Plọnnu sọn Odẹ̀ He Yin Awuwlena Ganji de Mẹ
Plọnnu sọn Odẹ̀ He Yin Awuwlena Ganji de Mẹ
“Donanọ oyín gigonọ towe yin.”—NẸH. 9:5.
BE HIẸ SỌGAN NA GBLỌNDO YA?
Onú dagbe tẹlẹ wẹ Islaelivi lẹ wà to whenue Levinu lẹ pli yé dopọ?
Nujijọ titengbe tẹwẹ dohia dọ Jiwheyẹwhe nọ yinuwa sọgbe hẹ zẹẹmẹ yinkọ etọn tọn?
Etẹlẹ wẹ mí plọn sọn odẹ̀ he Levinu lẹ hò mẹ?
1. Opli omẹ Jiwheyẹwhe tọn lẹ tọn tẹwẹ mí na gbadopọnna, podọ kanbiọ tẹlẹ wẹ mí na mọ gblọndo na?
“MÌ FỌ́N tite bo dona OKLUNỌ Jiwheyẹwhe mìtọn sọn madopodo jẹ madopodo.” Hogbe he whànmẹ enẹlẹ wẹ Levinu lẹ yizan to hohowhenu nado basi oylọna omẹ Jiwheyẹwhe tọn he pli dopọ lẹ nado kọnawudopọ hẹ yé to odẹ̀ mẹ, podọ odẹ̀ ehe yin dopo to odẹ̀ he dite hugan to Biblu mẹ lẹ mẹ. (Nẹh. 9:4, 5) Jelusalẹm wẹ yé pli dopọ te to 455 J.W.M. to azán 24tọ osun Tishri tọn (septembre/octobre), yèdọ osun ṣinawetọ to sunzanhiawe Ju lẹ tọn mẹ. Dile mí na to dogbapọnna nujijọ voovo he wá aimẹ jẹnukọnna azán vonọtaun enẹ, kanse dewe dọ, ‘Aṣa dagbe tẹwẹ zọ́n bọ plidopọ enẹ do tindo kọdetọn dagbe? Nudevo tẹlẹ wẹ mí sọgan plọn sọn odẹ̀ he yin awuwlena ganji ehe mẹ?’—Ps. 141:2.
OSUN VONỌTAUN DE
2. Apajlẹ dagbe tẹwẹ Islaelivi lẹ zedai na mí to plidopọ he yé basi to whenue yé vọ́ adó Jelusalẹm tọn lẹ do godo?
2 Osun dopo jẹnukọnna plidopọ enẹ, Ju lẹ dotana adó Jelusalẹm tọn lẹ vivọ́ do. (Nẹh. 6:15) Azán 52 poun wẹ omẹ Jiwheyẹwhe tọn lẹ yizan nado dotana azọ́n lọ, podọ to enẹgodo, yé jẹ ayidonugo vonọtaun na nuhudo gbigbọmẹ tọn yetọn lẹ ji. Enẹwutu, to azán tintan osun yọyọ lọ, Tishri tọn gbè, yé pli dopọ to nọtẹn gbigblo de mẹ nado dotoai dile Ẹzla po Levinu devo lẹ po to Osẹ́n Jiwheyẹwhe tọn hia bo to zẹẹmẹ basi deji. (Yẹdide 1) Whẹndo lẹ, gọna mẹhe “sọgan yí wuntuntun do sè lẹpo,” ṣite bo dotoai “sọn afọnnu fliflimẹ kakajẹ okle daa.” Apajlẹ dagbe nankọ die na míwlẹ he nọ yì opli lẹ to egbehe to Plitẹnhọ Ahọluduta lọ tọn dagbe lẹ mẹ! Etomọṣo to opli lẹ whenu, be ayiha towe nọ jẹ dindanpe ji to whedelẹnu bọ a nọ jẹ nulẹnpọn do numadinu lẹ ji wẹ ya? Eyin mọ wẹ, vọ́ nulẹnpọn do apajlẹ Islaelivi hohowhenu tọn enẹlẹ tọn ji, mẹhe dotoaina nuhe yé sè lẹ podọ enẹ yinuwado yé ji sọmọ bọ yé jẹ avivi ji, na taidi akọta de yé gboawupo nado yìn Osẹ́n Jiwheyẹwhe tọn lẹ.—Nẹh. 8:1-9.
