NKHANI ZAKWAMBILIRA | MAUTESI AGHO GHAKUTONDESKA ŴANTHU KUTEMWA CIUTA
Utesi Wakuti Ciuta Walije Zina
IVYO ŴANANDI ŴAKUGOMEZGA
Profesa munyake wa vyacisopa wakati: “Ticali tindakolerane pa fundo yakuti Ciuta wali na zina. Ndipo para wali nalo, titenge ni njani?”
KASI BAIBOLO LIKUTI WULI?
Ciuta wakati: “Ine ndine Yehova; ili ndilo zina lane.” (Yesaya 42:8) Zina lakuti Yehova mu Cihebere likung’anamura kuti “Wakupangiska kuŵako.”—Genesis 2:4, 5a.
Ciuta wakukhumba kuti tilizunurenge zina lake. Baibolo likuti: ‘Cemani zina lake; thuwuskani milimo yake mukati mwa ŵanthu, pharazgani pakweru kuti zina lake lakwezgeka.’—Yesaya 12:4.
Yesu wakazunuranga zina la Ciuta. Apo wakalombanga kwa Yehova wakati: “Naŵamanyiska [ŵasambiri] zina linu ndipo nilimanyiskenge.” Cifukwa wuli Yesu wakamanyiska ŵasambiri ŵake zina la Ciuta? Iyo wakalutizga kuti: “Mwakuti citemwa ico mwanitemwa naco ciŵenge mwa iwo ndipo ine mu umoza na iwo.”—Yohane 17:26.
CIFUKWA WULI NCHAKUZIRWA KULIMANYA?
Munthu munyake wakusanda vyacisopa wakati: “Munthu uyo wakuleka kumanya zina la Ciuta, ndikuti wakumumanya yayi. Kweniso nchakusuzga kuti munthu watemwe Ciuta usange wakugomezga waka kuti Ciuta ni nkhongono yambura kuwoneka.”
Kubisa zina leneko la Ciuta panji kubatikapo linyake vikuyana waka na kuliwuskiramothu mu Baibolo
Munthu munyake zina lake Victor, wakalutanga ku chalichi sabata yiliyose, kweni wakawonanga kuti wakumumanya yayi Ciuta. Iyo wakati: “Pamasinda nkhasambira kuti zina la Ciuta ni Yehova. Apa nkhajulika ku maso. Vikaŵa nga nakumana na munthu uyo nkhapulikanga waka vya ivyo. Nkhamba kugomezga kuti Ciuta waliko ndipo nkhamba kumutemwa.”
Nakuti Yehova wakuŵa paubwezi na ŵanthu awo ŵakuzunura zina lake. Pakuyowoya za awo ‘ŵakulanguruka pa zina lake,’ Ciuta wakuti: “Ndiŵalengere lusungu nga ndi [umo] wiske wakulengera lusungu mwana wake uyo wakumuteŵetera.” (Malaki 3:16, 17) Ciuta wakutumbikaso awo ŵakucema pa zina lake. Baibolo likuti: “Waliyose uyo wakucema pa zina la Yehova wazamuponoskeka.”—Ŵaroma 10:13.
Panji Mungatemwa Kuŵerengaso Nkhani Izi
VISAMBIZGO VYAKUZIRWA VYA MU BAIBOLO
Kasi Chiuta Wali na Zina?
Chiuta wali na mazina ghanandi gha udindo, iyo ni Chiuta Wankhongonozose, Mlengi na Fumu. Kweni zina la Chiuta likusangika m’malo ghakukwana 7,000 mu Baibolo.
