EDWƐKƐ TITILE | ADALƐ MƆƆ MAA BƐDWENLE KƐ NYAMENLE ƐNLƐ ƐLƆLƐ LA
Adalɛ Mɔɔ Bɛbɔ Kɛ Nyamenle Le Feabo
MƆƆ MENLI DƆƆNWO DIE DI LA Keleseɛne ɛzonlenlɛ “afoa nsa ne mɔɔ le Katɔlek, Aduduleɛ Ɛzonlenlɛ nee Protestant la die Nyamenle ko mɔɔ wɔ nu nsa la to nu kɛ: Nyamenle Selɛ, Nyamenle Ralɛ, yɛɛ Nyamenle Sunsum Nwuanzanwuanza wɔ ɛkɛ. Kɛmɔ Keleseɛnema kile la, edwɛkɛ ɛhye ɛngile kɛ nyamenle nsa a wɔ ɛkɛ a na emomu menli nsa ɛhye le ko.”—The New Encyclopædia Britannica.
BAEBOLO NE ANU NƆHALƐ NE Gyisɛse, Nyamenle Ra ne anga kɛ ɔ nee Selɛ ne sɛ anzɛɛ bɛle ko. Emomu, ɔhanle kɛ: ‘Melɛkɔ Selɛ ne anwo lɔ, ɔboalekɛ Selɛ ne le kpole tɛla me.’ (Dwɔn 14:28) Eza ɔhanle ɔhilele ye ɛdoavolɛma kɛ: “Melɛkɔ Egya nee bɛ Ze ne, me Nyamenle nee bɛ Nyamenle ne anwo lɔ.”—Dwɔn 20:17.
Sunsum nwuanzanwuanza ne ɛnle nyamenle. “Sunsum Nwuanzanwuanza ne rayile” alumua Keleseɛnema na Gyihova hanle kɛ: “Mebamaa me sunsum ne ara menli muala anwo zo.” (Gyima ne 2:1-4, 17) Sunsum nwuanzanwuanza ne ɛmboka Nsa-Ko ne anwo. Ɔle Nyamenle gyimayɛlɛ tumi.
DEƐMƆTI ƆHYIA LA Katɔlek mbɔlɔba Karl Rahner nee Herbert Vorgrimler kilehile Nsa-Ko ne anu kɛ, “kyesɛ ɔlua yekile zo na awie anwu ye, na bɛye bɛkile awie bɔbɔ a ɔnrɛhola ɔnrɛde ɔ bo bɔkɔɔ.” Asoo ɛbahola wɔahulo awie mɔɔ ɛngola ɛnnwu ye anzɛɛ ɛnde ye edwɛkɛ bo la? Ɛhye ati, Nsa-Ko ngilehilelɛ ne le adenzilɛ mɔɔ ɔmmaa bɛnnwu Nyamenle na bɛahulo ye a.
Marco, mɔɔ yɛlumuale yɛhanle ɔ nwo edwɛkɛ la nwunle Nsa-Ko ne kɛ ɔle adenzilɛ. Ɔka kɛ: “Ɛnee medwenle kɛ Nyamenle ɛlɛfa kɛzi ɔde la yeavea me, na ɛhye manle mendele nganeɛ kɛ ɔwɔ moa, ɔle feabo yɛɛ mekɔ ye ɛkɛ a ɔnyɛ boɛ.” Noko akee, “Nyamenle ɛnle basabasa Nyamenle.” (1 Kɔlentema 14:33) Ɔtɛfale kɛzi ɔde la ɔtɛfeale yɛ. Ɔkulo kɛ yɛnwu ye. Gyisɛse hanle kɛ: “Yɛze mɔɔ yɛsonle ye la.”—Dwɔn 4:22.
Marco ka kɛ: “Mekɛ mɔɔ menwunle kɛ Nyamenle ɛnle Nsa-Ko la, mengolale me nee ye yɛle agɔnwolɛ.” Saa yɛbu Gyihova kɛ ɔle ngakyile na yeambu ye kɛ ɛyɛvolɛ bie mɔɔ ye edwɛkɛ le feabo la a, ɔnrɛyɛ se kɛ yɛbahulo ye. Baebolo ne ka kɛ, “Awie biala mɔɔ ɛnlɛ ɛhulolɛ la ɛnze Nyamenle, ɔluakɛ Nyamenle le ɛhulolɛ.”—1 Dwɔn 4:8.
