KʼO JU̱SʼꞸ NU JA PJꞸRꞸ | YO MBɆCHJINE KE KJAKꞸJI RA XO_KAJI MIZHOKJIMI
Dya kjuana ke Mizhokjimi dya pɇsʼi na trju̱u̱
KʼO MANJI YO NTEE
“Nrre naño ri manji ma e Tsʼitajensʼe pɇsʼi o trju̱u̱. Ñe ma mbɇsʼi na trju̱u̱, dya ri pa̱rgøji pje ni chju̱u̱.”(Profesor David Cunningham, o dyopjꞹ kja o libro Theological Studies.)
NE BIBLIA MAMA:
E Mizhokjmi o mama:“Ngezgø e Jehová, je ni chju̱zgø akjanu” (Isaías 42:8). Jehová ngeje na tju̱u̱ ke kja nu jñaa hebreo nee ra mama “Angeze kjapꞹ ra zⱥdʼⱥ o ra bʼꞹbʼꞹ texe kʼo nee” (Génesis 2:4, nota).
E Jehová nee ke ra nⱥmbʼⱥji o trju̱u̱. Ne Biblia xitsiji: “¡nⱥdʼⱥji o trju̱u̱, xipjiji yo ntee kʼo na joo kʼe kjaa angeze! Nⱥdʼⱥji ke o trju̱u̱ me na nojo” (Isaías 12:4).
E Jesús mi nⱥmbʼⱥ o trju̱u̱ e Diosi ñe o jichi yo discípulo ke xo ro tsjajiyo. Dʼa nu paa o dyøtꞹ nu Tata ñe bo mama: “Ya ro unꞹji o mba̱ka̱ji, nuʼtskʼe mi Tatatsʼꞹ”. ¿Pjenga go tsjayo? Xo bo mama: “Ngekʼua, kʼua ja gui sʼiyazꞹ, ra mba̱ra̱ji kja o mꞹbʼꞹji ke xo in sʼiyage angezeji. Xo ra bʼꞹbʼꞹgø kja o mꞹbʼꞹ angezeji” (Juan 17:26).
¿PJENGA ME NA JOO RI PA̱RGEYO?
E teólogo Walter Lowrie bo mama: “Na ntee ke dya mba̱ra̱ o trju̱u̱ e Palesito ajensʼe, dya søø ra mba̱ra̱ kjo ngejenu [...] ñe dya søø ra sʼiya, nange dya mba̱ra̱ jaga kjaa ñe jaga zøʼø angeze”.
Ma ra tseji ra manji o trju̱u̱ e Mizhokjimi o dya ra nⱥmbʼⱥji, je nzikja ke dya ju̱sʼꞹ kja ne Biblia
Na bʼɇzo ke ni chju̱u̱ Victor ngo̱ma ngo̱ma mi paa a mixa, pe dya pje mi mba̱ra̱ ja ma kjaa e Tsʼitajensʼe. Angeze go mama: “Ma ro pa̱rgø ke e Diosi mi chju̱u̱ Jehová, je nzikja ke kja mi pa̱rgø kjo mi ngeje angeze. Me mi mⱥkjø ke a mi søø ro chɇzhi e Mizhokjimi ñe ke a mi søø ro jogøbʼɇ”.
E Jehová ra chɇzhi ko “nukʼo nⱥmbʼⱥji o trju̱u̱”, ñe mama: “Ra juentskʼøji, nzakja na tata ke me juentsje o trʼii ke kjaa kʼo nee angeze” (Malaquías 3:16,17). Xo e Palesito ajensʼe intsjimi kʼo nⱥmbʼⱥji o trju̱u̱, kʼo xipjiji o trju̱u̱ ma tsjaji oración. Ne Biblia mama: “Texe yo ntee ke ra nⱥmbʼⱥji o trju̱u̱ e Jehová, ra mimitrjoji dya ra nrru̱ji” (Romanos 10:13).