3. Anademẹ tẹwẹ Islaelivi lẹ setonuna?
3 Ṣigba, e ma yin ojlẹ ehe mẹ wẹ yé na yigbe ylando yetọn lẹ tọn te to gbangba. To whenuena e yindọ azán hùnwhẹ tọn de wẹ, e dona yin ojlẹ ayajẹ tọn de to sinsẹ̀n-bibasi Jehovah tọn mẹ. (Yẹdide 2) (Sọh. 29:1) Enẹwutu, Nẹhemia dọna gbẹtọ lọ lẹ dọmọ: “Mì yì, dù ojó lọ, bosọ nù vivi lọ, bosọ do mimá lẹ hlan ewọ he yè ma wleawu nude tọn na: na azán he wiwe wẹ hlan OKLUNỌ mítọn: mì sọ yin adinọ blo; na ayajẹ OKLUNỌ tọn wẹ huhlọn mìtọn.” Gbẹtọ lọ lẹ jẹna pipà, na yé setonuna anademẹ enẹ, podọ azán enẹ dekọtọn do “ajògidi daho” mẹ.—Nẹh. 8:10-12.
4. Etẹwẹ tatọ́ whẹndo tọn lẹ to Islaeli wà, podọ adà titengbe Hùnwhẹ Gòhọtúntún lọ tọn tẹ go wẹ yé doayi?
4 To wunkẹngbe, tatọ́ whẹndo tọn lẹ pli dopọ nado dewé gando lehe akọta lọ sọgan yinuwa sọgbe hẹ Osẹ́n Jiwheyẹwhe tọn lẹ pẹkipẹki do go. (Yẹdide 3) Na yé nọ gbadopọnna Owe-wiwe lẹ wutu, yé doayi e go dọ Hùnwhẹ Gòhọtúntún tọn po opli ayidego tọn he nọ dotana ẹn po dona yin bibasi to osun Tishri tọn mẹ bẹsọn azán 15tọ jẹ 22tọ gbè, enẹwutu yé jẹ awuwle ji. (Yẹdide 4) Sọn azán Jọṣua tọn lẹ gbè, Hùnwhẹ Gòhọtúntún tọn ehe wẹ tindo kọdetọn dagbe hugan, podọ e dekọtọn do “ayajẹ daho” mẹ. Adà titengbe hùnwhẹ enẹ tọn wẹ nado nọ hia Osẹ́n Jiwheyẹwhe tọn na mẹlẹpo ‘egbesọegbesọ, sọn azán tintan gbè jẹ azán godo tọn gbè.’—Nẹh. 8:13-18.
AZÁN GBEYINA YLANDO LẸ TỌN DE
5. Etẹwẹ omẹ Jehovah tọn lẹ wà whẹpo Levinu lẹ do nọ nukọnna yé to odẹ̀ mẹ?
5 To azán awe godo, ojlẹ lọ sọ̀ na Islaelivi lẹ nado yigbe ylando yetọn tọn to gbangba, na yé gboawupo nado yìn Osẹ́n Jiwheyẹwhe tọn wutu. E ma yin azán agọ́wiwa tọn de na omẹ Jiwheyẹwhe tọn lẹ. Kakatimọ, yé blanù bo do odẹ́vọ̀ lẹ, ehe dohia dọ yé tin to aluẹmẹ. Osẹ́n Jiwheyẹwhe tọn yin hihia whladopo dogọ na gbẹtọ lọ lẹ na nudi gànhiho atọ̀n to afọnnu. To whèmẹ, “yé yigbena, bo litaina OKLUNỌ Jiwheyẹwhe yetọn.” (Yẹdide 5) Enẹgodo, Levinu lẹ nọ nukọnna gbẹtọ lọ lẹ to odẹ̀ he yé wleawuna ganji de mẹ. (Yẹdide 6)—Nẹh. 9:1-4.
