MAKANI AABUUMI

Kusyoma Jehova Kwatuletela Zilongezyo

Akaluulwa aba Malcolm Allen

Kabuca uleta tunji, inzya, zimwi ziindi buumi bulakonzya kuyuma. Nokuba boobo, Jehova ulabalongezya aabo ibasyoma mulinguwe, kutali maano aabo beni. Eeci ncencico ncotwalibonena mebo abakaintu bangu mubuumi bwesu ibwatuletela zilongezyo. Nkooko ndimwaambile makani masyoonto aajatikizya buumi bwesu.

BATAATA abamaama bakazyibana mu 1919 kumuswaangano Wamasi Wabasikwiiya Bbaibbele iwakacitilwa ku Cedar Point, Ohio, U.S.A. Bakakwatana mumwaka nguwenya ooyu. Mebo ndakazyalwa mu 1922, mpoonya muce wangu wakazyalwa nokwakainda myaka yobilo. Bakaintu bangu ba Grace bakazyalwa mu 1930. Bazyali baba Grace, ba Roy aba Ruth Howell, bakakomezyegwa kabali Basikwiiya Bbaibbele, abalo bakaapanyina bakali Basikwiiya Bbaibbele alimwi bakali balongwe ba Mukwesu Charles Taze Russell.

Mebo aba Grace twakazyibana mu 1947, mpoonya twakakwatana mu July 16, 1949. Katutanakwatana, twakali kubandika cakutainda mumbali twaambo tumwi itwakali kujatikizya buumi bwesu bwakumbele. Twakasala kutola lubazu mumulimo waciindi coonse kakunyina kuba abana. Mu October 1, 1950, twakatalika mulimo wabupainiya antoomwe. Mpoonya mu 1952, twakalombwa kuyakubeleka mulimo wamubbazu.

MULIMO WAKWEENDEENDA ALIMWI ALWIIYO LWAKU GILEADI

Toonse tobilo twakali kulimvwa kuti twakali kuyandika lugwasyo lunji kutegwa tukacikonzye kuucita mulimo ooyu mupya. Mbwaanga mebo ndakali kwiiya kuzwa kubakwesu bacibwene, abalo ba Grace ndakabayandawida sikubagwasya. Ndakaambila mukwesu Marvin Holien, iwakali mulongwe wamukwasyi wesu alimwi iwakabelekede mulimo wamulangizi weendeenda, ndakamwaambila kuti: “Ba Grace bacili bana alimwi tabajisi luzyibo pe. Ndilomba kuti mundiyandawide muntu uukonzya kubayiisya.” Bakaingula kuti: “Kwiina bubi, nkwali mucizyi Edna Winkle, iwali mupainiya kwaciindi cilamfwu uukonzya kubagwasya.” Nokwakainda ciindi, ba Grace bakaamba boobu kujatikizya ba Edna: “Bakali kundigwasya kapati ciindi notwakali kukambauka kuŋanda aŋanda, bakalicizyi kwiingula mibuzyo, alimwi bakandiyiisya mbondikonzya kubaswiilila bamukamwini ŋanda kutegwa kandicikonzya kubona ciindi ceelede cakwaambaula. Bakandipa lugwasyo ndondakali kuyandika.”

Mebo aba Grace twakabelekela mumabazu obilo mucooko ca Iowa, kubikkilizya amasena aamucooko ca Minnesota a South Dakota. Kumane twakatumwa kuyakubelekela mu New York Circuit 1 (Bbazu 1),  lyalo ilyakali kubikkilizya a Brooklyn alimwi a Queens. Notwakali mubbazu eeli twakalimvwa kubula luzyibo alimwi eeci tatukacilubi pe. Bbazu eeli lyakali kubikkilizya a Mbungano ya Brooklyn Heights, iyakali kuswaanganina mu Ŋanda ya Bwami a Bbeteli alimwi kwakali bamukwasyi wa Bbeteli banji ibakajisi luzyibo lunji. Nondakamana kupa makani aangu aamulimo aakusaanguna, Mukwesu Nathan Knorr wakaboola kulindime akundaambila kuti: “Malcolm, watupa lulayo ndotweelede kubelesya, alimwi lulagwasya. Utalubi kuti, ikuti waalilwa kutugwasya kwiinda mukutupa lulayo calubomba, tokonzyi kuba amulimo kumbunga. Kozumanana amulimo mubotu.” Noyakamana miswaangano, ndakabaambila ba Grace makani aaya. Kumane, twakaunka muŋanda muluumu yesu yaa Bbeteli iyakali mujulu. Akaambo kakulibilika, twakalila.

