Muphurofesa David Cunningham o gudelaho zwa vhurereli o ri: “A ri athu u tendelana kha uri Mudzimu u na dzina na uri arali e naḽo ndi ḽifhio.”

Mudzimu o ri: “Ndi nṋe Yehova. Ndi ḽone dzina ḽanga.” (Yesaya 42:8) Yehova ndi dzina ḽa Tshihevheru ḽine ḽa amba uri “U Ita Uri Zwi Vhe Hone.”​—Genesi 2:4, ṱhaluso i re magumoni a siaṱari.

Yehova u ṱoḓa ri tshi shumisa dzina ḽawe. Bivhili i ri: “Vhidzelelani dzina ḽawe, ḓivhadzani vhathu mishumo yawe! Ni vha ḓivhadze uri dzina ḽawe ḽo huliswa.”​—Yesaya 12:4.

Yesu o shumisa dzina ḽa Mudzimu. Yesu o rabela kha Yehova a ri: “Ndo vha ḓivhadza dzina ḽau [hu khou ambiwa vhafunziwa vha Yesu], ndi ḓo dzula ndi tshi ḽi ḓivhadza.” Ndi ngani Yesu o ḓivhadza vhafunziwa vhawe dzina ḽa Mudzimu? O ri: “Uri vha fune vhaṅwe vhathu nga nḓila ye wa mpfuna ngayo na uri ndi vhe na vhuthihi navho.”​—Yohane 17:26.

Walter Lowrie we a gudela zwa vhurereli o ṅwala uri: “Muthu ane a sa ḓivhe dzina ḽa Mudzimu a nga si kone u ḓivha Mudzimu zwa vhukuma nahone a nga si kone u mu funa arali a tshi vhona u nga a si wa vhukuma.”

Muṅwe munna ane a pfi Victor o vha a tshi ya kerekeni vhege iṅwe na iṅwe, fhedzi o vha a tshi pfa u nga ha ḓivhi Mudzimu. U ri: “Musi ndi tshi guda uri dzina ḽa Mudzimu ndi Yehova, zwo vha zwi tshi tou nga ndi hone ndi tshi khou mu ḓivha lwa u tou thoma. Ndo pfa u nga ndi hone ndi tshi khou ḓivha muthu we ha vha hu kale ndi tshi khou pfa nga hae. Ndo mu dzhia e wa vhukuma nahone nda vha na vhushaka havhuḓi nae.”

Na Yehova u sendela tsini na vhathu vhane vha shumisa dzina ḽawe. Yehova o fhulufhedzisa vhane vha “elekanya nga ha dzina ḽawe” uri u “ḓo vha pfela vhuṱungu, u fana na munna ane a pfela vhuṱungu murwa wawe ane a mu shumela.” (Maḽeaxi 3:16, 17) Mudzimu u dovha a lambedza vhane vha vhidzelela dzina ḽawe. Bivhili i ri: “Vhoṱhe vha vhidzelelaho dzina ḽa Yehova vha ḓo tshidzwa.”​—Vharoma 10:13.