1. Ki l’assemblée peuple Bondié ti faire ki nou pou examiné, ek ki bann question sa faire nou posé?

 “LEVÉ, beni Jéhovah zot Bondié depuis touletan ek pou touletan.” Par sa bann parole-la, bann Lévite ti invite peuple Bondié pou rassemblé ek pou prié ensam. C’est enn parmi bann pli longue la priere ki ena dan la Bible. (Neh. 9:4, 5) Ti faire sa l’assemblée-la dan Jérusalem, le 24 Tishri, septieme mois dan calendrier Juif, en 455 Avant Nou Lepok. A mesure ki nou pou examine bann l’evenement ki’nn arrivé avant sa jour special-la, reflechi lor sa bann question-la: ‘Ki bon l’habitude bann Lévite ti ena ki ti faire sa l’assemblée-la reussi? Ki lezot leson mo kapav aprann ar sa la priere ki’nn bien preparé-la?’​—Ps. 141:2.

2. Couma bann Israélite zot enn bon l’exemple pou nou zordi?

² Enn mois avant sa l’assemblée special-la, bann Juif ti fini reconstruire bann muraille Jérusalem. (Neh. 6:15) Zot ti prend zis 52 jour pou faire sa travail-la, ek apré, zot ti concentré lor zot besoin spirituel. Alors, premier jour mois apré, setadir mois Tishri, zot ti rassemblé lor place publik pou ecoute Ezra ek lezot Lévite lire ek explik la Loi Bondié. Bann famille entier, parmi ti ena “tou bann ki ti ena assez intelligence pou ecouté,” ti debouté ek ti ecouté depuis “gramatin boner ziska midi.” C’est vrai-mem enn bon l’exemple pou bann ki assisté reunion dan bann la Salle du Royaume ki bien confortable, pa vrai? Selman, dan sa bann l’occasion-la, eski parfois ou rann-ou compte ki ou l’esprit pa la ek ou pé pense bann kitsoz ki moins important? Si oui, mazinn ankor enn fois l’exemple bann Israélite dan le passé. Zot pa ti zis ecouté mais zot ti prend compte seki zot ti tendé. Zot ti mem ploré kan zot ti realisé  ki zot pa ti pé obeir la Loi Bondié.​—Neh. 8:1-9.

3. Ki l’ordre bann Israélite ti obeir?

³ Selman, pa ti ankor arrive ler pou confesse bann peché. Sa jour-la ti enn jour fête, ek Jéhovah ti envie ki so peuple heureux. (Nomb. 29:1) Alors, Nehémia ti dire bann Israélite: “Allé, mange bann mangé gras ek boire bann kitsoz doux, ek envoye bann portion pou bann ki pena nanyé ki finn preparé pou zot; parski zordi, c’est enn jour ki saint pou nou Seigneur; pa bizin zot triste, parski la joie Jéhovah li zot forteresse.” Le peuple ti obeir ek ti ena enn “grand la joie” sa jour-la.​—Neh. 8:10-12.

4. Ki bann chef famille Israélite ti faire, ek ki kitsoz important ti bizin faire pendant sa Fête des Huttes-la?

⁴ Lendemain, bann chef famille ti zwenn pou etudié la Loi pou faire sur ki zot ti pé obeir tou bann l’ordre ki Bondié ti’nn donné. Pendant ki zot ti pé etudié la Loi, zot ti realisé ki le 15 ziska le 22 Tishri, le peuple ti supposé celebré Fête des Huttes ki ti pou fini par enn l’assemblée sacré. Alors, le peuple ti commence prepare-li desuite. Jamais pa ti ena enn fête coumsa depuis lepok Josué ek ti ena enn “la joie extraordinaire.” Pendant sa fête-la ti lire la Loi Bondié en publik, “toulé-jour, depuis premier jour ziska dernier jour.”​—Neh. 8:13-18.

5. Ki peuple Bondié ti faire zis avant ki bann Lévite ti faire la priere pou zot?

⁵ Deux jour apré sa fête-la, ti’nn arrive ler pou le peuple confesse zot peché. Sa jour-la pa ti enn jour pou mangé ek pou faire fête. Au contraire, zot ti garde careme ek ti mette bann la toile sac lor zot pou montré ki zot ti chagrin ki zot ti’nn desobeir la Loi Bondié. Ankor enn fois, bann Lévite ti lire la Loi Bondié pendant environ trois heure temps gramatin. Dan l’apré-midi, “zot ti confessé ek zot ti prosterné devant Jéhovah zot Bondié.” Apré sa, bann Lévite ti faire enn la priere bien preparé pou tou le peuple. ​—Neh. 9:1-4.

