HAʼU-NIA inan-aman hasoru malu iha reuniaun boot ida husi Estudante Bíblia sira iha sidade Cedar Point, Ohio, iha Estadus Unidus iha tinan 1919. Sira mós kaben iha tinan neʼe. Haʼu moris iha tinan 1922 no liutiha tinan rua, haʼu-nia alin Paul moris. Haʼu-nia feen, Grace, moris iha tinan 1930. Ninia inan-aman, Roy no Ruth Howell, boot iha lia-loos no ninia avó sira mós Estudante Bíblia sira no irmaun Charles Taze Russell mak sira-nia belun.

Haʼu hasoru Grace iha tinan 1947 no ami kaben iha fulan-Jullu, iha tinan 1949. Antes ami kaben, ami koʼalia nakloke ba malu kona-ba saida mak ami-nia hakarak iha futuru. Ami deside atu la iha oan hodi bele serbisu tempu-tomak ba Maromak. Iha fulan-Outubru, tinan 1950, ami komesa serbí nuʼudar pioneiru hamutuk. Depois, iha tinan 1952, ami hetan konvite atu serbí nuʼudar katuas área nian.

Ami naʼin-rua sente katak ami presiza ajuda barak atu kumpre ami-nia knaar. Maski haʼu aprende husi irmaun sira neʼebé iha esperiénsia, maibé haʼu mós hakarak ema ida atu ajuda Grace. Haʼu koʼalia ba ami-nia belun ida naran Marvin Holien, neʼebé iha esperiénsia nuʼudar katuas neʼebé vizita kongregasaun sira. Haʼu husu ba nia: “Grace nia idade sei kiʼik no nia ladún iha esperiénsia. Ita hatene ka lae ema ruma neʼebé bele ajuda nia hodi fó treinu?” Nia hatán: “Sin. Irmán Edna Winkle serbí nuʼudar pioneiru ida kleur ona, no nia bele ajuda Grace.” Kuandu Grace hanoin fila fali kona-ba Edna, nia dehan: “Nia halo haʼu sente kalma kuandu haʼu haklaken ba ema. Nia mós hatene oinsá atu hatán ba uma-naʼin nia pergunta sira no hanorin haʼu katak importante atu rona ba uma-naʼin hodi haʼu bele hatene oinsá atu hatán iha dalan neʼebé loos. Nia ajuda duni haʼu!”

Haʼu no Grace iha knaar atu vizita área rua iha Iowa, neʼebé mós inklui kongregasaun balu iha Minnesota no Dakota Súl. Depois ami hetan knaar atu serbí iha sidade Novaiorke neʼebé inklui mós kongregasaun balu iha sidade kiʼik sira iha Novaiorke nia laran naran Brooklyn no Queens. Ami mós  vizita kongregasaun ida naran Brooklyn Heights. Sira-nia Reuniaun-Fatin mak iha Betel. Iha tempu neʼebá, ami sente ami la iha esperiénsia tanba kongregasaun neʼe iha irmaun no irmán barak neʼebé serbisu iha Betel kleur ona. Kuandu haʼu hatoʼo haʼu-nia diskursu primeiru ba kongregasaun neʼe, irmaun Nathan Knorr dehan mai haʼu: “Irmaun Malcolm, ohin Ita fó mai ami konsellu diʼak neʼebé ami presiza halo tuir. Labele haluha katak, se Ita la fó konsellu mai ami, Ita-nia serbisu ba ita-nia organizasaun neʼe sei sai saugati deʼit. Kontinua nafatin Ita-nia serbisu diʼak.” Kuandu reuniaun hotu tiha, haʼu konta ida-neʼe ba Grace. Depois neʼe, ami fila ba ami-nia kuartu. No tanba ami kole no hanoin barak kona-ba ami-nia knaar, ami tanis.

Liutiha fulan balu, ami simu konvite atu tuir Eskola Gilead klase 24. Antes ami tama eskola neʼe, irmaun sira dehan mai ami katak treinu neʼebé ami simu, karik laʼós atu prepara ami atu sai misionáriu. Maibé, ida-neʼe ajuda ami atu kaer didiʼak ami-nia knaar atu vizita kongregasaun sira. Ami ramata ami-nia eskola iha fulan-Fevereiru, tinan 1955. Ami sente katak tuir eskola neʼe mak esperiénsia neʼebé furak loos no halo ami mós sente haraik-an.

