ADADA na amama ŵakasangana mu 1919 pa ungano wa Ŵasambiri ŵa Baibolo mu Cedar Point, Ohio, U.S.A. Ŵakatorana mu caka cenecici. Ine nkhababika mu 1922, ndipo munung’una wane, Paul, wakababika pakati pajumpha vyaka viŵiri. Muwoli wane, Grace, wakababika mu 1930. Ŵapapi ŵake, Roy na Ruth Howell, ŵakalereka na ŵapapi awo ŵakaŵa Ŵasambiri ŵa Baibolo, ndipo agogo ŵake aŵa ŵakaŵa ŵabwezi ŵa Mubali Charles Taze Russell.

Grace na ine tikamanyana mu 1947, ndipo tikatorana pa Julayi 16, 1949. Pambere tindatorane tikadumbiskana ivyo ticitenge munthazi. Tikadumura kuti ticitenge uteŵeti wanyengozose ndipo tiŵenge na ŵana yayi. Pa Okutobala 1, 1950, tikamba kucita upayiniya. Ndipo mu 1952, tikapempheka kuti ticite uteŵeti wa kulaŵilira dera.

Tose tikawonanga kuti tikukhumbikwira wovwiri kuti ticite makora uteŵeti uphya uwu. Ine nkhasambira vinandi ku ŵabali awo ŵakaŵa kuti ŵateŵetera kwa nyengo yitali, ndipo Grace nayo nkhamupenjera wovwiri. Nkhafumba Marvin Holien, mubwezi wane, mweneuyo wakaŵa kuti wacita uteŵeti wa kwendakwenda kwa nyengo yitali, kuti: “Grace wakumanya vinandi yayi. Kasi ukumanyapo mudumbu uyo wangateŵetera nayo kuti wasambire vinandi mu uteŵeti?” Iyo wakazgora kuti: “Enya. Edna Winkle ni mupayiniya waluso ndipo wangamovwira comene.” Nyengo yikati yajumphapo, Grace wakayowoya vya Edna kuti: “Wakanovwira kuti niŵenge wakufwatuka pa nyumba za ŵanthu, wakamanyanga umo wangazgolera munthu uyo wakususka, ndipo wakanisambizga kuti nitegherezgenge mwakuti nimanyenge ivyo ningayowoya. Mudumbu uyu wakanovwira comene.”

Ine na Grace tikateŵetera mu madera ghaŵiri gha mu Iowa, pamoza na vigaŵa vinyake vya Minnesota na South Dakota. Kufuma apo, tikateŵetera mu Dera la New York 1, umo mukaŵaso tawuni ya Brooklyn na ya Queens. Tizamuluwapo yayi umo tikajipulikira mu dera ili. Tikajiwonanga kuti tikumanya vicoko comene. Mu dera ili mukaŵa Mpingo wa Brooklyn Heights, uwo  ukawungananga mu Nyumba ya Ufumu ya pa Beteli ndipo ukaŵa na ŵabali ŵanandi ŵa pa Beteli awo ŵakaŵa kuti ŵateŵetera kwa nyengo yitali. Nati nadumba nkhani yane yakwamba ya uteŵeti, Mubali Nathan Knorr wakiza na kuniphalira kuti: “Malcolm, watipa ulongozgi uwemi wakuti tigwilirepo nchito, ndipo wanguŵa wakwenelera. Kuluwa yayi kuti usange ukutipa yayi ulongozgi mwacitemwa, ndikuti uli wakuzirwa pacoko mu gulu la Yehova. Lutilira kucita makora.” Ungano ukati wamara, nkhaphalira Grace nkhani iyi. Kufuma apo, tikaluta mu cipinda ico tikafikiramo pa Beteli. Cifukwa ca kufipa mtima comene, tikamba kulira.

Pakati pajumpha myezi yicoko waka, tikapokera kalata yakutimanyiska kuti tikasambire Sukulu ya Giliyadi mu kilasi la nambara 24. Kilasi ili likeneranga kumara mu Febuluwale 1955. Pambere tindalute, tikaphalirika kuti tamusambira sukulu iyi kuti tilute ku umishonale yayi. Kweni kuti ticitenge makora uteŵeti wa kwendakwenda. Masambiro agha ghakaŵa ghakukondweska comene, kweniso ghakatovwira kuti tiŵe ŵakujiyuyura.