6. Etẹwẹ gọalọna Levinu lẹ nado hodẹ̀ sisosiso de, podọ etẹwẹ enẹ plọn mí?
6 Matin ayihaawe, Osẹ́n Jiwheyẹwhe tọn hihia to gbesisọ mẹ wẹ na ko gọalọna Levinu lẹ nado wleawuna odẹ̀ sisosiso ehe. Adà tintan odẹ̀ lọ tọn zinnudo azọ́n po jẹhẹnu Jehovah tọn lẹ po ji. To adà odẹ̀ lọ tọn he pò mẹ, Levinu lẹ zinnudo “lẹblanu” mayọnjlẹ Jiwheyẹwhe tọn ji pludopludo bo kẹalọyi dọ Islaelivi lẹ ma jẹna nuyiwahẹmẹ homẹdagbe tọn mọnkọtọn. (Nẹh. 9:19, 27, 28, 31) Taidi Levinu enẹlẹ, eyin mílọsu na penugo nado nọ hodẹ̀ sisosiso sọn ahun mẹ hlan Jehovah, mí dona nọ lẹnayihamẹpọn egbesọegbesọ do Ohó Jiwheyẹwhe tọn ji bo nọ na dotẹnmẹ Jehovah nado dọhona mí whẹpo mí nido hodẹ̀ hlan ẹn.—Ps. 1:1, 2.
7. Etẹwẹ Levinu lẹ biọ Jiwheyẹwhe, podọ etẹwẹ enẹ plọn mí?
7 Onú dopo gee wẹ Levinu lẹ biọ to odẹ̀ lọ mẹ. Obiọ ehe tin to wefọ 32tọ mẹ, ehe hia dọmọ: “Enẹwutu dinvie, Jiwheyẹwhe mítọn, daho lọ, huhlọnnọ lọ, Jiwheyẹwhe dobu lọ, mẹhe nọ yìn alẹnu po lẹblanu po, a dike tuklajẹ lẹpo sọawuhia pẹvi to nukọn towe blo, he ko wá mí ji, to ahọlu mítọn lẹ go, to ahọvi mítọn lẹ go, podọ to yẹwhenọ mítọn lẹ go, podọ to yẹwhegán mítọn lẹ go, podọ to otọ́ mítọn lẹ go, podọ to omẹ towe lẹpo go, sọn ojlẹ ahọlu Asilia tọn lẹ tọn mẹ gbọ́n jẹ azán he gbè.” Gbọnmọ dali, Levinu lẹ ze apajlẹ dagbe dai na mí nado nọ pà Jehovah bo nọ dopẹna ẹn whẹpo do biọ ẹ nudepope to odẹ̀ mítọn lẹ mẹ.
YÉ PAGIGONA YINKỌ JIWHEYẸWHE TỌN
8, 9. (a) Nawẹ Levinu lẹ do whiwhẹ hia to bẹjẹeji odẹ̀ yetọn tọn gbọn? (b) Awhànpa olọn tọn awe tẹlẹ wẹ Levinu lẹ na ko to alọdlẹndo?
8 Dile etlẹ yindọ Levinu enẹlẹ wleawuna odẹ̀ yetọn ganji, yé do whiwhẹ hia bo mọdọ hogbe yetọn lẹ ma sọgan do pipà he Jehovah jẹna nugbonugbo hia to gigọ́ mẹ. Enẹwutu, yé hodẹ̀ do ota Islaelivi lẹ tọn mẹ bo yí whiwhẹ do vẹ̀ Jehovah dọmọ: “Donanọ oyín gigonọ towe yin, he yè zedaga hugan dona po pipá lẹpo po.”—Nẹh. 9:5.
