Mi ṭhenkhat chuan Pathian hmangaih chu harsa an ti a. An tân chuan Pathian chu hriat phâk loh, hla taka awm, a nih loh leh nunrâwng tak a ni. A hnuaia thute hi han ngaihtuah teh:

• “Pathian ṭanpuina dîlin ka ṭawngṭai a, mahse chutih rual chuan ani chu hmun hla tak, hriat phâk loh tûr khawpa hlaah a awm niin ka hria. Ka tân chuan Pathian chu rilru vei zâwng nei mi pakhat angin ka ngai thei lo.”—Marco-a, Italy.

• “Pathian rawng bâwl duhna nei mah ila ani chuan min hlat hle niin ka hria. Min hrem ṭhîntu Pathian nunrâwng tak niin ka hre bawk. Khawngaihna a nei ang tih ka ring phâk ngai lo.”—Rosa-i, Guatemala.

• “Ka naupan lai chuan, Pathianin kan thil tihsualte ang zêla min hrem tûrin min enthla reng niin ka hria a. A hnuah, inlahrang tlat niin ka hre leh a. Ani chu ngaihsakna tak tak nei si lova mite awptu prime minister ang niin ka hre ta a ni.”—Raymonde-i, Canada.

Eng nge i ngaih dân? Pathian chu hmangaih theih loh a ni em? Kristiante chuan kum za bi tam tak chhûng chu he zawhna hi an lo zâwt tawh a. Chu bâkah, Middle Ages hun (C.E. 500-1500) chhûngin Kristianna rama a tam zâwkte chuan Pathian Engkimtitheia hnênah pawh an ṭawngṭai tawh lo a ni. Engvângin nge? Mite chuan Pathian chu sakei hlauhva an hlauh vâng a ni. Thilthleng chanchin ziaktu Will Durant-a chuan heti hian a sawi: “Engtin nge mi sual ve mai chuan Pathian min hlattu leh ṭihbaiawm tak hnênah a ṭawngṭai ngam tehrêng ang?” tiin.

Engtin nge Pathian chu “min hlattu leh ṭihbaiawm tak” anga thlîr a lo nih? Pathian chungchânga Bible zirtîrna dik tak chu eng nge ni? Pathian nihna dik tak hriatna chuan amah hmangaih tûrin a ṭanpui che ang em? (w13-E 11/01)