Onongeleya ononene ononthatu Mbovakristau vomouye o Katolika Romana, no Ortodoxa Oriental, no Protestande vetavela okuti Huku wike Movanthu vetatu: Huku Tate, Huku Mona, Huku Ospilitu Sandu. Ovakristau vomouye valongesa okuti otyo katyilekesa okuti vetavela kono huku ononthatu, mahi ovanthu ovo vetatu, omunthu wike vala.​—Omukanda New Encyclopedia Britannica.

Jesus, Omona wa Huku, nalumwe apopile okuti oe na Tate yae omunthu wike vala. Mahi, wati: “Mandyende ku Tate, mokonda Tate omunene vali kuame.” (João 14:28) Tupu wapopilile umwe povalanduli vae okuti: “Ame ndyikahi nokulonda ku Tate yange na Tate yenyi, ku Huku yange na Huku yenyi.”​—João 20:17.

Ospilitu sandu hamunthu ko. Ovakristau votete “vakalele tyeyula ospilitu sandu,” iya Jeova wapopile okuti: “Mandyikauyulila ononkhono mbange kovanthu aveho.” (Atos 2:1-4, 17) Ospilitu sandu ha huku ko. Mahi ononkhono Huku aundapesa opo alinge ovipuka.

Ovanongo vo Katolika Karl Rahner na Herbert Vorgrimler, vapopia konthele Youtatu Ukola okuti: ‘Inkha kauhangununwa na Huku kaupondola okunoñgonokwa, iya alo umwe tyina wamahangununwa nkhele tyipuiya okuunoñgonoka nawa.’ Okuti tyilityili upondola okukala nohole nomunthu uhevili okunoñgonoka? Elongeso lio Utatu Ukola, lityilika ovanthu okunoñgonoka Huku nokukala nohole nae.

Marco, wapopiua monthele yotete, wanoñgonoka okuti Outatu Ukola ankho umutyilika. Wati: “Ankho ndyisoka okuti Huku kahande ndyimunoñgonoke, alo umwe kesukile naame, omaelema, iya kahande ovanthu vafuene kwe.” Mahi, Ombimbiliya ipopia okuti Huku “kekahi kokule na kese umwe puonthue.” (Atos 17:27) Otyo tyilekesa okuti tyilityili Huku uhanda tumunoñgonoke. Jesus wati: “Onthue tufenda etyi twii.”​—João 4:22.

Marco wati: “Etyi nanoñgonoka okuti Huku ha Utatu Ukola, netyivila okulinga oupanga nae.” Inkha tutala Jeova ngatyina Omunthu, atuhemutale okuti omaelema, matyitukuatesako okukala nohole nae. Ombimbiliya yati: “Omunthu uhena oluembia, kenenoñgonoke Huku, mokonda Huku oluembia.”​—1 João 4:8.