TÓPIKO PRINSIPAL | MENTIRA KU TA ALEHÁ HENDE FOR DI DIOS
E Mentira Ku Dios No Tin un Nòmber
LOKE HOPI HENDE TA KERE
“Nos no a yega na ningun akuerdo enkuanto si Dios tin un nòmber. I te na ora e tin mes, nos no sa kiko e nòmber ei lo ta.”
LOKE BEIBEL TA BISA
Dios a deklará: “Ami ta [Yehova, NW], esei ta mi nòmber.” (Isaías 42:8) Yehova ta un nòmber hebreo ku ta nifiká “E Ta Kousa pa Bira.”
Yehova ke pa nos usa su nòmber. Beibel ta bisa: “Invoká su nòmber. Hasi su echonan konosí entre e pueblonan; hasi nan kòrda ku su nòmber ta halsá.”
Hesus mes a usa e nòmber di Dios. Hesus a bisa su tata den orashon: “Mi a hasi bo nòmber konosí na nan [Hesus su disipelnan] i lo mi sigui hasié konosí.” Dikon Hesus a siña su disipelnan e nòmber di Dios? El a sigui bisa: “Pa nan por demostrá e amor ku bo [Dios] a stima mi kuné i pa mi por ta den union ku nan.”
DIKON ESEI MESTER INTERESÁ BO
E teólogo Walter Lowrie a skirbi: “E hende ku no konosé Dios pa nòmber no konos’é komo persona, ni e no por stim’é si e konos’é solamente komo un forsa sin personalidat.”
Un hòmber ku yama Victor tabata bai misa tur siman, ma e no tabata sinti ku e konosé Dios. El a bisa: “Ora mi a siña ku Dios su nòmber ta Yehova, ta komo si fuera el a sera konosí ku mi ofisialmente. Mi a sinti ku por fin mi a konosé e Persona ku mi a tende asina tantu di dje. El a bira un Persona real pa mi, i mi a kuminsá mir’é komo mi amigu.”
Yehova, di su banda, ta hala serka di hende ku ta usa su nòmber. E ta primintí esnan ku konosé su nòmber ku lo e no bandoná nan tanten ku nan ta busk’é. (Salmo 9:10) Tambe Dios ta bendishoná esnan ku ta invoká su nòmber. Beibel ta bisa: “Tur hende ku invoká e nòmber di Yehova lo ser salbá.”