Nokwakainda myezi misyoonto kuzwa leelyo, twakatambula lugwalo ilwakali kututamba kuunka kuyakunjila Cikolo ca Gileadi kkilasi yanamba 24, iyakali kuyakumanizya mu February 1955. Katutanaunka, bakatwaambilila limwi kuti lwiiyo lwesu tiilwakabambilidwe kutugwasya kuyakubeleka mulimo wabumisyinali pe. Muciindi caboobo, wakali kuyakutugwasya kubeleka kabotu mulimo wesu wakweendeenda. Kunjila cikolo eeci cakali coolwe cikkomanisya kapati alimwi cakatuyiisya kuba bantu balicesya.

Notwakamanizya cikolo eeci, twakatumwa kuyakubeleka mulimo wamucooko. Cooko ncotwakali kubelekela cakali kubikkilizya acooko ca Indiana, Michigan, alimwi Ohio. Mpoonya mu December 1955, twakatambula lugwalo kuzwa ku Mukwesu Knorr ilwakali kwaamba kuti: “Mutayoowi kwaamba mbomulimvwa, amundaambile masimpe. Naa muyanda kuboola kubelekela kokuno ku Bbeteli . . . naa muyanda kuunka kuyakubelekela kucisi cimbi kwaakwiinda ciindi kamuli a Bbeteli, amundaambile. Ikuti kamuyanda mulimo wacooko naa wabbazu, amundaambile.” Twakaingula kuti tulilibambilide kubeleka kufwumbwa mulimo ngotwapegwa kubeleka. Kakutanainda aciindi, twakaambilwa kuunka ku Bbeteli!

MYAKA IITAKALUBWI YAA BBETELI

Myaka iikkomanisya yamulimo wangu a Bbeteli ibikkilizya ciindi ncondakali kulanganya mulimo wakuyiisya mucisi ca United States coonse. Ndakali kutola lubazu mukugwasya bakwesu banji ibakali bana balo ibakazikupegwa mikuli milemu mumbunga ya Jehova. Mukuya kwaciindi, ndakazikuba mulembi wa Mukwesu Knorr muofesi iyakali kulanganya mulimo wakukambauka wanyika yoonse.

Ciindi ncondakabeleka mu Dipatimenti Yamulimo cakali kukkomanisya kapati. Mudipatimenti eeyi ndakali kubeleka amukwesu T. J. (Bud) Sullivan. Kwamyaka minji ngowakali mulangizi mudipatimenti eeyi. Pele kwakali abambi ibakandigwasya kapati. Mukwesu  Fred Rusk ngumwi wambabo, walo iwakapedwe mulimo wakundiyiisya. Ndiliyeeyede cimwi ciindi ndakamubuzya kuti: “Mukwesu Fred, nkaambo nzi magwalo ngondilemba ulaacinca-cinca munji?” Wakaseka, akwaamba kuti: “Malcolm, ikuti waamba cintu cimwi mulomo pande, ulakonzya kuyungizya majwi aambi kupandulula ncoamba, pele kuti walemba buya, kwaambisya ikuti kacizwa okuno, ceelede kuti kacisalede alimwi kacitakatazyi kumvwa.” Mpoonya calubomba wakaamba kuti: “Koba acamba—ucita kabotu, mukuya kwaciindi uyakucikonzya.”

