MI TATA ku mi mama a konosé otro na 1919 na e kongreso di e Studiantenan Internashonal di Beibel na Cedar Point, Ohio, Merka. Nan a kasa mas lat den e mesun aña ei. Ami a nase na 1922, i mi ruman hòmber, Paul, a nase dos aña mas despues. Grace, mi kasá, a nase na 1930. Su mayornan, Roy ku Ruth Howell, a lanta komo Studiantenan di Beibel, i tantu Grace su wela komo su tawela parti di mama i di tata tambe tabata Studiantenan di Beibel i amigu di Ruman Charles Taze Russell.

Mi a konosé Grace na 1947, i nos a kasa dia 16 di yüli 1949. Promé ku nos a kasa, nos a papia frankamente tokante nos futuro. Nos a tuma e desishon di drenta den e sirbishi di tempu kompleto i pa no haña yu. Dia 1 di òktober 1950 nos a kuminsá traha pionero huntu. Anto na 1952, nos a haña e invitashon pa hasi e trabou di sirkuito.

Nos tur dos a sinti ku nos tabatin mester di hopi yudansa pa kumpli ku e asignashon nobo akí. Miéntras mi tabata siña for di rumannan ku mas eksperensia, mi a buska yudansa pa Grace tambe. Mi a aserká Marvin Holien, un amigu di kas ku tabatin hopi eksperensia komo superintendente biahero, i mi a puntr’é: “Grace ta yòn ainda i no tin muchu eksperensia. Bo por rekomendá mi un ruman ku por traha kuné pa e haña un poko entrenamentu?” E di: “Sí. Edna Winkle ta un pionero di hopi aña, e por ta un gran yudansa p’e.” Mas despues, Grace a bisa di Edna: “El a laga mi sinti mi kómodo na porta di kas di e hendenan. E tabata sa bon kon pa kontestá hende ku tabata bini ku opheshon, i el a siña mi skucha e doñonan di kas di manera ku mi por a haña sa kiko pa bisa. El a duna mi nèt loke mi tabatin mester!”

Ami ku Grace a sirbi den dos sirkuito den e estado di Iowa, inkluso parti di e estado di Minnesota i South Dakota. Despues e rumannan a transferí nos pa Sirkuito 1 di New York, loke a inkluí e áreanan di Brooklyn i Queens. Hamas nos por lubidá kon nobato nos tabata den e asignashon  ei. E sirkuito a inkluí e Kongregashon di Brooklyn Heights, ku tabata reuní na e Salòn di Reino na Bètel i kaminda tabatin vários miembro di e famia di Bètel di hopi eksperensia. Despues ku mi a duna mi promé diskurso di sirbishi na e kongregashon ei, Ruman Nathan Knorr a aserká mi i a bisa mi: “Malcolm, bo a duna nos algun kos pa traha ariba, i esei tabata na su lugá. Ma no lubidá, si bo no duna nos konseho, lo bo ta di poko balor pa nos organisashon. Sigui ku bo bon trabou.” Despues di e reunion, mi a konta Grace esaki. Nos tabatin asina tantu tenshon ku ora nos a bai den nos kamber di Bètel nos tur dos a yora.

Despues di un par di luna, nos a risibí un karta di invitashon pa asistí na e klas number 24 di Skol di Galaad, kaminda nos a gradua na febrüari di 1955. E rumannan a informá nos promé ku nos a bai e skol ku nos entrenamentu no tabata nesesariamente pa prepará nos pa bira misionero. Mas bien, esei lo a sirbi pa ekipá nos pa bira mas efikas den e trabou biahero. E skol tabata maravioso i el a siña nos ku nos mester ta humilde.

