“Dawori m’agan’mad ngay ko rayog ni nga nog ‘fare’ ngachal rok Got fa danga’, ma mus ni faanra nga u nog, ma ku dawor nnang ko mang e re ngachal nem.”​—David Cunningham, Sensey ko Theological Studies.

Ke yog Got ni gaar: “Ke mus ni gag e Somol * ni Got rom. Dariy yugu reb e kan ni taareb rogomow.” (Isaiah 42:8) Fare ngachal ni Jehovah e ba ngachal ni Hebrew. Fan e re ngachal nem e “Ma K’aring ni Nge Buch.”

Baadag Jehovah ni nga u dogned fithingan. Be gaar e Bible: “Yad urngin ni ngar pininged e sorok nga fithingan Somol. Fithingan e ir e th’abi ga’ u fithik’ urngin e ngachal; ma feni sorok e ba tolang ko fayleng nge tharmiy!”​—Ps. 148:13.

I fanay Jesus fithingan Got. I meybil ngak Jehovah ni gaar: “Ngan tay fan fithingam nib thothup.” (Matthew 6:9) I yog Jesus fithingan Got ngak pi gachalpen ngar nanged. Mang fan ni rin’ e re n’ey? I yog ni gaar: “Bochan e rogon ni gub t’uf rom e ngki yog ngorad, me yog ni gu par u fithik’rad.”​—John 17:26.

I yog Walter Lowrie ni ir be’ ni ma fil murung’agen e teliw nge Got ni gaar: “Be’ nde nang fithingan Got e gathi riyul’ ni manang Got. Dabiyog ni nge t’uf Got rok ni faanra kemus ni ma lemnag ni Got e ir be’ nib gel gelngin ma dariy e tha’ u thilrow.”

Victor e be’ ni ma yan nga galesiya ni gubin e wik, machane ma lemnag ni gathi ri manang Got. I yog ni gaar: “Kug fil ni Jehovah fithingan Got, ma gowa ka fin gu nang nib fel’ rogon. Gowa ka fin gu mada’gow Be’ ni ke yoor ban’en ni gu ma rung’ag ni yima weliy u murung’agen, machane dawor gguy. Ke riyul’ u wan’ug ma ke fel’ e tha’ u thilmow.”

Ma chugur Jehovah ngak e piin ni yad ma fanay fithingan. Ke micheg Got ngak e ‘piin ni bay madgun u wan’rad’ ma yad ma lemnag fithingan ni gaar: “Bay gu runguyrad ni bod ba matam ni runguy ba pagel ni fak ni ma pigpig ngak.” (Malaki 3:16, 17) Ku ma tow’athnag Got e piin ni yad ma pining fithingan. Be gaar e Bible: “En nra pining fithingan Somol [Jehovah] ni nge ayuweg e ra fos ni ke thap ngak.”​—Roma 10:13.