6. Ki finn aide bann Lévite pou faire enn la priere sincere, ek ki sa aprann nou?

⁶ Pena okenn doute ki, seki finn aide bann Lévite pou faire enn la priere sincere, c’est parski zot ti lire la Loi Bondié regulierement. Dix premier verset en rapport avek sa la priere-la koz lor seki Jéhovah inn faire ek so bann qualité. Apré, dan zot la priere, bann Lévite souvent ti mette l’accent lor “grand misericorde” Bondié ek ti montré bien ki bann Israélite pa ti merité ki Bondié traite zot avek bonté coumsa. (Neh. 9:19, 27, 28, 31) Pareil couma bann Lévite, si nou lire ek medite lor Parole Bondié toulé-jour, nou pou laisse Jéhovah koz avek nou. Ek nou aussi nou pou ena beaucoup kitsoz pou dire Li  ek nou la priere pou vinn pli sincere.​—Ps. 1:1, 2.

7. Ki bann Lévite ti demann Bondié, ek ki nou aprann ar zot l’exemple?

⁷ Dan zot la priere, bann Lévite ti demann zis enn sel kitsoz. Nou trouve sa dan dernier partie verset 32 ki dire: “Ek asterla, ah nou Bondié, Bondié ki grand, ki fort ek ki faire nou ena la crainte, ki garde l’alliance ek lamour fidele, pa meprise bann probleme ki nou finn gagné, nou, nou bann le roi, nou bann prince, nou bann pretre, nou bann prophete, nou bann ancetre ek tou to peuple, depuis lepok bann le roi l’Assyrie ziska zordi.” Bann Lévite inn laisse nou vrai-mem enn bon l’exemple. Kan nou prié, li bon ki nou loué ek nou remercié Jéhovah avant ki nou demann Li bann kitsoz personnel.

8, 9. (a) Couma bann Lévite ti montré zot l’humilité kan zot ti commence zot la priere? (b) Ki deux l’armée dan le ciel bann Lévite mentionné?

⁸ Mem si zot la priere ti bien preparé, bann Lévite ti ena l’humilité. Zot ti reconette ki zot bann parole pa ti assez fort pou loué Jéhovah couma Li merité. Alors, avek l’humilité zot ti commence prié Jéhovah pou peuple Israël par sa bann parole-la: “Ki zot beni to grand nom ki pli haute ki tou benediction ek louange.”​—Neh. 9:5.

⁹ Sa la priere-la contigné: “To tousel ki Jéhovah, to-mem ki finn faire le ciel, mem pli grand le ciel ki kapav ena ek tou zot l’armée, later ek tou seki lor la, bann lamer ek tou seki ena ladan; to pé garde zot tou vivant; ek l’armée ki dan le ciel pé prosterne devant toi.” (Neh. 9:6) Oui, Jéhovah finn crée l’univers kot ena enn quantité galaxie ki rempli ar zetoile. Seki extraordinaire ankor, lor nou joli planete, Li finn crée enn varieté creature vivant ki ena capacité pou multiplié sakenn dapré so l’espece. Dan la priere ki nou ti mentionné la-haut, bann Lévite mentionne enn lot l’armée, “l’armée ki dan le ciel” ki represente bann ange Bondié. Sa bann ange-la inn temoin tou seki Jéhovah ti crée. (1 Rois 22:19; Job 38:4, 7) En plis, avek humilité, bann ange faire volonté Bondié kan zot aide bann dimoune imparfait “ki pou gagne lavi sauve.” (Héb. 1:14) Bann ange inn laisse nou vrai-mem enn bon l’exemple a mesure ki nou pé servi Jéhovah dan l’unité pareil couma enn l’armée bien entrainé!​—1 Cor. 14:33, 40.

10. Ki nou aprann ar seki Bondié ti faire pou Abraham?

¹⁰ Apré, bann Lévite ti dire seki Bondié ti faire pou Abram. Abram ti ena 99 an ek li pa ti ena zenfant, parski Saraï, so madame ti sterile. C’est lerla ki Jéhovah ti change so nom ek ti appel li Abraham, ki vedir “papa enn la foule.” (Gen. 17:1-6, 15, 16) Bondié ti aussi promette Abraham ki so descendance ti pou herite pays  Canaan. Bann dimoune souvent blié seki zot inn promette, mais pa Jéhovah. Bann Lévite ti dire couma Jéhovah ti garde so promesse: “To-mem Jéhovah, vrai Bondié ki finn choisir Abram, ki finn faire li sorti Our dan pays bann Chaldéen ek ki finn donne li nom Abraham. Ek to finn trouvé ki so leker fidele devant toi; c’est pou sa ki finn ena enn l’alliance avek li pou donne li pays bann Cananéen, . . . pou donne [sa] so descendance; ek to finn realise to bann parole, parski to juste.” (Neh. 9:7, 8) Nou aussi, anou imite nou Bondié ki juste kan nou touletan faire zeffort pou tini nou bann promesse.​—Mat. 5:37.