Tikati tamalizga masambiro agha, tikapempheka kuti tikacite uteŵeti wa kulaŵilira cigaŵa. Cigaŵa cithu cikaŵa Indiana, Michigan, na Ohio. Nyengo yikati yajumphapo, mu Disembala 1955, tikapokera kalata kufuma kwa Mubali Knorr iyo yikati: “Longosorani mwakufwatuka, ndipo niphalirani maghanoghano ghinu. Niphalirani usange mungatemwa kuteŵetera pa Beteli . . . panji usange mungatemwa kukateŵetera ku caru cinyake para mwateŵeterapo pa Beteli. Usange mukukhumba kulutilira mu uteŵeti wa kwendakwenda, napo mungayowoya.” Tikazgora kuti tingatemwa kucita uteŵeti uliwose uwo tingapika. Nyengo yeneyiyo, tikaphalirika kuti tilute ku Beteli.

Mu vyaka ivyo nkhateŵetera pa Beteli, nkhapikapo uteŵeti wa kudumba nkhani mu mipingo, pa maungano gha dera na gha cigaŵa mu United States. Nkhawovwirapo ŵabali ŵanandi ŵaciwukirano awo nyengo yikati yajumphapo ŵakamba kucita milimo yikuru mu gulu la Yehova. Nyengo yikati yajumphapo, nkhaŵa mulembi wa Mubali Knorr mu ofesi iyo yikanozganga mulimo wa kupharazga pa caru cose.

Vyaka ivyo nkhateŵetera mu Dipatimenti ya Uteŵeti vikaŵa vyakukondweska comene. Mu dipatimenti iyi nkhateŵeterapo na T. J. (Bud) Sullivan. Iyo wakaŵa kuti walaŵilira dipatimenti iyi kwa vyaka vinandi. Kweni pakaŵaso ŵanyake awo ŵakanisambizga vinandi. Yumoza wawo wakaŵa Fred Rusk. Mubali uyu ndiyo wakatumika kuti wanisambizge uteŵeti. Na kunweka nkhamufumba kuti:  “Fred, cifukwa wuli ukusintha vinthu vinandi mu makalata ghanyake agho nkhulemba?” Wakaseka, na kusazgirapo kuti, “Malcolm, para ukuyowoya cinthu, cingalongosorekaso mu nthowa yinyake, kweni para ukulemba cinthu, comenecomene para nchakufuma kuno, cikwenera kuŵa caunenesko.” Wakati wayowoya nthena, mwalusungu wakati: “Khwima mtima, ukucita makora, ndipo kunthazi ucitenge makora comene.”

Kwa vyaka vinandi pa Beteli, Grace wakacita mauteŵeti ghanandi, nga ngwa kutozga vipinda vya ŵanthu ŵa pa Beteli. Wakawutemwanga comene uteŵeti uwu. Ndipo mazuŵa ghano, para takumana na ŵabali awo ŵakaŵa ŵawukirano pa Beteli mu vyaka ivyo, ŵakuphalira Grace uku ŵakumwemwetera, ŵakuti, “Mukanisambizga kutandika bedi, nakuti amama vikaŵakondweska comene.” Kweniso Grace wakateŵeterapo mu Dipatimenti ya Magazini, Yakuzgora Mafumbo na Yakujambura Matepi. Mauteŵeti ghose agha ghakamovwira kuwona kuti uteŵeti uliwose uwo tingacita ndiposo malo ghalighose agho tingateŵeterako mu gulu la Yehova, ni mwaŵi kweniso ni thumbiko. Wacali kuwona nthena mpaka lero.

Mu vyaka vya m’ma 1970, tikawona kuti ŵapapi ŵithu awo ŵakaŵa ŵacekuru comene ŵakakhumbikwiranga wovwiri ukuru. Pakati pajumpha nyengo, tikacita cinthu cakusuzga comene. Tikakhumba yayi kuleka uteŵeti wa pa Beteli na ŵateŵeti ŵa Yehova ŵanyithu awo tikaŵatemwanga comene. Ndipouli, nkhawona kuti ni udindo wane kupwelelera ŵapapi. Ntheura, nyengo yikati yajumphapo, tikalayira pa Beteli, kweni tikaŵa na cigomezgo cakuti tingakaweraso para vinthu vyaŵa makora.

Kuti tisange vyakukhumbikwa pa umoyo, nkhayamba nchito ya kusaska mainshuwalansi. Nyengo zose nkhukumbuka mazgu agho wakaniphalira bwana munyake apo nkhasambiranga nchito iyi, wakati: “Nchito iyi yikukhumba kuti munthu wasaskenge mainshuwalansi ku nyumba za ŵanthu mise cifukwa ndipo ŵakusangika panyumba zawo. Palije cinthu cinyake cakuzirwa kuluska kuluta ku nyumba zawo mise.” Ine nkhazgora kuti: “Nkhumanya kuti mukuyowoya ivi cifukwa cakuti ndivyo mwacita kwa nyengo yitali, ndipo pa cifukwa ici nkhumuwongani comene. Kweni ine niliso na milimo yinyake yauzimu iyo nindalekepo kucita, ndipo nilije maghanoghano gha kuleka. Nizamulutanga ku nyumba za ŵanthu mise pa mazuŵa ghanyake, kweni pa Ciŵiri na pa Cinayi, nkhwenera kuluta ku maungano ghakuzirwa comene.” Yehova wakanitumbika cifukwa cakuti nkhalekapo cara kuluta ku maungano cifukwa ca nchito.

