SEBRÃ GOM-ZUG SÕSGÃ: ZIRI SẼN KƖT TƖ WÕND WẼNNAAM PA NONG TÕNDO
Wẽnnaam yaa wẽnem soaba: Ziri
NEB WƲSG SẼN TẼEDE: Sebr a yembr (Catéchisme de l’Église catholique) yeela woto: “Ned sã n maan yel-wẽn-kʋʋdga, a sã n ki bala, a sɩɩgã kẽngda bug-tẽnga, n tɩ nams bugum sẽn pa kiid pʋgẽ.” Tũudum kẽer taoor dãmb yeelame tɩ b sẽn boond tɩ bug-tẽngã yaa zĩiga, tɩ f sã n be be bɩ f zãr ne Wẽnnaam hal wʋsgo.
BIIBLÃ SẼN YETE: Biiblã yetame tɩ “kũum ka mi bũmb ye.” (Koɛɛg Soaba 9:5) Kũum sã n ka mi bũmbu, a na n yɩɩ wãn n tɩ nams bugum sẽn pa kiid pʋgẽ, bɩ n bãng meng t’a zãra ne Wẽnnaam, tɩ rẽ namsd-a?
Biiblã pʋgẽ, hebre la gɛrk gom-biis nins b sẽn lebg ne moor tɩ “bug-tẽng” bɩ “kɩɩm-kulgã” rat n yeelame tɩ yaoogo. Wala makre, a Zoob bãagã sẽn wa namsd-a wʋsgã, a pʋʋsa Wẽnnaam n yeel woto: “Kato! M paamẽ lame tɩ y solg-m bokẽ tɩ m sor be n gũudẽ.” (Zoob 14:13, Sebr Sõngo) A Zoob ra ratame tɩ Wẽnnaam solg-a yaoogẽ t’a paam n vʋʋse. A ra miime tɩ pa zĩig a sẽn na n tɩ namsdẽ, bɩ n tolg n zãag ne Wẽnnaam ye.
SƖDÃ BÃNGR YÕODO: Wẽnnaam sã n yaa wẽnem soaba, d pa na n dat n bao a zĩigẽ ye. D pʋd n na n zãaga d mens ne-a. A Rocío sẽn yit Megsikã yeela woto: “Hal m yãadmẽ, b zãmsa tõnd tɩ bugum yir beeme. Ra yɛɛsda maam wʋsgo, hal tɩ m da pa tagsd tɩ Wẽnnaam tara zʋg-sõng baa yaa a ye meng ye. M da tẽedame t’a yaa sũ-yikr soaba, n pa mi sugr ye.”
A Rocío wa n yãame tɩ Biiblã gomda Wẽnnaam bʋ-kaoorã yell vẽenega, la a wilgd bũmb ning sẽn maand ned kũum poore. Woto sõng-a lame t’a bãng tɩ Wẽnnaam ka wa yẽ sẽn da tagsdã ye. Ad a sẽn yeele: “Mam paama m menga. Yaa wa m sẽn da tʋk zɩɩbo, n paam tɩ b sik-ma. Rẽ tɛka, m kɩsa sɩd tɩ Wẽnnaam data tõnd neere, t’a nonga tõndo, la tɩ ma-me tõe n nong-a lame. A yaa wa tõnd ba sẽn gãt d nugu, n sõngd tõnd d neer yĩnga.”—Ezai 41:13.
Neb wʋsg modgdame n tũud Wẽnnaam, b sẽn yɛɛsd bugum yirã yĩnga. La Wẽnnaam pa rat tɩ y tũ-a rabeem yĩng ye. A Zezi pʋd n yeelame: ‘Nong Zu-soabã fo Wẽnnaam.’ (Mark 12:29, 30) Sẽn paase, d sã n bãng tɩ baa rũndã-rũndã menga, Wẽnnaam pa maand kɛgre, d tõogd n kɩsa sɩd tɩ beoog-daar bʋ-kaoorã sasa me, a pa na n maan kɛgr ye. Wa a Zoob zoa a Eliyu, d tõe n yeela ne bas-m-yam tɩ “Wẽnnaam sẽn tõe fãa wã zãra ne wẽnga. Bãmb ka maand wẽng ye.”—Zoob 34:10.
