Ame ngöne la ketre ijin, hnei Iesu hna qeje Iehova Tretretro i Nyidrë e Ierusalema, me qajaqaja la itre hene ne hmi ka thoi. (Ioane 8:12-30) Ame la hnei nyidrëti hna qaja ngöne la ijine cili, tre sipu ini lai koi së göne la aqane tro sa waipengöne la itre ini hna hamëne enehila göi Akötresie. Öni Iesu: “Maine tro nyipunie a xome hutine la tenge ewekënge, itete dei ni nyipunie ka nyipici ; nge tro hë nyipunie a ate la nyipici, nge tro ha nue amacai nyipunie hnene la nyipici.”—Ioane 8:31, 32.

“Xome hutine [ju] la tenge ewekëng.” Celë hi aqane ini së hnei Iesu troa wange maine “nyipici” la itre ini hna hamëne hnene la hmi. Ame la nyipunie a drenge la kola qeje Akötresie, isa hnyinge jë ka hape, ‘Hapeu, ka ihmeku kö la ini celë memine la trenge ewekë i Iesu, memine la hna qaja hnene la Tusi Hmitrötr?’ Epi tro fe së a xom la thiina ne lo itre atr ka drei Paulo aposetolo ekö, itre ka “thele o drai la ite hna cinyihan, maine nyipici la nöjei ewekë cili [ene la itre mekune hna ini angatr].”—Ite Huliwa17:11.

Ame Marco, me Rosa, me Raymonde, lo itre hna qaja ngöne la qaane la tane mekune celë, tre hnei angatr hna thele troa waipengöne hnyawa la itre ini hnei angatre hna kapa, jëne la ini Tus i angatr memine la Itretre Anyipici Iehova. Nemene la hnei angatre hna inin?

Marco: “Hnene pala hi la atre ini Tusi me nyiho hna fe Tusi Hmitrötr, göi troa sa la itre mekune hnenge me föeng hna hnyingëng. Ame ju hi e cili, tre kolo ha nyiqaane kökötre la ihnimi nyiho koi Iehova, nge kolo fe a acatrene catrëne la aqane imelekeu i nyiho lue trefën!”

Rosa: “Ame lo xötrei, öninge pena kö ka hape, ketre itusi menu hi la Tusi Hmitrötr, tune lo itre itusi ne lo itre ka inamacan, ka thele troa qaja la pengö i Akötresie, jëne la itre ini hna hamëne hnei atr. Ngo ame hë e thupen, eni ha öhne laka Tusi Hmitrötr a sa trongëne la itre hnyingeng. Ame ju hi e cili, tre, tha trehnyiwa hmaca kö Iehova koi ni. Hetre ajange hë troa mejiune koi Nyidrë.”

Raymonde: “Hnenge hna sipo Akötresie jëne la thithi troa xatua ni troa inine hnyawa la pengö i Nyidrë. Tha qea ju kö nge eni hë me föeng a ini Tusi Hmitrötr. Ame hë e thupen, atre hë nyiho la nyipi pengö i Iehova! Thatreine kö troa qeje pengöne la madrine i nyiho, la nyiho a atre ka hape nemene pengöne Akötresieti lae Nyidrë.”

Ngo tha Tusi Hmitrötr hmekuje kö a qajaqaja la itre ini ka thoi hna qaja göi Akötresie; eje fe a amamane ka hape, hetrenyi Nyidrëti la itre thiina ka lolo. Wesi Ula i Nyidrëti la Tusi Hmitrötr, nge ej a xatua së troa “[ate] . . . la ite ewekë hna hamëne gufane koi shë hnei Akötesie.” (1 Korinito 2:12) Epi tro fe nyipunie a sipu öhne la aqane sa hnei Tusi Hmitrötr la itre hnyinge ka tru, ka tune göne la pengö i Akötresie, memine la aja i Nyidrë, memine la pengöne la mele së elany. Hna hane sa la itre xa hnyinge ngöne la sit ëternet www.pr418.com qene Wiwi, ngöne lo götrane hna hape “La Bible et vous > Questions Bibliques.” Ijije fe tro nyipunieti a hane sipone troa ini Tus jëne lai sit ëternet, maine thene la ketre Atre Anyipici Iehova pena. Ka xeci hnyawa e kuhu hni hun ka hape, maine tro nyipunie a sipone troa hane ini Tus, tro hë nyipunieti a öhne laka, tha jole kö troa hnimi Akötresie.