Juon rũkaki in kilaaj in kabuñ ilo college etan David Cunningham, ej ba: “Ñe ej itok ñan etan Anij, eoktak l̦õmn̦ak ko ad jãn doon.”

Anij ear ba: “Ña Jeova, eñin Eta.” (Aiseia 42:8) Ãt in “Jeova,” ej itok jãn juon naan ilo kajin Hibru im ej mel̦el̦ein, “Enaaj Erom Jabdewõt Men Ej Aikuj Erom.”

Jeova ekõn̦aan bwe jen kõjerbal ãt eo etan. Baibõl̦ ej ba: “Kũr Etan, kwal̦o̦k menin kõm̦m̦an ko An ippãn ri aelõñ ko, kom̦win ba bwe eutiej wõt Etan.”​—Aiseia 12:4.

Jijej ear kõjerbal etan Anij. Ke Jijej ear jar ñan Jeova, ear ba kõn rũkal̦oor ro an: “Iar kwal̦o̦k Etam̦ ñan er, im Inaaj kwal̦o̦ke.” Taunin an kar Jijej kwal̦o̦k kõn etan Anij ñan rũkal̦oor ro an? Jijej ear wõnm̦aanl̦o̦k wõt im jar ñan Anij: “Bwe yokwe eo Kwaar yokwe Eõ kake, en pãd ilo er, im Ña ilo er.”​—Jon 17:26.

Juon rũkaki in kilaaj in kabuñ etan Walter Lowrie ej ba: “El̦aññe juon armej ejjab jel̦ã etan Anij, ejjel̦o̦k an maroñ ñan jel̦ã kajjien im jem̦jerãik e. Im armej in ejjab maroñ yokwe Anij ñe ej baj watõk wõt e bwe ej juon jetõb ekajoor.”

Juon em̦m̦aan etan Victor ear niknik in etal ñan im̦õn jar aolep wiik. Meñe ãindein ak ear ba bwe ear jab lukkuun jel̦ã kajjien Anij. Ej ba: “Tokãlik, iar katak bwe ãt in Jeova ej ãt eo etan Anij. Aolep iien iar roñ kõn Anij ak ke iar jel̦ã bwe etan ej Jeova, men in ear ãinwõt ñe juon ear kwal̦o̦k kajjien ñan ña. Meñe elõñ men ko iar katak kaki kõn Anij, ak ke iar jel̦ã kõn etan, eñin ej iien eo me ij kab jel̦ã kajjien im epaake.”

Jeova ej kepaake armej ro me rej kõjerbal etan. Anij ej kallim̦ur ñan ro me rej “l̦õmn̦ak kõn Etan” bwe enaaj “kõtl̦o̦k er jãn jorrããn ãinwõt juon em̦m̦aan ej kõtl̦o̦k nejin eo ej jerbal ñan e.” (Malakai 3:16, 17) Anij ej bar kajeraam̦m̦an ro me rej kũr ñan e kõn etan. Baibõl̦ ej ba: “Aolep ro rej kũr ñan etan Jeova, naaj lo̦mo̦o̦ren er.”​—Joel 2:32.