TOHO YA TABA | KI KABAKALAÑI BATU BA BAÑWI HA BA IKUTWA KULI HA BA KONI KU LATA MULIMU?

Libaka Batu ba Bañata ha ba Ikutwa Kuli ha ba Koni ku Lata Mulimu

Ka silimo sa 33 C.E. * Jesu Kreste naa ize: “‘U lukela ku lata Jehova Mulimu wa hao ka pilu ya hao kaufela ni ka moyo wa hao kaufela ni ka munahano wa hao kaufela.’ Ye ki yona taelo ye tuna ka ku fitisisa ni ya pili.”—

Batu ba bañwi ba ikutwa kuli ha ba koni ku lata Mulimu. Batu bao, ba nahana kuli Mulimu haa utwisisehi hande, haa na taba ni batu, mi u situhu. Ha mu nyakisise litaba ze latelela ze bulezwi ki batu ba bañwi:

Bo Marco, ba kwa Italy ba li: “Ne ni lapelanga ku Mulimu ku mu kupa kuli a ni tuse, kono ka nako ye swana, ne ni ikutwanga kuli haa na taba ni na, ni kuli ha ni koni ku ba bukaufi ni yena. Ne ni nga kuli Mulimu ha utwelangi batu makeke.”—

Bo Rosa, ba kwa Guatemala ba li: “Nihaike kuli ne ni tabela luli ku belekela Mulimu, ne ni ikutwanga kuli haa na taba ni na. Ne ni nahananga kuli ki Mulimu ya buhali ya tabela feela ku fa batu likoto. Ne ni sa lumeli kuli u na ni mufelañeke.”—

Bo Raymonde, ba kwa Canada ba li: “Ha ne ni sa li mwanana, ne ni nahananga kuli Mulimu u batisisanga feela mafosisa a luna, ilikuli a lu fe koto haiba lu fosa. Hamulaho, na kala ku nga kuli haa na taba ni batu. Ne ni nahananga kuli Mulimu u swana sina mueteleli ya si na taba ni batu ba etelela.”—

Mu bona cwañi? Kana ki niti kuli Mulimu haa na taba ni batu? Bakreste se ba ipuzize puzo yeo ka lilimo ze ñata. Mane ku zwa ka silimo sa 500 C.E. ku isa ibato ba ka silimo sa 1500 C.E., buñata bwa batu ba ba mwa bulapeli bo bu twi ki bwa Sikreste ne ba sa lapelangi ku Mulimu Ya Maata Ote. Kabakalañi? Kakuli ne ba mu saba. Caziba wa litaba za kwaikale ya bizwa Will Durant naa bulezi cwana ka za taba yeo: “Muezalibi ya fokola naa ka nahana cwañi za ku lapela ku Mulimu ya sabisa cwalo ili ya si na taba ni batu?”

Ne ku tile cwañi kuli batu ba kale ku nga kuli Mulimu wa ‘sabisa mi haa na taba ni batu’? Bibele i lutañi luli ka za Mulimu? Kana ku ituta niti ka za Mulimu kwa kona ku mi tusa ku mu lata?

[Litaluso za kwatasi]

[Manzwi a bañi ba maswaniso fa likepe 3]

Top, trinity: Museo Bardini, Florence; middle, hell: © Photononstop/Superstock