Tuˈugë diksionaaryë jyënaˈany: “Trinidad, tsip yajjaygyukët, mä tuˈuk jeˈeyë Dios ets tëgëëgë jäˈäy, ja Teety, ja Uˈunk ets ja Espiritë Santë”. (El Diccionario Akal crítico de teología.) Ets jatuˈugë diksionaaryë jyënaˈany: “Katolikëtëjk, ortodoxos, anglicanos etsë protestantes nanduˈun tmëbëktë”. (Diccionario abreviado del cristianismo.)

Jesus, Diosë yˈUˈunk, ninäˈä kyajënany ko tuknax mëdë Tyeety. Yëˈë jyënany: “Nnejxy[ëts] mä Dios Teety, mët ko yëˈë dëˈën niˈigyë mëj këdiinëm ëj” (Fwank 14:28). Nanduˈun niduˈugë yˈëxpëjkpë tˈanmääy: “Patëjkënëpts mätsë nDeety diˈibë miitsëty nandëˈën mDeetyˈäjttëp, ëjtsë nDios es miitsëty ja mDios” (Fwank 20:17).

Espiritë santë kyaj yëˈëjëty tuˈugë jäˈäy. Pënaty tim jawyiin pyanëjkxtë Kristë, ojts ja “Espiritë Santë niduˈuk niduˈuk yˈadëgëëy jyottëgëëyëgëxy”. Etsë Jyobaa jyënany: “Nyajwäˈkxtaˈawëëybyëty jaˈa nˈespiritu mä jaˈa naaxwiinyjyaˈay” (Hechos 2:1-4, 17, Nuevo Testamento de Mazatlán). Espiritë santë kyaj yëˈëjëty niduˈugë jäˈäy diˈib mä Trinidad, yëˈë yˈandijpyë Diosë myëjää.

Majtskë ëxpëkyjyaˈay diˈib katolikë diˈib yajniwij yajnikajtëbë Biiblyë, Karl Rahner etsë Herbert Vorgrimler, jyënäˈändë ko Trinidad “kyaj mbäät yaˈixyˈaty pën kyaj yajnipaˈanduˈuty,  ets oyxyëp jyaniwatspë kyaj mbäät yajjaygyujkëtyaˈay”. Per ¿mbäät ntsojkëm ja diˈib kyaj nˈixyˈäjtëm ets diˈib kyaj njaygyujkëm? Kyaj. Päätyë tyäˈädë tukniˈˈijxën diˈib mä Trinidad, yajtuˈudujkypyë jäˈäy parë kyaj ttsokëdë Dios.

Marco diˈib të yajmaytyaˈaky mä myëduˈukpë artikulo, tˈijxy ko ja tukniˈˈijxën diˈib mä Trinidad yajtuˈudujkëp parë kyaj tˈixyˈatëdë Dios. Yëˈë jyënaˈany: “Duˈunëtsë nety nwinmay ko Dios kyaj nyayajnigëxëˈëgäˈänyëty, ets pääty jantsy tsipë nety parëts nˈixyˈatët ets parëts nmëwingonët”. Perë Biiblyë jyënaˈany ko “kyaj jagam yˈity ja Dios. Taa jaˈa mä ëtsäjtëm niduˈuk niduˈuk” (Apostʉlʉty 17:27). Dios kyaj nyaygyuyuˈutsyëty, nayajnigëxëˈkëp pënën yëˈë. Jesus jyënany: “Nnijäˈädëpts tits nˈawdäjttëp” (Fwank 4:22).

Marco yˈakjënäˈäny: “Kojëts njaygyujkë ko Dios kyaj yëˈëjëty tuˈugë Trinidad, taanëmtsë net mëët naymyaaybyëjkë”. Duˈunë duˈun, pën nˈijxëmë Jyobaa extëm tuˈugë jäˈäy ets kyaj extëm diˈib tsip yaˈixyˈatëp, ta kyaj nëjkx xytsyiptakxëm ntsojkëm. Biiblyë jyënaˈany: “Diˈibë kyaj tmëdaty ja tsojkën, kyaj yëˈëjëty tˈixyˈattë Dios, mët ko Dios yëˈë dëˈën ja tsojkën” (1 Fwank 4:8).