«Ni riníʼ binni Trinidad nga naca Dios chonna binni, Dios Padre, Dios Hijo ne Dios Espíritu Santu.» (El Diccionario Akal crítico de teología.) Ne sti diccionariu bizeeteʼ sicaríʼ: «Ngaca runi cré ca católicu, ca ortodoxo, ca anglicano ne ca protestante» (Diccionario abreviado del cristianismo).

Qué ñuu dxi niníʼ Jesús, Xiiñiʼ Dios, biaʼca laa Bixhoze o laca laa nga Bixhoze. Laabe guniʼbe: «Chaa ra nuu Bixhozeʼ, purti jma nandxóʼ Bixhoze que naa» (Juan 14:28). Ne laabe gúdxibe tobi de ca discípulo stibe: «Chi chiba ra nuu Bixhoze ne Bixhoze tu, ra nuu Dios stinne ne Dios stitu» (Juan 20:17).

Cadi ti binni diʼ nga espíritu santu. Ca primé xpinni Cristu «bidxá ladxidóʼ cabe de Espíritu Santu», ne laaca guníʼ Jiobá: «Zadxiña dxi ucheeche Espíritu stinne luguiá stale binni» (Hechos 2:1-4, 17). Cadi laca Dios diʼ nga espíritu santu, sínuque stipa stiʼ Dios ni.

Ca biblista católicu Karl Rahner ne Herbert Vorgrimler, nacaʼ Trinidad ca «qué ñanda diʼ ñanna binni ni pa qué nicaacabe ti visión stini, ne despué de visión ca guirutiʼ ñanda ñene chaahuiʼ ni». Peru, ñee zanda gannaxhiinu tuuxa ni qué zanda gunibiaʼnu ne qué zanda guiénenu laa la? Qué zanda diʼ. Nga runi, qué randa rannaxhii binni Dios ora rusiidicabe de Trinidad.

Marco, hombre ni bizéʼtenu lu tema ni gudídinu ca, ora biziidibe de Trinidad qué ñanda ñunibiaʼbe Dios. Laabe guniʼbe sicaríʼ: «Guníʼ iqueʼ cucaachiʼ Dios tu laa, ngue runi jma nagana para ganna binni tu laabe ne qué zanda guidxiña laabe». Peru «Dios qué ruchenda diʼ binni» (1 Corintios 14:33, Biblia de Jerusalén). Laabe qué rucaachibe tu laabe, sínuque racaláʼdxibe gunibiaʼnu laabe. Jesús guníʼ: «Laadu rusisaca du ni runibiáʼ du» (Juan 4:22).

Sicaríʼ guníʼ Marco: «Ora biziideʼ cadi naca diʼ Dios ti Trinidad la? gunda guca xhamiguaʼ laabe». Pa guidúʼyanu Jiobá casi ñaca nidúʼyanu ti binni ne cadi casi tuuxa ni nagana para guiene binni tu laa la? jma nagueenda zannaxhiinu laabe. Biblia na: «Ni cadi nadxii stobi la? qué huayuu dxi gunibiáʼ Dios, purti de Dios nga reeda enda ranaxhii» (1 Juan 4:8).