“Eita te manaˈo o te taatoaraa e tu ra no te parau e iˈoa to te Atua, oia atoa, eaha tera iˈoa.”—Orometua David Cunningham, Theological Studies.

Ua parau te Atua: “O vau o Iehova, o to ˈu ïa iˈoa.” (Isaia 42:8) Na roto i te reo Hebera, “Na ˈna e faariro” te auraa o te iˈoa “Iehova.”—Exodo 3:14.

Te hinaaro ra Iehova ia faahiti tatou i to ˈna iˈoa. Te na ô ra te Bibilia: “E tiaoro atu i to ˈna iˈoa; e faaite i te taata i ta ˈna mau ravea puai; e faaite outou i te teitei o to ˈna ra iˈoa.”—Isaia 12:4.

E faaohipa na Iesu i to te Atua iˈoa. A pure ai, ua parau oia ia Iehova: “E ua faaite atu hoi au ia ratou [ta Iesu mau pǐpǐ] e e faaite atu â vau, i to oe iˈoa.” No te aha Iesu i na reira ˈi? Ua pahono atu oia mai te here o te Atua ia ˈna, ia faatupu atoa ratou i tera here ia hoê o ˈna e ratou.—Ioane 17:26.

Ua papai te orometua no te mau haapiiraa faaroo, Walter Lowrie: “Te taata i ore i ite e iˈoa to te Atua aita ïa oia e tiaturi papu ra e te vai nei O ˈna. Mai te peu e e puai noa te reira no ˈna, eita ïa ta ˈna e nehenehe e here atu.”

I haere pinepine na Victor i te fare pure i te mau hebedoma atoa. No ˈna râ, aita oia i ite o vai mau te Atua. Te parau ra o ˈna: “A haapii ai râ vau e o Iehova te iˈoa o te Atua, e au ra e ua faaite mai oia o vai ra o ˈna. I faarooroo na vau i to ˈna parau, i teie nei râ, ua matau vau ia ˈna. Mea mau te Atua no ˈu e te faatupu ra vau i te taairaa piri e o ˈna.”

E haafatata Iehova i te taata e faaohipa i to ˈna iˈoa. No “tei manaˈo i to ˈna ra iˈoa,” ua fafau te Atua: “E riro ratou na ˈu . . . ei taoˈa maitai roa ra; e na ˈu e faaherehere ia ratou mai te taata e faaherehere i ta ˈna ihora tamaiti ia tavini atu ia ˈna ra.” (Malaki 3:16, 17) E haamaitai atoa te Atua i te feia e faahiti i to ˈna iˈoa. Te na ô ra te Bibilia: “O te tiaoro atoa hoi i te iˈoa o Iehova ra, e hope roa ïa i te ora.”—Roma 10:13.