Tin hende ta haña ku ta difísil pa stima Dios. Pa nan, e ta un ser misterioso, alehá i asta kruel. Wak kiko algun di nan a bisa:

• “Mi tabata resa pidi Dios p’e yuda mi, pero na mes momento mi tabata sinti ku e ta masha leu for di mi, kasi imposibel pa yega na dje. Pa ami, Dios tabata un ser deskonosí i sin sintimentu.”—Marco, Italia.

• “Aunke di kurason mi kier a sirbi Dios, e tabata parse masha leu for di mi. Mi a mir’é komo un Dios severo ku ta kla pa kastigá hende. Pa ami, e no tabatin sintimentu.”—Rosa, Guatemala.

• “Tempu mi tabata chikí, semper mi a kere ku Dios ta wak nos foutnan pa e kastigá nos. Pero despues mi a bin mir’é komo un Dios indiferente, manera un promé minister ku ta atendé asuntunan di su pueblo, pero ku no ta interesá mes den nan.”—Raymonde, Canada.

Kiko abo ta pensa? Hende por stima Dios? Pa siglonan kaba kristiannan ta hasi e pregunta ei. De echo, durante Edat Medio mayoria di hende no tabata ni resa mas na e Dios Todopoderoso. Dikon nò? Pasobra hende tabatin un miedu insaludabel di dje. Historiadó Will Durant a bis’é di e siguiente manera: “Kon un simpel pekadó por tribi di dirigí su orashon na un trono ku ta asina kruel i leu for di hende?”

Kiko a pone hende mira Dios komo un ser “kruel i leu for di hende”? Kiko Beibel ta siña realmente tokante Dios? Si bo siña e bèrdat tokante Dios, esaki lo yuda bo stim’é?