9 Odẹ̀ lọ zindonukọn dọmọ: “Hiẹ wẹ OKLUNỌ, yèdọ hiẹ ṣokẹdẹ; hiẹ wẹ basi olọn, olọn olọn lẹ tọn, po awhànpa yetọn lẹpo po, aigba po nuhe tin to e ji lẹpo po, ohù lẹ po ehe tin to yé mẹ lẹpo po, hiẹ sọ to yemẹpo hlá dai; awhànpa olọn tọn sọ to taliaina we.” (Nẹh. 9:6) Na nugbo tọn, Jehovah Jiwheyẹwhe wẹ dá wẹkẹ lọ blebu, ehe bẹ bẹplidopọ sunwhlẹvu tọn madosọha lẹ hẹn. Nuhe sọ jiawu wẹ yindọ e dá onú lẹpo to aigba whanpẹnọ mítọn ji, bo na ẹn nugopipe nado hẹn pekọ wá na nuhudo nutogbẹ̀ wunmẹwunmẹ lẹpo tọn, podọ nutogbẹ̀ dopodopo nọ jivi sọgbe hẹ wunmẹ etọn. Angẹli wiwe Jiwheyẹwhe tọn lẹ he sọgan sọ yin yiylọdọ “awhànpa olọn tọn” lẹ yin kunnudetọ onú ehe lẹpo tọn. (1 Ahọ. 22:19; Job 38:4, 7) Humọ, angẹli lẹ nọ yí whiwhẹ do wà ojlo Jiwheyẹwhe tọn to whenue yé nọ yilizọn na gbẹtọvi ylandonọ he “na wá dugu whlẹngán tọn lẹ.” (Heb. 1:14) Apajlẹ dagbe nankọ die angẹli lẹ zedai na mí nado hodo dile mí to Jehovah sẹ̀n to kọndopọ mẹ taidi awhànpa he yin azọ́nplọn ganji de!—1 Kọl. 14:33, 40.
10. Etẹwẹ mí plọn sọn aliho he mẹ Jiwheyẹwhe yinuwa hẹ Ablaham te mẹ?
10 Enẹgodo, Levinu lẹ zinnudo aliho he mẹ Jiwheyẹwhe yinuwa hẹ Ablam te ji, mẹhe tindo owhe 99 bọ asi etọn Salai ma ko jivi depope. Podọ to ojlẹ enẹ mẹ, Jehovah diọ yinkọ etọn zun Ablaham, ehe zẹẹmẹdo “otọ́ agun daho” tọn. (Gẹn. 17:1-6, 15, 16) Jiwheyẹwhe sọ dopagbe na Ablaham dọ kúnkan etọn na dugu aigba Kenani tọn. Gbẹtọvi lẹ nọ saba wọn opagbe he yé do lẹ, ṣigba e ma yinmọ na Jehovah. Levinu lẹ dọ to odẹ̀ yetọn mẹ dọmọ: ‘Hiẹ wẹ OKLUNỌ Jiwheyẹwhe lọ, mẹhe de Ablam, bosọ hẹn ẹn tọ́n sọn Uli Kaldeanu lẹ tọn mẹ, bo na ẹn oyín Ablaham tọn; bosọ mọ ayiha nugbonọ etọn to nukọn towe, bosọ basi alẹnu de po e po nado yí aigba Kananinu lẹ tọn na ẹn, yèdọ nado yí i na okún etọn, bo ko sọ yí ohó towe lẹ basi; na dodonọ wẹ hiẹ.’ (Nẹh. 9:7, 8) Mì gbọ mílọsu ni nọ dovivẹnu to whelẹponu nado nọ yin nugbonọ na nuhe mí dọ lẹ nado hodo apajlẹ Jiwheyẹwhe dodonọ mítọn tọn.—Mat. 5:37.
YÉ ZINNUDO NUHE JEHOVAH WÀ LẸ JI
11, 12. Etẹwẹ yinkọ Jehovah tọn zẹẹmẹdo, podọ nawẹ ewọ do ehe hia to nuyiwa etọn hẹ kúnkan Ablaham tọn mẹ gbọn?
