Issi issi asay Xoossaa siiqanau metootees. Eti Xoossaabaa erana danddayettennabadan, i haahuwan deˈiyaabadan woy ubba meqettaa iita gididabadan qoppoosona. Issoti issoti giidobaa akeeka:

• “Xoossay tana maaddanaadan woossaas, shin akko shiiqana danddayettenna haahuwan deˈiyaabadan, qassi i asau qarettennabadan qoppaas.”—Markka, Xaaliyaa.

• “Taani Xoossaayyo oottanau wozanappe koyiyaaba gidikkokka, i keehi haahuwan deˈiyaabadan qoppaas. A oosoy nuna qaxxayiyoogaa xalla gidido iita Xoossa gaada qoppaas. Taani i keehi qarettiyaagaa gidiyoogaa erabeykke.”—Roso, Guwatimaala.

• “Naatettan deˈaydda, Xoossay ubbatoo nu balaa qoriyaabadaaninne bessiyaaba gidikko nuna qaxxayanau giigi uttidabadan ammanays. Guyyeppe, Xoossay haahuwan deˈiyaabadaaninne ba haariyo asau qoppenna kawo mala gaada qoppaas.”—Raymonddo, Kanaada.

Ne qofay shin aybee? Xoossaa siiqanau danddayettennee? Kiristtaaneti daro layttau ha oyshaa oychidosona. Kiristtaanetu biitta geetettiya biittatun 500-1500 M.Ln deˈida daroti Ubbaa Danddayiya Xoossaakko woossibookkona. Aybissi? Bessenna hanotan Xoossaayyo yayyido gishshataassa. Taarikiyaa eranchaa Wil Durantti hagaadan giis: “Nagarancha gidida asay keehi yashshiyaanne haahosan deˈiya Xoossaakko waanidi woossana danddayii?”

Asay Xoossaa ‘yashshiyaabadaaninne haahosan deˈiyaabadan’ xeelliyoogaa doommidoy aybissee? Geeshsha Maxaafay Xoossaabaa ay tamaarissii? Xoossaabaa tumaa eriyoogee neeni a siiqanaadan maaddanee?