Añahein gürigia hénrenguti houn hasandirun ínsiñeni luagu Bungiu, lugundun saminatiña úati lan furangu lan luáguti, díseti lan o luagu furunde lan. Ariha huméi le hariñagubei fiú hádangiñe:

• “Íbiniha amuriaha nan ídemuei luma Bungiu, sanditina meha dise lan nuéi. Saminatina meha masandirun lan Bungiu ugundani o íruni.” (Marco, Italia.)

• “Busentina meha neseriwidun lun Bungiu, gama lumoun genegeti meha nun siñati lan nayarafadun lun. Ariha numuti meha kei aban Bungiu wuribati le áluahabei lasufuriragüdüniwa sun dan. Mafiñentina meha buidu lan Bungiu.” (Rosa, Wadimalu.)

• “Lúmagiñe ñǘraügidina, saminatina meha lúnrügü lan wachara letenira Bungiu lun gayara lan labeichuniwa. Lárigiñe aba nagumeserun arihei keisi aban gumadimati le siñati layarafadúniwa lun, le arúeihabaliña gürigia meberesenga ligía hau.” (Raimunda, Kanadá.)

Agia hugía, ka hisaminanbei? Siñati funa san línsiñedun Bungiu woun? Adüga hamaali kristiánugu álügüdahani le hóuniwagua luagu saragu dan. Lúmagiñe burí irumu 500 darí 1500 lidan wadaani, mafurieiduntiña meha hibe-agei gürigia lun Bungiu. Ka uagu? Ladüga hanufude. Ítara liña lafuranguagüdüni aban wügüri gíriti Will Durant: “Ida luba meha gayara lan lafurieidun aban gürigia gafigounti lun aban Bungiu díseti ani hanarimeti?”.

Ka adügübei lun harihini saragu gürigia Bungiu ítara? Kátima san tarufudahabei Bíbülia luagu? Gayarati funa san línsiñedun Bungiu woun anhein wafurendeira inarüni luagu?