11 Yinkọ Jehovah tọn zẹẹmẹdo “E nọ hẹn nado lẹzun,” ehe dohia dọ Jiwheyẹwhe nọ ze afọdide debọdo-dego nado hẹn opagbe etọn lẹ di. Ehe họnwun hezeheze to aliho he mẹ Jiwheyẹwhe yinuwa hẹ kúnkan Ablaham tọn te to whenue yé yin kanlinmọ to Egipti. To ojlẹ enẹ mẹ, e taidi nuhe ma yọnbasi dọ akọta lọ blebu ni yin tuntundote bo yì Aigba Pagbe tọn lọ ji. Etomọṣo, Jiwheyẹwhe yinuwa to aliho debọdo-dego tọn mẹ nado hẹn opagbe etọn di bo gbọnmọ dali dohia dọ ewọ jẹna yinkọ vonọtaun podọ gigonọ lọ, Jehovah.
12 Odẹ̀ he Nẹhemia basi kandai etọn lọ dọ gando Jehovah go dọmọ: “Hiẹ sọ mọ nukunbibia otọ́ mítọn lẹ tọn to Egipti mẹ, bosọ sè awhá yetọn to Ohù Vẹẹ lọ dali; bo do ohia lẹ hia po nujiawu lẹ po to Falo ji, podọ to mẹmẹsi etọn lẹpo go, podọ to gbẹtọ aigba etọn tọn lẹpo go; na hiẹ yọnẹn dọ yé yí sakla do zan hẹ yé; bosọ tindo oyín de na we, dile e te to azán he gbè. Podọ hiẹ sọ klan ohù to yé nukọn, sọmọ bọ yé gbọn gblagbla ohù lọ tọn mẹ yì to aigba húhú ji, podọ mọ́donamẹtọ yetọn lẹ wẹ hiẹ fọ̀ dlan osẹ́dò lẹ mẹ, di zannu de do osin huhlọnnọ lẹ mẹ.” Enẹgodo, odẹ̀ lọ zindonukọn bo donù nudevo he Jehovah wà do omẹ etọn lẹ tamẹ go dọmọ: “Hiẹ sọ hò whiwhẹ tòmẹnu aigba lọ tọn lẹ to yé nukọn, Kananinu lẹ lọ . . . Yé sọ yí tòdaho dokọnọ lẹ, po aigba ojonọ de po, bosọ tindo ohọ̀ lẹ gigọ́ na onú dagbe lẹpo, odla kùnkùn lẹ, vẹngle lẹ, po olivieli-gle lẹ po, po atin sinsẹ́nnọ lẹ po to gege mẹ: mọ wẹ yé dù, bosọ yin gigọ́nọ, bosọ lẹzun ojonọ, bo na homẹhun yede to dagbewà towe daho mẹ.”—Nẹh. 9:9-11, 24, 25.
13. Nawẹ Jehovah hẹn pekọ wá na nuhudo gbigbọmẹ tọn Islaelivi lẹ tọn gbọn, ṣigba nawẹ yé yinuwa gbọn?
13 Jiwheyẹwhe sọ ze afọdide debọdo-dego susu devo lẹ nado hẹn lẹndai etọn di. Di apajlẹ, tlolo he Islaelivi lẹ tọ́n sọn Egipti, Jehovah hẹn pekọ wá na nuhudo gbigbọmẹ tọn yetọn lẹ. Levinu lọ lẹ flin to odẹ̀ yetọn mẹ dọ Jiwheyẹwhe “jẹte wá Osó Sinai ji ga, bosọ dọho po yé po sọn olọn mẹ, bosọ na whẹdida jijlọ lẹ yé po osẹ́n nugbo lẹ po, osẹ́ndoai dagbe lẹ po gbedide lẹ po.” (Nẹh. 9:13) Jehovah tẹnpọn nado plọnnu omẹ etọn lẹ na yé nido pegan nado tindo yinkọ etọn to ota to whenue yé na dugu Aigba Pagbe tọn, ṣigba yé gbẹ́ onú dagbe he yé plọn lẹ dai.—Hia Nẹhemia 9:16-18.
