“Sel lemad a rechad e a delbengir tirke el mlad el mirruul a oberaod el klengit a mo er a beluu er a ngau el mo chuarm er a blals er a beluu er a ngau, el ‘diak el ngemed el ngau.’” (Katekismo er a Ikelesia er a Katolik) A rebebil el mengeteklel a klechelid a melekoi el kmo tirke el ngar er a beluu er a ngau a kmal ileakl el cheroid er a Dios.

“Ngikel chad el mor a klengit, ngikei a mo mad.” (Esekiel 18:4) A rulekoad a “diak a ngeral lodengei.” (Olisechakl 9:5) Me a lsekum a chad a mad e diak a ngera el lodengei, e ngmekerang e sebechel el chuarm er a “diak el ngemed el ngau” me a ringel e le ngii el kmal cheroid er a Dios?

Ngar er a Biblia, e a tekoi er a Hebru me a Grik el blechoel el moiuid el “beluu er a ngau,” a mera er ngii a mesaod el kirel a debellir a rechad. El ua tiang, a Job er sera lecharm er a meringel el rakt, e ngmiluluuch el kmo: “A le chulekum ke mertak er a belurir a re mla mad [me a lechub “er a beluu er a ngau,” Douay-Rheims Version].” (Job 14:13) A Job a mle soal el olengull er a debull, el diak el ngar er a basio er a ringel el cheroid er a Dios.

A mekngit el blekeradel a diak lerellid el mo oubltikerreng el mo er a Dios, e ngbai rullid el mo cheroid er ngii. A Rocío el kiei er a Mexico a kmo: “Sera kngalek e ak mlosisechakl el kirel a blals er a beluu er a ngau. Ak kmal mlo medakt e dimlak kumdasu el kmo a Dios a ngar er ngii a ungil blekerdelel. Ak ulemdasu el kmo ngdi checherd e kesib a rengul.”

A bleketakl el omesodel a Biblia el kirel a kerrekerilel a Dios me a blekerdelir a rulekoad a ngildechii a osengel a Rocío el kirel a Dios. Ngdilu el kmo: “Ak ulemdasu er ngak el mla mengubet er a oberaod el uldesuek. Ak mocha oumerang el kmo a Dios a soal a kot el ungil el kired, e betik a rengul er kid, e ngak a sebechek el mo oubltikerreng el mo er ngii. Ngdi ua chedam el orreked a chimorir a rengelekel e soal a kot el ungil el kirir.”​—Isaia 41:13.

A rebetok a mla melasem el mo mekedung e le tir el medakt er a blals er a beluu er a ngau, engdi a Dios a diak el soal a obo mosiou er ngii e le kau el medakt er ngii. A Jesus a bai dilu el kmo: “Bo le betik a rengum er a Rubak el Dios er kau.” (Markus 12:29, 30) Me a lmuut el tang, sel bo dodengei el kmo a Dios a tabesul a omerellel er chelechang, e ngsebeched el oumerang aike el kerrekerilel er a ngar medad el taem. Ngsebeched el melekoi el di ua sechelil a Job el Elihu el kmo: “A Dios el Olab a Bek el Klisiich ng mo meruul a cheleuid?”​—Job 34:10.