“Amo ueli senkis tikyekijtouaj ox Dios kipia itokay. Uan komo kipiaskia, amo tikmatiskiaj katiyejua.” (Tamachtijkej David Cunningham, itech iamatajkuilol Theological Studies.)

Dios kijtoj: “Nejua niJiova. Yejua nejin notokay” (Isaías 42:8). Jiova se tokayit itech tajtol hebreo tein kijtosneki “Yejuatsin Kichiua maj Mochiua” (Génesis 2:4, nota).

Jiova kineki maj tiktekitiltikan itokay. Biblia kijtoua: “Xikijtokan itokay. Xikteixmatiltikan itech okseki xolalmej itachiualisuan. Xikijtokan ke itokay moueyitalij” (Isaías 12:4).

Jesús kitekitiltij itokay Dios uan kinixmatiltij imomachtijkauan. Tein melauj, se tonal kitataujtij iTajtsin: “Nejua nikinixmatiltij motokay”. ¿Keyej kichiuak? Yejua kijtoj: “Uan ijkon netasojtalis tein ika tinechtasojtak maj iniuan yeto, uan nejua iniuan” (Juan 17:26, TNM).

Walter Lowrie, akin momachtia tein kichiuaj itech taneltokalis, kijkuiloj: “Taltikpaknenkej akin amo kiixmati Dios ika itokay, amo yekmelauj kiixmati [...] uan amo ueli kitasojta komo kiixmati sayoj kemej se chikaualis”.

Se takat akin monotsa Victor chijchikueyitika yaya tiopan, sayoj ke kimachiliaya ke amo senkis kiixmatia Dios. Yejua kijtoua: “Keman nikmatik ke Dios monotsa Jiova, nikmachilij kemej yeskia yekin timoixmatkej. Uelik nikixmatik Dios akin nochipa ika tajtouayaj. Peuak nikita kemej se aksa akin yekmelauj nemi uan mochiuak notasojikniuj”.

Uan Jiova motokia iniuan “akin [tanemiliaj] itech itokay” uan motenkaua: “Nikinnextilis teiknelilis, ijkon kemej se takat kinextilia teiknelilis ikonetsin akin kitekitilia” (Malaquías 3:16, 17). Dios no kintatiochiuia akin kinotsaj ika itokay. Biblia kijtoua: “Nochin akin kijtouaj itokay Jiova makisaskej” (Romanos 10:13, TNM).