Ora nos a kaba e kurso, nos a haña e asignashon pa sirbi komo superintendente di distrito. Nos distrito a inkluí estado di Indiana, Michigan i Ohio. Anto pa nos sorpresa, na desèmber 1955 nos a risibí un karta di Ruman Knorr ku a bisa: “Sea masha franko den loke boso ta bisa, i sea sinsero ku mi. Si boso ta dispuesto pa bini na Bètel i keda aki . . . òf si boso ta dispuesto pa aseptá un asignashon afó despues ku boso sirbi aki na Bètel pa un tempu, laga mi sa. Ma si boso ta preferá e trabou di distrito òf di sirkuito, lo mi tin gana di sa esei.” Nos a kontest’é ku nos lo ta kontentu pa aseptá kualke asignashon. Kasi mesora despues, nos a haña e instrukshon pa presentá na Bètel!

Mi dushi añanan na Bètel a inkluí dunamentu di diskurso na kongregashon-, asamblea- i kongresonan rònt parti di Merka. Mi a yuda entrená hopi ruman hòmber yòn ku despues a asumí responsabilidatnan mas grandi den nos organisashon. Ku tempu mi a kuminsá traha komo sekretario di Ruman Knorr den e ofisina ku tabata organisá e obra mundial di predikashon.

Mi a disfrutá masha hopi mes di e añanan ku mi a sirbi den e Departamento di Sirbishi. Ei mi a traha huntu ku ruman T. J. (Bud) Sullivan. Pa hopi aña e tabata e superintendente di e departamento ei. Pero tambe tabatin mas ruman ku mi a siña masha hopi for di nan. Fred Rusk, kende tabata e ruman  ku mester a entrená mi, tabata un di nan. Mi tin grato rekuerdo di un kòmbersashon ku mi tabatin kuné un biaha. Mi a puntr’é: “Fred, dikon bo ta hasi asina tantu kambio den algun di mi kartanan?” El a hari, pero ku un tono serio el a bisa mi: “Malcolm, ora bo bisa algu, bo por splika un ke otro ku mas palabra. Ma ora bo skirbi algu, spesialmente ora e sali for di aki, e mester ta mas kompleto i mas eksakto posibel.” Anto ku un stèm kariñoso el a agregá: “Pero sigui asina, bo ta bayendo den bon direkshon; ku tempu lo bo ta hopi mas mihó.”

Den transkurso di e añanan ku nos a sirbi na Bètel, Grace a risibí un variedat di asignashon di trabou, inkluso esun di limpiesa di e kambernan. E tabata gusta su trabou mashá. Te na dia djawe, ora nos topa algun di e ruman hòmbernan ku e tempu ei a drenta Bètel yòn asina, nan ta bisa Grace ku un smail riba nan kara: “Grace, bo a ègt siña mi kon pa drecha kama, i mare bo por sa kuantu mi mama a gusta loke bo a hasi.” Grace tabatin e plaser di traha tambe den e departamento di Revista, di Korespondensia i di Produkshon di Oudiokasèt. E echo ku e tabatin e diferente asignashonnan ei a yud’é apresiá ku kiko nos hasi òf unda ku nos sirbi den e organisashon di Yehova ta un privilegio i un bendishon pa nos. Te na dia djawe e ta pensa meskos.

Meimei di añanan 70, nos a kuminsá realisá ku nos mayornan di edat tabatin mester di mas atenshon. A yega e momento ku nos tabatin ku tuma un desishon difísil. Nos no kier a bai for di Bètel i laga nos rumannan stimá ku nos a sera asina tantu kuné. Di otro banda, mi a sinti ku mi tabatin e responsabilidat di kuida nos mayornan. P’esei, ku tempu nos a bai for di Bètel, ku e speransa ku dia nos situashon kambia, nos lo por a bolbe bèk.

Pa mi por a gana mi pan di kada dia, mi a kuminsá bende seguro. Nunka mas mi ta lubidá kiko un manager a bisa mi un biaha tempu mi tabata den training. E di: “Éksito di e negoshi akí ta sinta den hasi bishita parti anochi. Ta e ora ei bo ta haña hende na kas. No tin nada mas importante ku bai tur anochi i bishitá nan.” Mi a kontest’é: “Mi tin sigur ku bo ta papia di eksperensia, i mi ta respetá bo pa esei. Pero mi tin otro responsabilidat tambe, di karakter spiritual, ku mi no por neglishá, i mi no tin intenshon di kuminsá hasi esei awor tampoko. Lo mi bishitá algun hende anochi, pero no riba djamars ni djaweps, pasobra e reunionnan ku mi ta bai ta masha importante.” Yehova no a laga mi na kaya. El a bendishoná mi determinashon pa no falta reunion pa motibu di trabou.

