diman la manayam ta mas balibali klima. Manga 25 taon kami lad Texas natan tan inmapit ya maong so liknaan mi ed saray maar-aron agagi dia.

Tubat-tubat so cancer nen Grace ed colon tan thyroid, tan natan et walay breast cancer to. Balet agton balot nanreklamo, tan nansiansian mapasakop. Dakel so manetepet ed sikato, “Antoy sekreto yo akin et maliket tan maong so ulopan yon sanasawa?” Niay apatiran rason ya ibabaga to: “Malet kamin sankaaro. Lanang kamin mantotongtong. Naynay kami met a saniba. Tan agkamin balot onuugip ya walay barongan mi.” Siempre, no maminsan nasakitan mi sakey tan sakey ya agmi gagagalaen, balet manpeperdonaan kami tan lingwanan mi lay agawa—epektibo itan.

Diad amin ya subok ya dinalan mi, nia ray pigaran naaralan mi:

1.  Lanang ya manmatalek ed si Jehova tan awaten so antokaman ya iyabuloy to. Agbalot manmamatalek ed dilin pakatalos mo.—Uli. 3:5, 6; Jer. 17:7.

2.  Tumbokey panangigiya na Salita nen Jehova, anggan antoy problema. Importante so itulok ed si Jehova tan ed saray ganggan to. Agnayarin wala ka labat ed pegley—manpili ka no onunor ka odino andi.—Roma 6:16; Heb. 4:12.

3.  Say sankaimportantian ed amin et say pakawalaay maong a ngaran ed si Jehova. Iyunam so labay to, aliwan say materyal.—Uli. 28:20; Ecl. 7:1; Mat. 6:33, 34.

4.  Ipikasim ya anggad sarag mo et mabunga tan maseseg so panaglingkor mo. Manpokus ed saray sarag mo nin gawaen, aliwan diad saray agmo la nagawaan.—Mat. 22:37; 2 Tim. 4:2.

5.  Tandaan ya anggapo lay arum ya organisasyon ya bebendisyonan tan aabobonan nen Jehova.—Juan 6:68.

Siak tan si Grace et nanlingkor ed si Jehova ed masulok lan 75 taon, tan ngalngali 65 taon kami lan manlilingkor bilang sanasawa. Talagan malikeliket kamin saniban mandadayew ed si Jehova diad dakel lan dekada. Ipipikasi mi ya naeksperiensya komon na amin ya agagi so liket na panmatalek ed si Jehova.