Aban weyu Herusalén, aba layanuhan Hesusu luagu Lúguchi, Heowá, ani aba lafuranguagüdüni biánguati lan hagibu lábutigu relihión lidan dan ligía (Huan 8:12-30). Le lariñagubei arufuda lumuti woun ida luba lan wakutihani afiñeni le hádanbei saragu gürigia uguñe weyu luagu Bungiu. Ariñagati meha Hesusu: “Anhaün agunfulira lau nererun, hiábinba lun nani humá disipulugu le tímatimaati ábame hasubudiruni inarüni, ábame lesefurunün inarüni” (Huan 8:31, 32).

Lau lariñagun Hesusu “anhaün agunfulira lau nererun”, larufuduñein ida luba lan lasubudirúniwa anhein inarüniti lubéi aban afiñeni o iyeeniti lan. Danme le lariñawagún somu katei hun luagu Bungiu, álügüdagua humá hungua: “Úarati san katei le luma lererun o larufudahan Hesusu ani úara ligía luma le tariñagubei Bíbülia?”. Adüga huméi le meha hadügübei ha aganbubalin apostolu Pábulu: akutiha humóun Bíbülia buidu lun hachoururuni anhein inarüni lubéi le ariñawagúbei hun (Adügaü 17:11).

Ligía meha hadügübei Marco, Rosa tuma Raimunda, ha buga uágubaña wayanuha: aturiaha hamutu Bíbülia hama gefentiña luagu Heowá. Ka hafurendeirubei?

Marco: “Gefenti le meha íchugubei külase tídangiñeti Bíbülia woun yusu lumutu Bíbülia lun lóunabuni álügüdahani burí le nadügübei lun luma le tadügübei nani weiriou. Murusun murusun aba wagumeserun asandira ínsiñeni luagu Heowá. Aba giñe buídutima lan wanaagun woungua kei maríeitiña”.

Rosa: “Saminatina yebe hasaminan lan wügüriña tídanbei Bíbülia, ani háluguña lan hafuranguagüdüni tidan ka lan Búngiubei. Gama lumoun, lau lásügürün dan aba nadariruni óunabagülei tidan lun burí álügüdahani le nadügübei núniwagua. Guenlé, ábanhali gürigia inarüniti Heowá nun, ani gayarati nafiñerun luagu”.

Raimunda: “Amuriahatina luma Bungiu lun líderagunina asubudirei. Fiú dan lárigiñe, nuguya luma nani weiriei aba wagumeserun aturiahoun Bíbülia. Chülüdüga meha dan lun wafurendeiruni inarüni luagu Heowá! Wéiriti meha wagundan lau wasubudiruni ka lan luwuyeri Bungiu ligía”.

Mama afuranguagüdarügü tumuti Bíbülia iyeeni le ayanuhóubei luagu Bungiu, ayanuhatu giñe luagu lubuidun burí ligaburi. Ani íderagua tumutiwa giñe asubudirei katei “le ru laalibei Bungiu woun lau lareini” (1 Korintuna 2:12). Ka uagu makutihan hubalin hungua ka lan tarufudahabei Bíbülia luagu Bungiu, luagu lisuuni luma luagu le lunbei lasuseredun ámuñegü? Gayarati hamuriahan aban aturiahani tídangiñeti Bíbülia lidan www.pr418.com/cab o luma aban gefenti luagu Heowá. Anhein hadüga, chóuruti híchuguba lan fe luagu gayara lan línsiñedun Bungiu hun.