Ulongisi umue wo Teologiya o tukuiwa hati, David Cunningham wa popia hati: “Oku vangula catiamẽla konduko ya Suku, ka ci lomboloka oku yi tukula, pole, ci lomboloka oku tatãla nda eye o kuete muẽle onduko ale sio.”

Suku wa popia hoti: “Ame Yehova, oyo onduko yange.” (Isaya 42:8) Kelimi lio Heveru onduko “Yehova” yi lomboloka okuti, “O Tẽlisa Ocipango Caye.”—Efetikilo 2:4.

Yehova o yongola okuti tu tukula onduko yaye. Embimbiliya li vetiya ndoco: “Vilikiyi onduko yaye. Sapuili olofeka ovilinga viaye. Sapuli okuti onduko yaye ya kemãla.”—Isaya 12:4.

Yesu wa enda oku tukula onduko ya Suku. Eye vohutililo wa sapuila Yehova hati: “Nda va lomboluila onduko yove, kuenje, lopo ndi va yi lomboluila.” Momo lie Yesu a sapuilila onduko ya Suku ko londonge viaye? Eye wamisako hati: “Ocisola wa ndi sola laco [a Suku], ci kale lavo, kuenje, ame ndi kala vomunga kumue lavo.”—Yoano 17:26.

Ulume umue o tukuiwa hati, Walter Lowrie wa lilongisa o teologiya wa soneha hati: “Omunu wosi ka kũlĩhile Suku konduko, ka tava okuti eye omunu, kuenda ka pondola oku u sola. Momo wo tenda ndongusu yimue yi kasi kolonepa viosi.”

Ulume umue o tukuiwa hati, Victor olosemana viosi wa endaenda konembele, pole wa limbukile okuti ka kũlĩhĩle Suku. Eye wa popia hati: “Noke yoku lilongisa okuti onduko ya Suku, Yehova, ca kala ndu a situluiwa kokuange. Nda liyeva ndu okuti nda li sanga lomunu Umue nda yevaile ño. Nda limbuka okuti eye omunu kuenje nda fetika oku kuata ukamba laye.”

Yehova o sanda oku kuata ukamba lomanu va tukula onduko yaye. Catiamẽla komanu “vana va sokolola onduko yaye,” Suku wa likuminya hati: “Ndi va popela ndeci onjali yi popela omõlaye u vumba.” (Malakiya 3:16, 17) Suku o sumũlũisavo vana va vilikiya onduko yaye. Embimbiliya li popia hati: “Vosi va vilikiya loku tukula onduko ya Ñala [Yehova] va popeliwa.”—Va Roma 10:13.