TIʼ U YÁAX TÁAN JUʼUNIL | TUUSOʼOB NÁACHKUNTIK MÁAK TIʼ DIOS
¿Talam wa u yaabiltaʼal Dios?
«‹Kʼaʼabéet a yaabiltik Jéeoba yéetel tuláakal a puksiʼikʼal, yéetel tuláakal a kuxtal bey xan yéetel tuláakal a tuukul›. Lelaʼ letiʼe mandamiento maas nojochoʼ yéetel letiʼe yáax baʼax ku yaʼalik le Leyoʼ» (Jesucristo, jaʼab 33). *
Yaan máakeʼ talam u yilik u yaabiltik Dios. Ku tuklikeʼ maʼ tu páajtal u kʼaj óoltaʼal, náach yanil yéetel kʼasaʼan. Ilawil baʼax ku yaʼalik jujuntúul máakoʼob:
-
«Tin kʼáataj tiʼ Dios ka u yáanten, baʼaleʼ tin wuʼuyaj bey jach náach yaneʼ. In tiaʼal teneʼ Dioseʼ junpʼéel baʼal chéen tu tuukul máak yaan.» (Marco, Italia.)
-
«Kex in kʼáat in meyajt Dios kaʼacheʼ, bey tsʼiʼ in wóol jach náach yanileʼ. Kin tuklikeʼ jach tsʼíik yéetel chéen uts tu tʼaan u castigartik máak. Maʼ tin creertik kaʼach wa yaan u yaabilaj.» (Rosa, Guatemala.)
-
«Tin paalileʼ kin tuklik kaʼacheʼ Dioseʼ chéen táan u kaxtik k-siʼipil utiaʼal u castigartikoʼon. Ka máan kʼiineʼ tin tukleʼ baʼaliʼ u kʼáajtiʼ baʼax ku yúuchul tiʼ máakeʼ; óoliʼ jeʼex juntúul gobernante ku nuʼuktik junpʼéel kaaj baʼaleʼ maʼ u kʼáat u yáant u kajnáaliloʼobiʼ.» (Raimunda, Canadá.)
Techeʼ ¿baʼax ka tuklik? ¿Talam wa u yaabiltaʼal Dios? Le cristianoʼoboʼ úuch káajak u tuklikoʼob leloʼ. Desde le Edad Mediaoʼ (siglo 5 tak 15), yaʼab tiʼ le máaxoʼob yanoʼob ichil le religión ku yaʼalikubaʼob cristianoʼoboʼ mix tech u oraroʼob tiʼ Jajal Dios. ¿Baʼaxten túun? Tumen saajkoʼob kaʼach tiʼ letiʼ. Le historiador Will Durantoʼ tu yaʼalaj: «¿Bix kun táabal orar juntúul j-kʼeban máak tu táan junpʼéel trono sajbeʼentsil yéetel jach náach yanil?»
¿Baʼax beet u tuklaʼal Dioseʼ «sajbeʼentsil yéetel jach náach yanil»? ¿Baʼax jach tu jaajil ku kaʼansik le Bibliaoʼ? ¿Jeʼel wa a yaabiltik Dios wa ka a wojéelt u jaajil tu yoʼolaleʼ?