Kuandu Eskola Gilead hotu ona, ami hetan knaar atu serbí nuʼudar katuas vizitante. Kongregasaun sira neʼebé ami vizita mak iha distritu Indiana, Michigan, no Ohio. Depois, iha fulan-Dezembru, tinan 1955, ami simu karta ida husi irmaun Knorr neʼebé hatete: “Koʼalia sai Ita-nia hakarak ho nakloke deʼit. Se Ita hakarak atu tama Betel no hela nafatin iha-neʼe, ka serbisu iha Betel ba tempu balu, depois simu knaar atu bá rai seluk, fó-hatene mai haʼu. Maibé se Ita hakarak atu serbí nafatin atu vizita kongregasaun sira, hatete deʼit mai haʼu.” Ami hatán hodi dehan katak ami kontente atu simu knaar naran deʼit. Lakleur depois neʼe, sira haruka ami atu tama Betel.

Tinan sira neʼebé haʼu serbisu iha Betel lori ksolok tebes mai haʼu. Haʼu-nia knaar inklui hatoʼo diskursu sira iha reuniaun no reuniaun boot sira iha fatin oioin iha Estadus Unidus. Haʼu hola parte hodi fó treinu no ajuda irmaun joven barak neʼebé ikusmai simu knaar importante sira iha Jeová nia organizasaun. Haʼu mós serbisu nuʼudar irmaun Knorr nia sekretáriu iha departamentu neʼebé irmaun sira organiza serbisu haklaken iha mundu tomak.

Haʼu gosta tebes serbí ba tinan balu iha Departamentu Serbisu nian. Iha departamentu ida-neʼe, haʼu serbisu hamutuk ho irmaun T.J. Sullivan. Ba tinan barak, irmaun neʼe serbí nuʼudar koordenadór ba departamentu neʼe. Haʼu mós aprende buat  barak husi irmaun sira seluk hanesan Fred Rusk, neʼebé iha knaar atu fó treinu ba haʼu. Loron ida haʼu husu ba nia: “Irmaun Fred, tanbasá mak Ita sempre hadiʼa surat sira neʼebé haʼu hakerek antes haruka?” Nia hamnasa uitoan, no hatete: “Kuandu ita koʼalia, neʼe fasil deʼit atu aumenta hodi esplika klaru liután. Maibé kuandu ita hakerek buat ruma, ita presiza atu hakerek ho loloos hodi hili liafuan ho didiʼak, liuliu kuandu ita haruka surat ida husi Departamentu Serbisu nian.” Depois, ho laran-diʼak nia hatutan tan: “Lalika laran-tun. Ita halo serbisu diʼak, no lakleur tan, Ita sei hatene oinsá atu halaʼo Ita-nia knaar.”

Durante tinan sira neʼebé ami serbí iha Betel, Grace halo knaar oioin hanesan serbisu atu hamoos kuartu sira. Nia gosta serbisu neʼe. Toʼo agora, kuandu ami hasoru irmaun sira neʼebé uluk serbisu iha Betel nuʼudar klosan, sira hamnasa hodi dehan ba Grace: “Uluk, irmán hanorin haʼu atu hadiʼa toba-fatin ho didiʼak, no haʼu-nia inan mós agradese ba treinu neʼebé Ita fó mai haʼu.” Grace mós gosta halo serbisu iha departamentu oioin iha Betel. Hodi halo serbisu neʼe, Grace sente katak maski ita serbí iha fatin neʼebé deʼit ho knaar naran deʼit, maibé serbí iha Maromak nia organizasaun mak buat neʼebé espesiál tebes. Toʼo ohin loron, nia nafatin sente hanesan neʼe.

Maizumenus iha tinan 1975, ami haree katak ami-nia inan-aman sira neʼebé idade ona presiza ami-nia ajuda. Ami presiza foti desizaun neʼebé susar. Ami lakohi atu sai husi Betel no husik ami-nia belun sira neʼebé ami hadomi, maibé haʼu sente katak haʼu mak iha responsabilidade atu tau matan ba haʼu-nia inan-aman. Tan neʼe, ikusmai ami sai husi Betel, maibé ami hein katak ami bele fila fali kuandu ami-nia situasaun troka.

Atu hetan osan, haʼu serbisu atu faʼan kontratu sira ba kompañia ida. Haʼu sei la haluha buat neʼebé haʼu-nia xefe ida hatete mai haʼu kuandu nia fó treinu mai haʼu. Nia hatete: “Hodi manán osan iha serbisu neʼe, ita tenke bá vizita ema nia uma iha kalan, tanba iha oras neʼe mak ita bele hasoru ho ema. La iha buat neʼebé importante liu fali vizita ema kalan-kalan.” Haʼu hatán ba nia: “Haʼu hatene katak Ita-boot hatene buat barak kona-ba serbisu neʼe, maibé kona-ba haʼu-nia adorasaun ba Maromak, haʼu mós iha responsabilidade sira neʼebé haʼu tenkesér halo. Tan neʼe, iha kalan balu haʼu bele serbisu, maibé Tersa no Kinta kalan, haʼu presiza tuir haʼu-nia reuniaun sira neʼebé importante tebes.” Maromak Jeová fó bensaun duni mai haʼu tanba haʼu la falta reuniaun sira tan deʼit serbisu.

