Un dia na Jerusalem, tan cuento si Jesus acerca na de suyu Tata, si Jehova, y ya revela le con el maga imbusterias del maga falso religioso lider na de suyu tiempo. (Juan 8:12-30) El cosa le ya habla na aquel ocasion ta enseña kanaton si paquemodo examina con el cosa ta creé el manada acerca con Dios ahora. Si Jesus ya habla: “Si ay esta ustedes fiel na dimio Palabra, ay queda ustedes mi maga dicipulo, y ay sabe ustedes si cosa el verdad, y el verdad ay hace con ustedes libre.”—Juan 8:31, 32.

“Esta ustedes fiel na dimio Palabra.” Na este texto, ta dale mira si Jesus si paquemodo kita sabe si “verdad” el un religioso enseñanza. Si tiene tu cosa ya oi acerca con Dios, pregunta na de tuyu mismo cuerpo, ‘Harmonia ba este na maga palabra de Jesus y na Sagrao Escritura?’ Imita con aquellos quien ya oi con el cosa ya habla si apostol Pablo y “todo el dia ta estudia sila el maga Escritura para sabe si deverasan aquellos maga cosa-cosa [maga cosas que ta aprende sila].”—Maga Actividad 17:11.

Si Marco, Rosa y Raymonde, que ya menciona na primer articulo na este serie, ya examina enbuenamente con el cosa sila ta creé por medio na estudiada na Biblia junto na maga Testigo de Jehova. Cosa sila ya aprende?

Marco: “El quien tan Bible study kanamon ya usa con el Escritura para contesta con el cada pregunta que tiene yo y de mio mujer. El diamon amor para con Jehova ya principia crici y ya queda tambien kame mas cerca como man maridable!”

Rosa: “Del una, ya pensa yo que el Biblia un libro lang de maga idea del gente acerca con Dios. Pero hinay-hinay, ya incuntra yo el maga contestacion del Biblia na de mio maga pregunta. Ahora, deverasan ya para conmigo si Jehova. Un Persona le con quien yo puede confia.”

Raymonde: “Ya reza yo con Dios que ayuda conmigo aprende acerca con ele. Nuay dura, iyo y el de mio marido ya principia estudia con el Biblia. Ahora, ya sabe ya kame el verdad acerca con Jehova! Bien alegre gayot kame cuando ya sabe kame si cosa clase le de Dios.”

El Biblia gendeh lang ta revela el maga imbusterias acerca con Dios. Ta revela tambien este el verdad acerca na de suyu maga buen calidad. Inspirao Palabra este de suyu y puede ayuda kanaton para “entende el maga regalo ya dale [kanaton] el Dios.” (1 Corinto 2:12) Porque gendeh pruba que etu mismo mira si paquemodo el Biblia puede contesta con el maga comon pero importante pregunta acerca con Dios, de suyu proposito y diaton futuro? Le con el maga contestacion na cuanto de ese pregunta under na “Enseñanza del Biblia > Contestacion na Maga Pregunta Acerca na Biblia” na www.pr418.com. Puede tambien tu man request un Bible study na ese Web site o na uno del maga Testigo de Jehova. Asigurao kame que si hace tu se, el de tuyu amor con Dios hay queda mas fuerte.