Nos tabata na mi mama su kama di morto ora el a fayesé den un kas di kuido na yüli 1987. E verpleegster hefe di departamento a aserká Grace i bis’é: “Sra. Allen, bai kas i sosegá bo kurpa. Tur  hende sa ku bo tabat’ei tur ora pa bo suegra. Bo por keda trankil i sa ku bo a hasi tur loke bo tabata por.”

Na desèmber 1987, nos a yena nos aplikashon pa sirbi na Bètel atrobe, e lugá ku nos a stima asina tantu. Pero djis un par di dia despues, dòkternan a diagnostiká Grace ku kanser na tripa. Despues ku nan a oper’é i ku el a rekuperá, nan a bisa ku e no tabatin kanser mas. Pero mientrastantu nos a haña un karta di Bètel ku a rekomendá nos pa sigui ku nos sirbishi den e kongregashon lokal. Nos tabata determiná pa sigui padilanti den nos aktividat di Reino.

Ku tempu, un oportunidat di trabou a habri pa mi na Texas. Nos a pensa ku e klima mas kayente lo tabata mihó pa nos, loke a resultá di ta e kaso tambe. Aki na Texas, pa 25 aña kaba nos ta rondoná pa rumannan ku nos a sera mashá kuné.

Entre tantu Grace a haña problema ku schildklier, su kanser na tripa a bini bèk i resientemente el a haña kanser na pechu tambe. Pero nunka el a keha tokante su salú, falta rèspèt pa mi komo kabes di famia òf nenga di apoyá mi desishonnan. Hopi biaha e rumannan ta puntr’é kiko ta e sekreto di nos éksito komo pareha i e felisidat ku nos tur dos ta reflehá. E ta duna kuater motibu: “Nos ta bon amigu di otro. Nos ta komuniká ku otro tur dia regularmente. Nos ta gusta pasa tempu huntu tur dia. I nunka nos ta bai drumi anochi rabiá ku otro.” Klaru ku de bes en kuando nos ta trapa riba tenchi di otro, pero nos ta pordoná i lubidá, i semper esei ta duna bon resultado.

Apesar di tur e pruebanan ku nos a haña nos kuné, tin vários lès ku nos a siña:

1. Semper dependé riba Yehova i aseptá loke e ta permití. No dependé nunka riba bo mes komprondementu.—Pro. 3:5, 6; Yer. 17:7.

2. Buska guia di Yehova su Palabra, sin importá kiko e kuestion por ta. Ta masha importante pa obedesé Yehova. No tin un tereno neutral; sea bo ta òf bo no ta obediente.—Rom. 6:16; Heb. 4:12.

3. Bon mirá, ta ún kos ta konta den bida: gana un bon nòmber serka Yehova. Pone su interesnan na promé lugá, i no buska rikesa material.—Pro. 28:20; Ekl. 7:1; Mat. 6:33, 34.

4. Pidi Yehova yuda bo pa ta mas produktivo i aktivo posibel den su sirbishi. Enfoká riba loke bo por hasi, no riba loke bo no por hasi.—Mat. 22:37; 2 Tim. 4:2.

5. Realisá ku esaki ta e úniko organisashon ku tin e bendishon i aprobashon di Yehova.—Huan 6:68.

Ami ku Grace a sirbi Yehova pa mas ku 75 aña, i komo pareha kasá, nos a sirbié pa kasi 65 aña. Tabata dushi sirbi Yehova huntu tur e añanan akí. Nos ta spera i ta pidi pa tur nos rumannan tambe por sinti ku no tin nada mas mihó den bida ku dependé riba Yehova.