11, 12. Expliké ki vedir nom Jéhovah. Ki Jéhovah inn faire pou bann descendant Abraham pou montré ki Li digne pou porte so nom?

¹¹ Nom Jéhovah vedir “Li Faire Arrivé.” Sa vedir ki tigit par tigit, Bondié faire bann kitsoz pou realise so bann promesse. Enn bon l’exemple c’est fason ki Li ti tini so promesse ar bann descendant Abraham, nation Israël. Kan zot ti esclave en Égypte, Bondié ti promette zot ki zot ti pou liberé ek ki zot ti pou vive dan Later Promise. Dan sa lepok-la, sa ti parette impossible pou arrivé. Mais Bondié ti faire plusieurs evenement arrivé pou realise so promesse. Coumsa, Li finn prouvé ki Li tousel digne pou appel Jéhovah.

¹² Dan zot la priere, bann Lévite ti cite certain kitsoz ki Jéhovah ti faire pou so peuple: “To ti trouvé couma nou bann ancetre ti passe misere en Égypte, ek to ti tann zot criyé kot Lamer Rouge. Lerla, to ti accompli bann signe ek bann mirak kont Pharaon ek tou so bann serviteur ek tou le peuple dan so pays, parski to ti koné couma zot ti agir avek l’orgueil kont to peuple; ek to ti faire to nom vinn grand pareil couma zordi. To ti ouvert lamer devant zot, pou zot kapav traversé au milieu lamer, lor later sec; mais bann ki ti poursuive zot, to ti faire zot tombe dan bann profondeur, pareil couma enn roche dan bann grand de l’eau.” Lerla bann Lévite ti contigne dire seki Jéhovah ti faire pou so peuple: “Ek to ti faire bann Cananéen, bann habitant sa pays-la, soumette devant zot . . . Ek zot ti prend bann lavil ki entouré ar bann muraille ek enn later fertile, zot ti prend bann lakaz ki ti rempli ar tou bann bon kitsoz, bann reservoir ki ti’nn deja fouillé, bann karo raisin, bann plantation pié zolive ek bann pié en abondance, alors zot ti commence mangé ek zot ti rassasié ek zot ti vinn gros ek zot ti profite lavi grace a to grand bonté.”​—Neh. 9:9-11, 24, 25.

13. Couma Jéhovah ti donne bann Israélite seki zot ti bizin lor plan spirituel, mais couma zot ti reagir?

¹³ Ti ena ankor beaucoup lezot kitsoz ki Jéhovah ti faire pou realise so projet. Par exemple, zis apré ki bann Israélite ti quitte l’Égypte, Jéhovah ti veillé ki zot gagne seki zot ti bizin lor plan spirituel. Dan zot la priere, bann Lévite ti dire: “To ti desann lor Montagne Sinaï ek depuis le ciel to ti koz avek zot, apré to ti donne zot bann jugement ki juste ek bann la loi ki vrai, bann reglement ek bann commandement ki bon.” (Neh. 9:13) Jéhovah ti choisir bann Israélite pou vinn so peuple ek Li ti pou donne zot Later Promise. Alors, Li ti enseigne zot pou agir dan enn fason ki montré ki zot digne pou porte so nom. Mais zot pa ti contigne obeir bann commandement Jéhovah.​—Lire Nehémia 9:16-18.

14, 15. (a) Couma Jéhovah ti montré so misericorde envers bann Israélite? (b) Ki nou aprann ar fason ki Bondié ti agir envers bann Israélite?

