Omuprofesa David Cunningham okwa popya membo ledina Theological Studies, a ti: “Inatu fika pexulifodiladilo kutya Kalunga oku na edina, nongeenge oku na, katu shii kutya oye lyelye.”

Kalunga okwa ti: “Aame [Jehova, NW], olo edina lange.” (Jesaja 42:8) Jehova edina lOshiheberi olo tali ti “Oha ningifa.” — Genesis 2:4, eshangelo lopedu mo-NW.

Jehova okwa hala tu longife edina laye. Ombiibeli oya ti: ‘Ifaneni edina laye, hepaululeni mokati kovanhu oilonga yaye, nye mu va udifile edina laye la tumbala.’ — Jesaja 12:4.

Jesus okwa li ha longifa edina laKalunga. Jesus okwa li a lombwela Jehova meilikano a ti: “Onde va shiivifila edina loye [ovahongwa vaJesus] nohandi ke li shiivifa natango.” Omolwashike Jesus a shiivifila ovahongwa vaye edina laKalunga? Okwa twikila ko a ti: “Opo u kale u va [Kalunga] hole ngaashi u hole nge, nondi kale nekwatafano navo.” — Johannes 17:26.

Walter Lowrie oo e li omukwangeleka, okwa shanga a ti: “Omunhu oo ehe shii edina laKalunga, ke shii omaukwatya aye noita dulu okukala e mu hole ngeenge oku mu shii ashike e li omunhu ehe na omaukwatya.”

Omulumenhu wedina Victor okwa li hai kongeleka oshivike keshe, ndele kali e wete e shii nawa Kalunga. Okwa ti: “Eshi nde lihonga kutya edina laKalunga oJehova, osha li sha fa oshikando shange shotete handi mu shiiva. Onda li ndi udite nda fa opo handi shakene nomunhu oo nda kala ashike handi udu luhapu kombinga yaye. Onda hovela oku mu tala ko e li omunhu wolela nonda panga oukaume naye.”

Jehova naye oha ehene popepi novanhu ovo hava longifa edina laye. Kalunga okwa udanekela ovo ‘hava fimaneke edina laye’ a ti: “Ame ohandi ke va filonghenda ngaashi omulumenhu ta file omona waye omumati onghenda, ou te mu longele.” (Malakia 3:16, 17) Kalunga oha pe yo ondjabi ovo tava ifana edina laye. Ombiibeli oya ti: “Keshe ou ta ifana edina Jehova ota ka xupifwa.” — Ovaroma 10:13.