SINTTA HUUPHE YOHUWAA | ASAY XOOSSAA SIIQENNAADAN OOTTIYA WORDDUWAA
Xoossaabay Erettenna Giyo Wordduwaa
DAROTI WOYGIDI AMMANIYOONAA?
Kiristtaane geetettiya heezzu waanna haymaanooteti, hegeetikka “Rooma Kaatolikee, Arshsho Orttodookiseenne Protesttanttee, issi Xoossan heezzu bollay deˈees, hegeekka Xoossaa Aawaa, Xoossaa Naˈaanne Xoossaa Geeshsha Ayyaanaa giidi ammanoosona. Kiristtaane giyo haymaanootiyaa timirttee giyoogaadan, hegee heezzu xoossati deˈoosona giyoogaa gidennan ha heezzati issi xoossa.”—Zi Niwu Insaykloppiidiyaa Biritaanika.
GEESHSHA MAXAAFAY YOOTIYO TUMAA
Xoossaa Naˈaa Yesuusi bana Aawaara issi lagge woy bana Aawaa gi erenna. Hegaappe dumma ogiyan, “Taappe Aawai dariyo gishshau, taani Aawaakko biyoogan intte ufaittana” yaagiis. (Yohaannisa 14:28) I bana kaalliyaageetuppe issinnissi, “Taani ta Aawaakkonne intte Aawaakko, ta Xoossaakkonne intte Xoossaakko, pude bais” yaagiis.—Yohaannisa 20:17.
Geeshsha ayyaanay bolli deˈiyooba gidenna. Beni wode Kiristtaanetun “Geeshsha Ayyaanai [kumiis],” qassi Yihooway, “Taani asa ubbaa bolli ta Ayyaanaa gussana” yaagiis. (Oosuwaa 2:1-4, 17) Geeshsha ayyaanay Sillaasiyaa shaaho gidennan Xoossaa wolqqa.
HEGAA ERANA KOSHSHIYO GAASUWAA
Sillaasiyaa xeelliyaagan, Kaatolike haymaanootiyaa erancha gidida Karl Ranerinne Herbert Vorgirmilari hagaadan giidosona: “Ajjuutaana gidana xayikko erettana danddayenna, qassi ubba ajjuutan qoncci simminkka loyttidi erana danddayettenna.” Abaa erana danddayettenna uraa siiqana danddayay? Yaatiyo gishshau, Sillaasiyaa timirttee Xoossaa erennaadaaninne siiqennaadan oottiyaaba.
Koyro huuphe yohuwan abaa yootido Markkoy, Sillaasiyaa timirttee xubbiyaaba gidiyoogaa akeekiis. I hagaadan giis: “Xoossay ba oonatettaa taappe genttiyaabadan qoppaas; hegee taani ubba i haahuwan deˈiyabadan, abaa erananne akko shiiqana danddayettennabadan qoppanaadan oottiis. Gidoppe attin, “Xoossai nuuppe ooyyoonne haaho gidenna.” (Oosuwaa 17:27) I ba oonatettaa nuuppe genttenna. Nuuni a eranaadan koyees. Yesuusi, “Nu eriyoogau goinnoos” yaagiis.—Yohaannisa 4:22.
Markkoy, “Xoossay Sillaasiyaa shaaho gidennaagaa taani erido wode, aara dabbotaa medhaas” yaagiis. Nuuni Yihoowa erana danddayettennabadan gidennan, a oonatettaa erana danddayiyaabadan qoppikko, a siiqanau metootokko. Geeshsha Maxaafay, “Xoossai siiqo gidiyo gishshau, siiqenna urai ooninne Xoossaa erenna” yaagees.—1 Yohaannisa 4:8.
