“Kami enda ulih nentuka sekalika Petara bisi nama. Tang enti Petara amat bisi nama, kami pan enda ulih nentuka sapa nama Iya.”—Profesor David Cunningham, Theological Studies.

Petara madah: ‘Semina Aku aja ti Jehovah Petara nuan.’ (Isaiah 42:8) Nama Jehovah dalam jaku Hebrew reti iya, “Iya ti ngasuh nyadi”—Pemungkal 2:4, NWT.

Jehovah dekaka kitai ngena nama Iya. Bup Kudus madah: “Kangauka Iya . . Padahka ngagai semua bansa utai ti udah dikereja Iya! Padahka ngagai sida pasal pemesai nama Iya!”—Isaiah 12:4, NWT.

Jesus ngena nama Petara. Ba dalam sampi iya, Jesus madah ngagai Jehovah: “Aku udah madahka nama Nuan ngagai sida [bala murid Jesus], lalu Aku deka majak ngasuh sida nemu nama Nuan.” Nama kebuah Jesus madahka nama Petara ngagai bala murid iya? Ku iya nampung baru: “Ngambika pengerindu Nuan [Petara] ke Aku bisi dalam sida, lalu Aku dalam sida.”—John 17:26.

“Orang ke enda nemu nama Petara, enda ngelala Iya”, ku pakar teologi ke benama Walter Lowrie, “lalu orang nya enda ulih rinduka Petara enti iya ngumbai Petara nya semina siti kuasa.”

Seiku lelaki ke benama Victor datai ke gerija ninting minggu, tang iya agi enda ngelala Petara. Ku iya madah: “Nyau kelama, baru aku nemu nama Petara nya Jehovah. Aku ngasaika diri baru betemu enggau Seiku orang ke suah didinga aku. Tu ngasuh aku ngelala Iya lalu ngembuan kaul ti rapat enggau Iya.”

Jehovah semak enggau orang ke ngena nama Iya. Nama deka nyadi ngagai orang ke belematika nama Iya? Petara besemaya, Iya deka nyadi “baka apai ti kasihka anak ke betuaika sida.” (Malaki 3:16, 17) Petara mega deka merekatka orang ti ngangauka nama Iya. Bup Kudus madahka: ‘Genap iku orang ke ngangauka nama Jehovah, deka diselamatka.’—Rome 10:13.