KUUMA NGOTHI-INĨ | MAHEENI MAMWE MARUTANAGWO MEGIĨ NGAI
Andũ Maremagwo Gũkuhĩrĩria Ngai Nĩkĩ?
Jesu Kristo, oigire ũũ rĩrĩa aarĩ gũkũ thĩ: “Enda Mwathani Ngai waku na ngoro yaku yothe, na muoyo waku wothe, na gwĩciria gwaku guothe. Rĩu nĩrĩo rĩathani rĩrĩa inene, na rĩa mbere.” *
Andũ amwe nĩ monaga arĩ ũndũ mũritũ gũkuhĩrĩria Ngai, mamuonaga arĩ kũraihu mũno nao, na ta atarĩ tha. Ta wĩcirie ngerekano ici:
“Nĩ ndahoyaga Ngai andeithie, no ngona arĩ kũraihu mũno ũndũ itangĩahotire kũmũkuhĩrĩria. Ndonaga Ngai arĩ ta kĩhinya o ũguo gĩtangĩonania ngumo o yothe.”—Marco, wa bũrũri wa Italia.
“O na gũtuĩka nĩ ndendete gũtungatĩra Ngai, ndonaga arĩ kũraihu mũno na niĩ, ngona ta atarĩ tha na wendete kũherithia andũ. Ndionaga ta angĩkorũo arĩ na ngumo o yothe njega.”—Rosa, wa bũrũri wa Guatemala.
“Rĩrĩa ndarĩ mwana mũnini, ndetĩkĩtie atĩ Ngai atũũraga atwethagĩra mahĩtia nĩguo atũherithie. Thutha-inĩ, ngĩambĩrĩria kuona ta atatindanagĩra na andũ. Ndonaga ahaana ta mũtongoria wa bũrũri ũratongoria andũ atekũmeciiria.”—Raymonde, wa bũrũri wa Kanada.
Wee ũkuona atĩa? Hihi andũ no mahote gũkuhĩrĩria Ngai? Akristiano amwe manoria kĩũria kĩu kwa ihinda rĩa mĩaka mĩingĩ. Gatagatĩ-inĩ ka mĩaka ya 500 na 1500 Mahinda Maitũ (M.M.), arũmĩrĩri aingĩ a ndini cia Gĩkristiano o na matiahoyaga Ngai Mwene Hinya Wothe. Nĩkĩ hihi? Tondũ monaga arĩ wa gwĩtigĩrũo mũno. Mũthomi ũmwe wa historĩ wetagwo Will Durant, oririe ũũ: “Mũndũ wĩhagia angĩhota atĩa kũhoya Ngai wa gwĩtigĩrũo na ũraihanĩrĩirie na andũ?”
Nĩ kĩĩ gĩatũmire andũ maambĩrĩirie kuona Ngai arĩ “wa gwĩtigĩrũo na ũraihanĩrĩirie na andũ?” Bibilia ĩrutanaga atĩa kũna ũhoro-inĩ wĩgiĩ Ngai? Hihi kwĩruta ma ĩrĩa ĩkoniĩ Ngai no gũgũteithie ũmũkuhĩrĩrie?