ISLAELIVI LẸ TINDO NUHUDO MẸPLỌNLỌ TỌN
14, 15. (a) Nawẹ Jehovah gbọn lẹblanu dali penukundo akọta ylandonọ etọn go gbọn? (b) Etẹwẹ mí plọn sọn aliho he mẹ Jiwheyẹwhe yinuwa hẹ akọta dide etọn te mẹ?
14 Odẹ̀ Levinu lẹ tọn donù ylando awe he Islaelivi lẹ wà tlolo he yé dopà nado setonuna Osẹ́n Jiwheyẹwhe tọn to Osó Sinai kọ̀n go. Na ylando enẹlẹ wutu, yé jẹna okú. Ṣigba, Levinu lẹ pà Jehovah to odẹ̀ lọ mẹ dọmọ: “Hiẹ to lẹblanu yẹndawe towe lẹ mẹ ma gbẹ́ yé dai to zungbo lọ mẹ gba. . . . Owhe kande wẹ hiẹ do yìn yé . . . yé masọ ba nude pò; avọ̀ yetọn lẹ ma dohó, podọ afọ yetọn lẹ masọ jí.” (Nẹh. 9:19, 21) To egbehe, Jehovah nọ wleawu nuhe mí tindo nuhudo etọn nado sẹ̀n ẹn po nugbonọ-yinyin po lẹpo tọn na mí. Mì dike mí yinuwa taidi Islaelivi fọtọ́n susu he kú to zungbo mẹ na tolivivẹ po yise matindo yetọn po wutu pọ́n gbede blo. Na nugbo tọn, onú enẹlẹ “yin kinkandai taidi avase de na míwlẹ, mẹhe ji opodo titonu lẹ tọn ko wá.”—1 Kọl. 10:1-11.
15 E blawu dọ to whenue Islaelivi lẹ dugu Aigba Pagbe tọn lọ godo, yé kẹalọyi sinsẹ̀n-bibasi he gblezọn bo gọ́ na mẹhuhu he Kenaninu lẹ nọ basi hlan yẹwhe yetọn lẹ. Enẹwutu, Jehovah na dotẹnmẹ akọta he lẹdo yé lẹ nado gbidikọna akọta dide etọn. Eyin yé lẹnvọjọ, Jehovah nọ gbọn lẹblanu dali jona yé bo nọ whlẹn yé sọn kẹntọ yetọn lẹ si. “Whlasusu” wẹ onú mọnkọtọn lẹ jọ. (Hia Nẹhemia 9:26-28, 31.) Levinu lẹ yigbe dọmọ: “Owhe susu wẹ hiẹ sinyẹnlin to yé dè, bosọ sakunnu do yé ji gbọn gbigbọ towe dali gbọn yẹwhegán towe lẹ mẹ: ganṣo yé ma na otó: enẹwutu wẹ hiẹ jo yé do alọ akọta aigba lọ lẹ tọn lẹ tọn mẹ.”—Nẹh. 9:30.
16, 17. (a) Nawẹ ninọmẹ Islaelivi he lẹkọ sọn kanlinmọgbenu lẹ tọn gbọnvona tọgbo yetọn he dugu Aigba Pagbe tọn to tintan whenu lẹ gbọn? (b) Etẹwẹ Islaelivi lẹ yigbe etọn, podọ etẹwẹ yé dopà nado wà?
16 To whenue Islaelivi lẹ tlẹ lẹkọ sọn kanlinmọgbenu to Babilọni, yé gbẹ́ jai jẹ omọ̀ tolivivẹ tọn mẹ. Nawẹ ninọmẹ yetọn gbọnvo na tọgbo yetọn lẹ tọn gbọn? Levinu lẹ zindonukọn to odẹ̀ lọ mẹ dọmọ: “Doayi e go, mẹmẹsi wẹ míwlẹ to egbé, podọ na aigba lọ tọn he hiẹ na hlan otọ́ mítọn lẹ nado nọ dù sinsẹ́n etọn po dagbe etọn po, doayi e go, mẹmẹsi wẹ mí to e mẹ. E sọ to jideji pọ́ gege jo hlan ahọlu lẹ lọ mẹhe hiẹ de do mí ji na ylando mítọn lẹ tọn wutu . . . míwlẹ sọ tin to nukunbia daho mẹ.”—Nẹh. 9:36, 37.