Mboyakali kuyaabuya myaka katuli a Bbeteli, ba Grace bakali kupegwa milimo iindene-indene, kubikkilizya amulimo wakusalazya muŋanda, kulanganya maluumu aakoona. Bakali kuukkomanina mulimo. Kuzikusika asunu, ciindi notuswaangana abakwesu bamwi ibakali bana-bana eciya ciindi a Bbeteli, inga baambila ba Grace kumwi kabamweta-mweta, “Mwakandiyiisya kuyala bulo, bamaama bakakkomana amulimo ngomwakacita.” Ba Grace alimwi bakali kukkomana kubeleka mulimo mu Dipatimenti Iilanganya Mamagazini, mu Dipatimenti Iitambula Magwalo, alimwi amu Dipatimenti Iipanga Mateepu. Kubeleka milimo eeyi iindene-indene kwakabagwasya ba Grace kubona kuti ncoolwe alimwi ncilongezyo, tacikwe makani kufwumbwa ncotucita naa busena nkotubelekela mulimo mumbunga ya Jehova. Asunu mbobalimvwa oobo.

KUCINCA NKOTWAKACITA

Mumyaka yakuma 1975, twakatalika kubona kuti bazyali besu bakali kuyandika lugwasyo mbwaanga bakatalikide kucembaala. Mukuya kwaciindi, twakasala kucita cintu ciyumu. Tiitwakali kuyanda kuleka mulimo waa Bbeteli alimwi akusiya babelesima ba Jehova mbotwakali kuyanda kapati. Nokuba boobo, ndakalimvwa kuti wakali mukuli wangu wakulanganya bazyali besu. Aboobo, mukuya kwaciindi twakacileka mulimo waa Bbeteli katulangila kuti ikuti zyintu zyaba kabotu, tulakonzya kupiluka.

Kutegwa tujane mali aayandika, ndakatalika mulimo kukkampani yainsyuwalansi. Lyoonse inga ndilaayeeya majwi ngaakandaambila mupati wamulimo umwi ciindi nondakali kwiiya mulimo ooyu, wakati: “Mulimo ooyu uyeeme aakutuma mafooni kumazuba. Ndendilyo nokonzya kubabona bantu kuboola. Kunyina cintu ciyandika kapati kwiinda kunoojanika lyoonse kumazuba, akutuma mafooni.” Ndakaingula kuti, “Cakutadooneka, mwaamba boobo akaambo kaluzyibo ndomujisi, alimwi tandikonzyi kukazya pe. Nokuba boobo, ndilijisi mikuli imwi iijatikizya zyintu zyakumuuya alimwi lyoonse ndilaibikkila maano, alimwi buya tandikaleki pe. Ndinakutuma mafooni kumazuba, pele muli Bwabili alimwi amuli Bwane kumazuba, ndeelede kuunka kumiswaangano iiyandika kapati.” Jehova wakandilongezya ncobeni akaambo kakujanika kumiswaangano lyoonse muciindi cakucita mulimo wakumubili.

Ndiswe twakali kubalwazya bamaama kusikila ciindi nobakafwa kabali muŋanda mobalanganya bacembeede mu July 1987. Mupati wabamanesi wakaboola akwaambila ba Grace kuti: “Bamuka Allen, kamuya  kuŋanda mukapumune. Bantu boonse balizyi kuti ciindi coonse eeci ncobali kuciswa banyokozyala mwali kubalanganya. Mutapengi pe amizeezo.”

Mu December 1987, twakalembela alimwi kuti tukabelekele ku Bbeteli, busena mbotwakali kuyanda. Pele kwiinde buyo mazuba masyoonto, ba Grace bakajanwa akkansa yamumala. Nobakamana kwaandulwa akusilikwa, madokota akaamba kuti kkansa yabo yakalimanide. Nokuba boobo, aciindi eeco, twakatambula lugwalo kuzwa ku Bbeteli ilwakali kwaamba kuti twakeelede kuzumanana buyo kubelekela antoomwe ambungano yesu. Twakalikanzide kuzumanana amulimo wesu wa Bwami.

