KʼO JU̱SʼꞸ NU JA PJꞸRꞸ | YO MBɆCHJINE KE KJAKꞸJI RA XO_KAJI MIZHOKJIMI
¿Dya søø ra sʼiyaji e Diosi?
“ ‘K’ꞹ ri tsjaji, ri ñeji Mizhokjimi k’in Jmugeji. Ri ñegeji ko texe in mꞹbʼꞹji, ’ñe ko texe in almaji, ’ñe ko texe in pjeñeji. Nujnu ngueje ot’ꞹ yo o mandamiento Mizhokjimi, nge nu nda ni mubi.” (Jesucristo, nu kjɇɇ 33) a
Bʼꞹbʼꞹ na punkjꞹ ntee ke manji ke na sʼɇzhi ra sʼiyaji e Diosi, manji ke ngeje na Yose ke dya søø ra pa̱ra̱ji na joo, ke na je̱e̱ kʼua ja na bʼꞹbʼꞹ ñe ke kjaa kʼo na sʼoo. Jñanrra pje manji janzi ntee:
“Zø mi øtꞹgø e Yose ro mbøxkꞹ, mi søgø ke na je̱e̱ kʼua mi bʼꞹbʼꞹ. Mi nugø ke dya mi mbenzgøji ñe dya pje mi zøʼø ma mi supjregøji.” (E Marco, Italia.)
“Mi nee ro matrkʼø e Tsʼitajensʼe, pe mi mangø ke dya søø ro chɇzhi ko angeze. Mi søgø ke mi ngeje na Mizhokjimi ke ma sʼøø nange mi pempeji yo ndumꞹ. Mi mbenkʼø ke dya ma joo ma kjaa angeze.” (E Rosa, Guatemala.)
“Ma kja mi tsʼixutrʼigø mi mango ke e Palesito ajensʼe ngextrjo mi janrra ma mi jyopꞹjme ngekʼua ro jñꞹnkꞹjme nguenrra. Mi nugø me na je̱e̱ kʼua mi bʼꞹbʼꞹ, je nzikja na manrro ke axi kjapꞹ nguenrra yo ntee.” (E Raimunda, Canadá)
Natsʼkʼe, ¿pje i mange? ¿Kjo dya søø ra sʼiyaji e Diosi? Ndeze mi jinkjoma yo cristiano mi tsjatsjɇji ne trʼønꞹ. O bʼꞹbʼꞹ kʼo paa ke yo ntee axi mi matrʼꞹji e Yose. ¿Pjenga? Nange mi su̱ji e Diosi. Na historiador Will Durant go mama: “Na ntee ke pɇsʼi nzhubꞹ dya søø ra øtʼꞹ Mizhokjimi ke bʼꞹbʼꞹ ajensʼe”.
¿Jinga yo ntee mbeñeji akjanu de e Tsʼitajensʼe? ¿Pje mama ne Biblia? ¿Kjo dabaditrjo ra sʼiyaji ma ra pa̱ra̱ji na joo jaga kjaa angeze?