¹⁴ Dan zot la priere, bann Lévite ti mentionne deux peché ki bann Israélite ti faire zis apré ki zot ti promette pou obeir la Loi Bondié devant Montagne Sinaï. A cause sa, zot ti merite pou mor dan desert. Mais  dan zot la priere, bann Lévite ti loué Jéhovah: “Toi, dan to grand misericorde, to pa ti abandonne zot dan desert. . . . Pendant quarante an to ti donne zot mangé . . . Zot pa ti mank nanyé. Zot linge pa ti usé ek mem zot lipié pa ti enflé.” (Neh. 9:19, 21) Zordi aussi, Jéhovah donne nou tou seki nou bizin pou servi Li avek fidelité. Bann millier Israélite ti mor dan desert parski zot pa ti obeir ek zot ti mank la foi. Fodé jamais nou ressemblé zot! En realité, sa bann kitsoz-la “finn ecrire . . . pou averti nou, nou ki’nn arrive pré ar lafin sa bann systeme ki existé-la.”​—1 Cor. 10:1-11.

¹⁵ Malheureusement, apré ki bann Israélite ti rente dan Later Promise, zot ti commence adore bann bondié ki bann Cananéen ti pé adoré. Lerla zot ti faire bann kitsoz immoral ek zot ti mem sacrifié zot zenfant. Alors, Jéhovah ti laisse bann lezot nation faire dominere ar so peuple. Mais kan bann Israélite ti repenti, Jéhovah ti pardonne zot ek ti faire zot gagne la victoire lor zot bann lennmi. Sa ti arrivé “plusieurs fois.” (Lire Nehémia 9:26-28, 31.) Bann Lévite ti confessé ek ti dire: “To finn ena beaucoup patience avek zot pendant plusieurs l’année ek to finn contigné rann temoignage kont zot par to l’esprit, par moyen to bann prophete, mais zot pa ti ecouté. Finalement, to ti livré zot dan la main bann nation ki ti dan sa bann pays-la.”​—Neh. 9:30.

16, 17. (a) Ki ti arrivé kan bann Israélite ti recommence desobeir Jéhovah? (b) Ki bann Israélite ti reconette, ek ki promesse zot ti faire?

¹⁶ Mem apré ki bann Israélite ti retourne dan zot pays, zot ti recommence desobeir Jéhovah. Ki’nn arrivé lerla? Bann Lévite ti expliké dan zot la priere: “Guetté! Zordi nou bann esclave; ek concernant pays ki to ti donne nou bann ancetre pou ki zot mange so bann fruit ek so bann bon kitsoz, guetté! nou bann esclave dan sa pays-la; so bann produit pé augmenté pou bann le roi ki to finn etabli lor nou a cause nou bann peché; . . . ek nou dan enn grand detresse.”​—Neh. 9:36, 37.

¹⁷ Eski bann Lévite ti pé rod dire ki Bondié ti injuste kan Li ti laisse so peuple souffert? Non! Zot ti reconette: “To finn montré ki to juste concernant tou seki finn arrive nou, parski to’nn agir avek fidelité, mais nou, nou finn faire seki mauvais.” (Neh. 9:33) Lerla, zot ti termine zot la priere sincere par enn serment ki a partir sa jour-la, nation Israël pou obeir la Loi Bondié. (Lire Nehémia 9:38; 10:29) Zot ti ecrire sa serment-la dan enn document ek 84 chef Juif ti mette zot scellé lor la.​—Neh. 10:1-27.

18, 19. (a) Ki nou bizin faire si nou envie vive dan le monde nouveau? (b) Pou ki kitsoz nou bizin contigne prié, ek kifer?

¹⁸ Si nou envie vive dan le monde nouveau kot pou ena la justice, nou bizin laisse Jéhovah discipline nou. L’apotre Paul ti pose sa question-la: “Ki sa garson ki so papa pa discipline li-la?” (Héb. 12:7) Nou montré ki nou accepté direction Jéhovah dan nou lavi kan nou enduré avek fidelité dan so service ek kan nou laisse so l’esprit forme nou. Ek si nou faire enn peché grave, nou kapav sur ki Jéhovah pou pardonne nou si nou repenti avek tou nou leker ek nou accepté so discipline avek humilité.

¹⁹ Bientot, Jéhovah pou faire bann kitsoz pli extraordinaire ki Li ti faire kan Li ti sauve bann Israélite dan l’Égypte. Lerla, tou dimoune pou koné ki Li vrai-mem enn grand Bondié. (Ézék. 38:23) Pareil couma bann Israélite ti rente dan Later Promise, pena okenn doute ki tou bann adorateur Jéhovah ki fidele, pou gagne lavi dan le monde nouveau kot pou ena la justice. (2 Pierre 3:13) Alors ki nou pé attann sa bann benediction extraordinaire-la, anou contigne prié pou ki grand nom Bondié sanctifié. Prochain lartik pou examine enn lot la priere ki kapav aide nou pou gagne benediction Bondié asterla ek pou touletan.