INFORMASAUN IHA OIN | LIA-BOSAK NEʼEBÉ HADOOK EMA HUSI MAROMAK
Lia-bosok katak Maromak mak mistériu
BUAT NEʼEBÉ EMA BARAK FIAR
Relijiaun Kristaun tolu neʼebé boot liu iha mundu fiar katak Maromak mak parte ba Trindade, katak Maromak Padre, Maromak Filho, no Maromak Espíritu Santu. Neʼe la dehan katak sira fiar maromak tolu, maibé katak naʼin-tolu neʼe mak Maromak ida deʼit.—The New Encyclopædia Britannica.
LIA-LOOS HUSI BÍBLIA
Maromak nia Oan-Mane Jesus, nunka hatete katak nia iha pozisaun hanesan ho Maromak ka katak sira mak ida deʼit. Maibé nia hatete: “Haʼu atu laʼo ba Aman, tanba Aman mak boot liu haʼu.” (João 14:28) Jesus mós hatete ba ninia dixípulu ida: “Haʼu sei saʼe ba haʼu-nia Aman no imi-nia Aman, ba haʼu-nia Maromak no imi-nia Maromak.”—João 20:17.
Espíritu santu laʼós maromak ida. Ema Kristaun iha tempu uluk “sai nakonu ho espíritu santu” no Jeová hatete: “Haʼu sei fakar haʼu-nia espíritu ba ema oioin.” (Apóstolu 2:1-4, 17) Espíritu santu laʼós parte ba Trindade. Espíritu santu mak Maromak nia forsa.
TANBASÁ IMPORTANTE?
Matenek-naʼin rua hatete katak ita labele komprende doutrina Trindade se Maromak la ajuda, no maski karik Maromak ajuda ita, maibé ita nafatin labele komprende loloos doutrina neʼe. Ita bele ka lae, hadomi ema ida neʼebé ita la koñese ka la komprende? Doutrina kona-ba Trindade la ajuda ema atu koñese no hadomi Maromak, tanba ita labele hadomi buat neʼebé ita la komprende.
Marco neʼebé temi iha informasaun antes neʼe sente katak Trindade hanetik nia atu koñese Maromak. Nia hatete: “Haʼu hanoin Maromak subar ninia an husi haʼu no neʼe halo haʼu sente katak Maromak dook husi haʼu, nia mak mistériu ida no susar atu hakbesik.” Maibé Bíblia hatete katak Maromak “la dook husi ita ida-idak”. (Apóstolu 17:27) Maromak la koko atu subar ninia an husi ita. Nia hakarak ita atu koñese nia. Jesus hatete: “Ami adora buat neʼebé ami hatene.”—João 4:22.
Marco hatete: “Bainhira haʼu aprende katak Maromak laʼós parte ba Trindade, haʼu bele haburas relasaun besik ho nia.” Se ita haree Maromak nuʼudar Belun ida no laʼós hanesan ema neʼebé ita la koñese, neʼe halo fasil liu ba ita atu hadomi nia. Bíblia hatete: “Ema neʼebé la hatudu domin la hatene Maromak, tanba Maromak mak domin.”—1 João 4:8.