Apo amama ŵakafwira mu Julayi 1987 ku malo ghakusungirako ŵacekuru, ise tikaŵapo. Mulara wa manesi wakaphalira Grace kuti: “Lutani ku nyumba mukapumure. Waliyose wakumanya kuti mwacita vyose vyakukhumbikwa pakupwelelera amamavyara ŵinu.”

 Mu Disembala 1987 tikalemba mafomu, kupempha kuti tiluteso ku Beteli, malo agho tikaghatemwanga comene. Kweni pakati pajumpha mazuŵa ghacoko waka, Grace wakalwara nthenda ya kansa ya mu matumbo. Ŵakati ŵamucita opareshoni, wakacira. Kweni pa nyengo iyi, tikapokera kalata yakufuma ku Beteli, yakutimanyiska kuti nchiwemi kuti tilutilire kuteŵetera mu mpingo withu. Tikaŵikapo mtima kucita milimo ya Ufumu.

Nyengo yikati yajumphapo, nkhasanga nchito mu Texas. Tikawonanga kuti malo ghakuthukira agha ghamuŵa ghawemi kwa ise, ndipo ndimo vyaŵira nadi. Kwa vyaka 25 kuno ku Texas, ŵabali na ŵadumbu awo tikukhala nawo ŵakutitemwa comene.

Kwa vyaka vinandi, Grace wasuzgikapo na kansa ya mu matumbo, ya pasingo, na ya pa bele. Kweni wandadandawurepo na umoyo wambura kukhumba vinandi. Wakunipulikira nyengo zose na kunicindika pakuŵa mutu wa mbumba. Kanandi ŵanji ŵakumufumba kuti: “Kasi mwaŵanyithu mukucita wuli kuti mbumba yinu yiŵenge yacimwemwe?” Wakuyowoya vifukwa vinayi ivi: “Ine na afumu ŵane mphaubwezi. Tikudumbiskana kanandi waka zuŵa lililose. Tikutemwa kucezgera lumoza zuŵa lililose. Kweniso para takwiyiskana tikudumbiskana pambere tindagone.” Nangauli nyengo zinyake tikubudirana, kweni tikugowokerana, ndipo ici cikovwira comene.

Mu masuzgo ghose agho tasangana nagho, tasambira masambiro ghawemi agha:

1. Nyengo zose tikwenera kweghama kwa Yehova, na kukolerana na ivyo Yehova wazomerezga. Tingeghamanga ku umanyi withu yayi.—Zinth. 3:5, 6; Yer. 17:7.

2. Thembani ulongozgi wa mu Mazgu gha Yehova, nanga mungakumana na suzgo wuli. Nchakuzirwa comene kupulikira Yehova na malango ghake. Vingacitika yayi kuti munthu wacite vyose viŵiri. Wangaŵa wakupulikira panji wambura kupulikira.—Rom. 6:16; Heb. 4:12.

3. Pa umoyo pali cinthu cimoza cakuzirwa. Cinthu ici nkhuŵa paubwezi na Yehova. Ŵikani pakwamba vinthu vya Ufumu, kupenja usambazi yayi.—Zinth. 28:20; Muph. 7:1; Mat. 6:33, 34.

4. Lombani kuti muŵe ŵamwamphu pakuteŵetera Yehova. Ŵikani mahara pa ivyo mungafiska, pa ivyo mungatondeka kufiska yayi.—Mat. 22:37; 2 Tim. 4:2.

5. ) Manyani kuti palije gulu linyake ilo lili na vitumbiko vya Yehova kweniso ilo wakulitemwa.—Yoh. 6:68.

Ine na Grace, tateŵetera Yehova vyaka vyakujumpha 75, ndipo mu nthengwa tamuteŵetera vyaka pafupifupi 65. Nadi, cikaŵa cakukondweska comene kuteŵetera Yehova vyaka vyose ivi. Tikulomba kuti ŵabali na ŵadumbu ŵithu wose nawo ŵawone umo umoyo ukuŵira wacandulo para wamunthu ukweghama kwa Yehova.