«Худаниң хас исми бар-йоқлиғи мәсилисидә ортақ пикиргә кәлмидуқ. Һәтта бар болсиму, униң исми қандақ болуши мүмкин» (профессор Дейвид Каннингем, «Theological Studies» журнали).

Тәңри Йәһва Йәшая пәйғәмбәргә мундақ дәп ейтқан: «Мән “Яһвәһдурмән”, бу Мениң намимдур» (Йәшая 42:8, ҺЗ). Бу исим уйғур тилида «Йәһва» дәпму тәрҗимә қилиниду. Ушбу исим «У болғузиду» дегән мәнаға егә.

Йәһва Өзиниң хас исмини ишлитишимизни халайду. Муқәддәс китаптин мундақ сөзләрни оқуймиз: «Униң намини чақирип нида қилиңлар. Униң әмәллирини хәлиқләр арисида аян қилиңлар, Униң наминиң зор аброй тапқанлиғини җакалаңлар» (Йәшая 12:4).

Худаниң пәйғәмбәрлиридин бири һәзрити Әйса әләйһиссалам Тәңриниң исмини ишләткән. У өз шагиртлири һәққидә ойлап, Худаға дуа қилғанда, мундақ дәп ейтқан: «Сениң исмиңни мән уларға аян қилдим һәм йәниму аян қилимән. Мән улар билән бирликтә болушум үчүн, Сән маңа көрсәткән меһир-муһәббәтни уларму көрсәтсун» (Йоһан 17:26).

«Худаниң хас исмини билмәйватқан киши әсли Униң кимлигини билмәйду... вә [бундақ адәм] әгәр Уни шәхс әмәс, пәқәт күч сүпитидә билсә, Уни сөйәлмәйду»,— дәп язған Уолтер Лори исимлиқ дин тәтқиқатчиси.

Виктор исимлиқ бир киши һәр һәптә чиркоға баратти. Амма у өзини Худани һәқиқий тонуғандәк һис қилмиған. У мундақ дегән: «Мән Худаниң исми Йәһва екәнлигини билгәндин кейин, худди Уни маңа рәсмий тонуштурғандәк һис қилдим. Ахирида мән бәк көп аңлиған Худани тонудум. Худа мән үчүн һәқиқий, тирик Шәхс болди: Униң билән достлишишқа болидиғанлиғини чүшинип йәттим».

Худаниң исмини ишлитиватқан кишиләрни У қәдирләйду вә уларға йеқинлишиду. «Униң наминиң [исиминиң] шан-шәривини издигүчиләрниң» һәммисигә Худа Өзи шундақ вәдә бериду: «Худди ата өзиниң бойсунидиған балисиға рәһим қилғандәк, Мәнму уларға рәһим қилимән» (Малаки 3:16, 17, ҺЗ). Шуниңдәк, Алла Өзиниң хас исмини чақириватқанларниму мукапатлайду. Муқәддәс Язмиларда шундақ сөзләр бар: «Йәһваниң исмини чақириватқан һәрқандақ киши қутқузулиду» (Римлиқларға 10:13).