Mukuya kwaciindi, ndakajana mulimo mudolopo lya Texas. Mbwaanga kulakasaala mubusena oobo, twakasala kuti inga cabota kuti twaunka nkuko, nkubotu ncobeni. Okuno ku Texas, twali kulanganizyigwa abakwesu abacizyi ibabikkila maano kwamyaka iibalilwa ku 25 alimwi baba balongwe besu.

ZIIYO NZYOTWAIYA

Ba Grace balaciswa-ciswa bulwazi bwakkansa yamumala alimwi ayaagoyooyo, alimwi caino-ino bakatalika kuciswa kkansa yakunkolo. Nokuba boobo, tandina bamvwide kutongooka kujatikizya buyumuyumu bwabo naa kukazya njiisyo zyaamba busilutwe. Ziindi zinji balabuzyigwa kuti: “Ncinzi cipa kuti muzwidilile alimwi akuti kamuli banabukwetene bakkomene?” Inga bapa twaambo tone: “Tuli balongwe ncobeni. Abuzuba tulabandika. Toonse tulakukkomanina kuswaya katuli aantoomwe. Alimwi kuti twanyemezyanya, tatuunki kuyakoona katutanatalika kwaambauzyanya alimwi.” Cakutadooneka, ziindi zimwi tulanyemezyanya, pele tulalekelelana akuziluba—eeyi nzila ilagwasya ncobeni.

Kwiinda mumapenzi oonse aatusikila, kuli ziiyo zinji nzyotwaiya.

(1) Lyoonse amusyome Jehova akuzumina nzyazumizya. Tamweelede kusyoma maano aanu nobeni pe.—Tus. 3:5, 6; Jer. 17:7.

(2) Amusyome Jwi lya Jehova kutegwa mujane busolozi, tacikwe makani naa nkaambo nzi. Kumvwida Jehova amilawo yakwe kulayandika kapati. Kuli buyo zyintu zyobilo nzyomweelede kusala—kumumvwida naa pe.—Lom. 6:16; Heb. 4:12.

(3) Kuli cintu comwe ciyandika kapati mubuumi—kuba aazyina bbotu a Jehova. Amubikke nzyayanda mubusena bwakusaanguna, kutali kuyandaula zyintu zyakumubili.—Tus. 28:20; Muk. 7:1; Mt. 6:33, 34.

(4) Amupaile kutegwa kamuyaambele akuba basungu mumulimo wa Jehova kusikila mpomugolela. Amubikkile maano kuzyintu nzyomukonzya kucita, kutali kuzyintu nzyomutakonzyi kucita.—Mt. 22:37; 2 Ti. 4:2.

(5) Amuzyibe kuti kunyina mbunga imbi njalongezya Jehova akukkomanina.—Joh. 6:68.

Mebo aba Grace umwi aumwi wesu wabelekela Jehova myaka iinda ku 75, mpoonya katuli banabukwetene, twamubelekela myaka iitandila ku 65. Ncintu cikkomanisya kapati kubelekela Jehova myaka yoonse eeyi yainda. Ncotupailila ncakuti bakwesu alimwi abacizyi abalo babone mbobukkomanisya buumi ikuti mwasyoma Jehova.

[Cifwanikiso icili apeeji 17]

[Cifwanikiso icili apeeji 18]

Kuzwa kulumwensi: Nathan Knorr, Malcolm Allen, Fred Rusk, Lyle Reusch, Andrew Wagner

Majwi aakwelelezya sikubala aali apeej 18]

“Ikuti waalilwa kutugwasya kwiinda mukutupa lulayo calubomba, tokonzyi kuba amulimo kumbunga. Kozumanana amulimo mubotu”

[Cifwanikiso icili apeeji 19]

Atala: Ba Fern aba George Couch antoomwe aba Grace andime kucikolo ca Gileadi, mu 1954

[Cifwanikiso icili apeeji 19]

Ansi: Ciindi nondakali kubelekela mu Dipatimenti Yamulimo, mu 1956

[Majwi aakwelelezya sikubala aali apeeji 20]

“Lyoonse amusyome Jehova akuzumina nzyazumizya”

[Cifwanikiso icili apeeji 20]