17 Be nuhe dọ Levinu lẹ te wẹ yindọ Jiwheyẹwhe yinuwa hẹ yé to aliho agọ̀ mẹ to whenue ewọ dike bọ nukunbibia enẹ wá yé ji wẹ ya? Paali! Yé dọmọ: “Hiẹ yin nugbonọ to popo he yè hẹn wá mí ji lẹ mẹ; na hiẹ yí nugbo do zan, ṣigba míwlẹ ko yí kanyinylan do wà.” (Nẹh. 9:33) Enẹgodo, yé dotana odẹ̀ whiwhẹnọ enẹ po opagbe lọ po dọ sọn ojlẹ enẹ mẹ sọyi, akọta lọ na nọ setonuna Osẹ́n Jiwheyẹwhe tọn. (Hia Nẹhemia 9:38; 10:29) Enẹwutu, owe de yin kinkan bọ nukọntọ Juvi lẹ tọn 84 doalọ e mẹ.—Nẹh. 10:1-27.
18, 19. (a) Nuhudo etẹ tọn wẹ mí tindo nado sọgan biọ aihọn yọyọ Jiwheyẹwhe tọn mẹ? (b) Etẹwẹ mí dona nọ hodẹ̀ na zọnmii, podọ etẹwutu?
18 Mí tindo nuhudo mẹplọnlọ Jehovah tọn nado pegan bo lùn titonu ylankan ehe tọ́n biọ aihọn yọyọ dodowiwa tọn etọn mẹ. Apọsteli Paulu kanse dọmọ: “Ovi tẹwẹ tin he otọ́ ma nọ domẹplọnlọ e go?” (Heb. 12:7) Mí nọ dohia dọ mí kẹalọyi anademẹ Jiwheyẹwhe tọn, eyin mí nọ doakọnnanu to sinsẹ̀nzọn etọn mẹ bo na dotẹnmẹ gbigbọ etọn nado hẹn mí pọnte dogọ. Podọ, eyin mí wà ylando sinsinyẹn de, mí sọgan kudeji dọ Jehovah na jona mí eyin mí lẹnvọjọ nugbonugbo bo gbọn whiwhẹ dali kẹalọyi mẹplọnlọ.
19 To madẹnmẹ, Jehovah nasọ do yinkọ etọn hia to aliho he jiawu mẹ hugan lehe e wà do to whenue e tún Islaelivi lẹ dote sọn Egipti. (Ezek. 38:23) Podọ, kẹdẹdile omẹ etọn lẹ dugu Aigba Pagbe tọn do to hohowhenu, Klistiani he doakọnnanu to sinsẹ̀n-bibasi Jehovah tọn mẹ po nugbonọ-yinyin po lẹpo na dugu ogbẹ̀ tọn to aihọn yọyọ dodowiwa tọn Jiwheyẹwhe tọn mẹ. (2 Pita 3:13) Na mí tindo todido jiawu mọnkọtọn lẹ wutu, mì dike mí doalọtena dẹ̀hiho na klandowiwe oyín gigonọ Jiwheyẹwhe tọn blo. To hosọ he bọdego mẹ, mí na dọhodo odẹ̀ devo he mí dona yinuwa sọgbe hẹ nado sọgan duvivi dona Jiwheyẹwhe tọn lẹ tọn todin podọ kakadoi ji.
[Kanbiọ hukan lẹ tọn]
[Yẹdide lẹ to weda 22]
1
[Yẹdide lẹ to weda 22]
2
[Yẹdide lẹ to weda 22]
3
[Yẹdide lẹ to weda 23]
4
[Yẹdide lẹ to weda 23]
5
[Yẹdide lẹ to weda 23]
6
