“Indi kami sigurado kon may ngalan gid man ang Dios, kag ano ini kon may ara gid man.”​—Propesor David Cunningham, Theological Studies.

Ang Dios nagsiling: “Ako amo ang GINOO, ina amo ang akon ngalan.” (Isaias 42:8) Sa Maayong Balita nga Biblia, gingamit ang GINOO sa baylo nga “Jehova.” Ang Jehova isa ka Hebreo nga ngalan nga nagakahulugan “Ginapahanabo Niya nga Mangin Amo.”

Luyag ni Jehova nga gamiton naton ang iya ngalan. “Magpanawag sa iya ngalan,” siling sang Biblia. “Ipahayag ang iya mga binuhatan sa katawohan, isambit nga ang iya ngalan ginapakataas.”​—Isaias 12:4.

Gingamit ni Jesus ang ngalan sang Dios. Nangamuyo sia kay Jehova: “Ginpakilala ko ang imo ngalan sa ila [mga disipulo ni Jesus] kag ipakilala ko ini.” Ngaa ginpakilala ni Jesus sa iya mga disipulo ining balaan nga ngalan? Nagpadayon sia: “Agod ang gugma nga imo [Dios] ginhigugma sa akon mangin yara sa ila kag ako mahiusa sa ila.”—Juan 17:26.

“Ang tawo nga wala makakilala sa ngalan sang Dios, wala makakilala sa iya bilang persona,” sulat sang teologo nga si Walter Lowrie, “kag indi niya sia mahigugma, kon ang pagkilala niya sa iya isa lang ka puersa.”

Si Victor nagasimba kada semana, pero para sa iya daw wala pa gid niya makilala ang Dios. “Sang ulihi, nabal-an ko nga Jehova ang ngalan sang Dios, kag daw amo ini ang pormal nga pagpakilala sa iya,” siling niya. “Daw pareho lang nga nakilala ko gid man ang Isa nga madugay ko na nabatian. Nangin matuod sia nga Persona para sa akon kag nangin abyan ko.”

Suod man si Jehova sa mga nagagamit sang iya ngalan. Sa mga “nagpainoino sa iya ngalan,” nagsaad ang Dios: “Pasaylohon ko sila subong sang tawo nga nagapasaylo sang iya kaugalingon nga anak nga nagaalagad sa iya.” (Malaquias 3:16, 17) Ginapadyaan man sang Dios ang mga nagatawag sa iya ngalan. Ang Biblia nagasiling: “Ang tagsatagsa nga nagatawag sa ngalan ni Jehova maluwas.”​—Roma 10:13.