TEMA | DIOSMANDA CARUYACHIJ LLULLAUNA
¿Diosta llaquingaj ushanchichu?
33 huatai Jesús nica: “‘Camba [...] Diosta llaquinami angui, intiru shunguhua, intiru almahua, intiru iyaihua’. Caimi ñaupa punda atun mandashca shimi”. a
Maican runaunara Yaya Diosta llaquingaj shinzhi tucun, iyanun mana munan paita ricsichu, piñaj, libachij Dios an nisha. Ricui paiguna nishcara:
Marco Italiamanda nin: “Diosta yanapaira mañajpis, sinticani ñucamanda yapa carui ashcara. Paita ricuj acani sintinaunara mana charij cuinta”.
Rosa Guatemalamanda nin: “Diosta sirvina munashas pai ñucamanda yapa carui ajta sinticani. Quiricani pai piñasha libachinalla munashcara. Mana quiricani pai sirtu chuyaj llaquinara charishcara”.
Raimunda Canadamanda nin: “Huahuamanda quiricani Dios ñucanchi uchaunallara ricuna munan libachingaj. Huasha paita carui aj cuinta ricungaj callaricani, ñucaj aca runaunara mana llaquisha mandaj apu cuinta”.
¿Can imara iyangui? ¿Diosta llaquingaj ushanchichu? Ashca huataunamanda Jesusta catijcuna caita tapurinushca. 500 huatamanda 1500 huatagama ashca runauna Yaya Diosta mañangaj manzhai charinuca Jesusta catijcuna anchi nishas. Ñaupa pasashcaunamanda cuintaj runa Will Durant casna rimaca: “¿Imasnara shu uchayuj runa shu manzhachij, carui tiaj Diosta mañana ushanga?”.
¿Imarasha runauna Diosmanda casna iyaringaj pactanushca? Biblia caimanda ¿imara yachachin? ¿Diosmanda sirtu shimira ricsina paita llaquingaj yanapangachu?
