KOTA MAMA-TENE NI | ATËNË TI MVENE SO ASARA SI AMBENI ZO AYE NZAPA APE
Tënë ti mvene so asara si zo ahinga li ti lo na Nzapa ape
YE SO AZO MINGI AMÄ NA BÊ DÄ
Bungbi ti nzapa ti aChrétien, “so akota mbage ni ayeke Eglize Catholique, Eglize Orthodoxe nga na Eglize ti aProtestant, atene so Nzapa ayeke oko me na yâ ti lo ala yeke ota, so ti tene Nzapa Babâ, Nzapa Molenge na Nzapa Yingo vulu. Ti ala, tënë ni so aye pëpe ti sara tënë ti anzapa ota me aye ti tene so anzapa ni ota kue ayeke na yâ ti tere oko.”—The New Encyclopædia Britannica.
TÂ YE SO BIBLE AFA
Jésus, so ayeke Molenge ti Nzapa, atene lâ oko ape so lo na Babâ ti lo alingbi tere wala ala yeke gi zo oko. Nde na so, lo tene: “Mbi yeke gue na Babâ, teti Babâ ayeke kota ahon mbi.” (Jean 14:28). Lo tene nga lani na mbeni oko ti adisciple ti lo, lo tene: “Mbi yeke montê na Babâ ti mbi nga Babâ ti ala, na Nzapa ti mbi nga Nzapa ti ala.”—Jean 20:17.
Yingo vulu ayeke mbeni nzapa ape. Lani, akozo Chrétien “asi na yingo vulu”, nga Jéhovah atene: “Mbi yeke mû ande mbeni mbage ti yingo ti mbi ti tuku ni na ndo ti mara ti azo nde nde kue.” (Kusala 2:1-4, 17). Yingo vulu ayeke mbeni mbage ti Trinité ape. A yeke ngangu ti Nzapa.
NDANI SO A YEKE KOTA YE TI HINGA NI
Pakara Karl Rahner nga na Herbert Vorgrimler atene: “Tënë ti Trinité ayeke mbeni ye so zo ayeke hinga ni gi tongana Nzapa afa ni na lo. Me même tongana lo fa ni, zo ayeke mä yâ ni nzoni kue ape.” Mo lingbi biani ti ye mbeni zo so a yeke ngangu ti tene mo hinga lo? Tënë ti Trinité akanga lege na azo ti hinga Nzapa na ti ye lo.
Marco, so e sara tene ti lo na yâ ti kozo article ni, abâ tënë ti Trinité tongana mbeni ye so ayeke kanga lege na zo. Lo tene: “Mbi pensé ti mbi lani so Nzapa aye pëpe si mbi hinga lo, nga lo yo même mingi na azo, zo ahinga li ti lo na lo ape nga zo alingbi ti si nduru na lo ape.” Me, Bible atene ti lo atene ‘lo yeke yongoro pëpe na e oko oko kue.’ (Kusala 17:27). Lo honde tere ti lo na e ape. Lo ye si e hinga lo. Jésus atene: “E voro ye so e hinga.”—Jean 4:22.
Me, Marco atene: “Na ngoi so mbi ga ti manda so Nzapa ayeke pëpe mbeni mbage ti Trinité, lege azi na mbi fadeso ti lë songo na lo.” Tongana e bâ Nzapa tongana mbeni tâ zo lo oko me pëpe mbeni ye so zo ahinga li ti lo na ni ape, a yeke duti ande ngangu na e ape ti ye lo. Bible atene: “Zo so ayeke na ndoye pëpe ahinga Nzapa pëpe, ndali ti so Nzapa ayeke ndoye.”—1 Jean 4:8.