Ami hamutuk ho haʼu-nia inan kuandu nia mate iha fulan-Jullu, tinan 1987. Enfermeira ida hatete ba Grace: “Ami hotu hatene katak Ita la husik Ita-nia banin-feto husi ninia sorin durante tempu neʼe. Maibé agora, diʼak se Ita fila ba uma no deskansa deʼit ona. Keta hanoin barak. Ita serbisu makaʼas ba Ita-nia inan, sente hakmatek deʼit.”

 Iha fulan-Dezembru, tinan 1987, ami prenxe formuláriu atu bele serbí fali iha Betel, fatin neʼebé ami gosta tebes. Maibé, loron balu tuirmai, Grace hetan kankru iha kabun. Nia hetan operasaun no ikusmai sai diʼak fali. Durante tempu neʼe, ami simu karta husi Betel neʼebé dehan katak diʼak se ami kontinua atu apoia deʼit ami-nia kongregasaun rasik. Ami hakaʼas an atu kontinua nafatin iha ami-nia serbisu ba Maromak.

Liutiha tempu balu, haʼu hetan oportunidade atu serbisu iha Texas. Tanba iha Texas rai manas uitoan, ami hanoin katak se ami hela iha neʼebá, neʼe sei diʼak ba ami. No tuir loloos, ami gosta tebes fatin neʼe. Agora, ami hela iha Texas ba tinan 25 ona no ami iha maluk kristaun barak neʼebé ami hadomi tebes.

Durante tempu neʼe, Grace hasoru fali moras kankru oioin, iha kabun no kakorok-musan, no foin daudauk nia hetan kankru iha susun. Maibé Grace nunka sai laran-tun demais kona-ba ninia situasaun. Nia mós sempre apoia no halo tuir haʼu nuʼudar ulun. Dala barak ema husu ba nia: “Tanbasá mak imi hetan susesu nuʼudar kaben-naʼin no tanbasá mak imi sempre kontente?” Grace hatán hodi fó razaun haat. Nia hatete: “Ami naʼin-rua belun neʼebé besik liu. Ami koʼalia ba malu beibeik. Ami gosta uza tempu hamutuk loroloron, no se problema mosu neʼebé halo ami hirus malu, ami hakaʼas an atu rezolve problema neʼe antes atu toba.” Klaru katak dala ruma ami halo buat balu neʼebé ida fali la gosta, maibé ami sempre fó perdua ba malu no ida-neʼe lori rezultadu neʼebé diʼak.

Buat neʼebé ami aprende husi susar hotu neʼebé ami hasoru mak:

1.  Se susar ruma kona ita, tau fiar nafatin ba Jeová. Sadere nafatin ba nia duké ita-nia matenek rasik.—Provérbios (Amsal) 3:5, 6; Jeremias (Yeremia) 17:7.

2.  Iha situasaun naran deʼit, buka matadalan husi Jeová nia liafuan. Importante tebes atu halo tuir Jeová no ninia lei sira. Presiza halo tuir ho laran tomak, labele ho laran-rua.—Roma 6:16; Ebreu 4:12.

3.  Buat neʼebé importante iha ita-nia moris mak atu hetan naran diʼak ho Jeová. Tau uluk Jeová iha ita-nia moris, laʼós rikusoin.—Provérbios (Amsal) 28:20; Eclesiastes (Pengkhotbah) 7:1; Mateus 6:33, 34.

4.  Halo orasaun atu ita bele badinas nafatin iha Jeová nia serbisu. Hanoin kona-ba buat neʼebé ita bele halo, laʼós buat neʼebé ita la bele halo.—Mateus 22:37; 2 Timoteo 4:2.

5.  Labele haluha katak só ita-nia organizasaun deʼit mak Jeová apoia.—Joao 6:68.

Haʼu no Grace serbí Jeová ba tinan 75 liu ona. No nuʼudar kaben-naʼin, ami serbí nia hamutuk besik tinan 65 ona. Durante tinan barak neʼe, ami haksolok tebes atu halo serbisu ba Maromak hamutuk. Ami hein katak irmaun-irmán hotu bele iha esperiénsia hanesan ami hodi haree oinsá Jeová fó bensaun barak se ita sadere ba nia.