Eene taach in Yeruusalem, hot Yeesus iwich sayn Fater, Yeehoowa, kexproch. Tee hot taytlich ketsaycht tas ti relichyeese xëfe fon sayn taache falx weyere. (Yoohan 8:12-30) Was Yeesus kesaat hot lërnt uns tas es wichtich is unersuuche was ti layt iwich Kot klaape. Yeesus saat: “Wën teyer in mayn wort playpt, sayt teyer wërklich mayn tisipele. Teyer tuut ti woerheet khëne; un ti woerheet tuut aych fray mache.” — Yoohan 8:31, 32.

“Wën teyer in mayn wort playpt” — hiir hot Yeesus ketsaycht was mer mache mise fer wise op was ti relichyoone in lërne ti “woerheet” is. Wëns tuu etwas iwich Kot heerst, tenk: ‘Xtimt tas mit was Yeesus saat, un mit was ti kans Piipel in lërnt?’ Mach soo wii tii woo keheert hon was Phaul kelërnt hot — tii hon “ti Xrifte uner suucht fer se siin ep tiise tinge kraat soo waare wii se tëne kesaat hon.” — Aphostele sayn Kexicht 17:11.

Marco, Rosa un Roberta, woo xon kenënt sin woer, hon iire klaape kuut uner suucht wii se Piipel xtuutyum kemacht hon mit Yeehoowa sayn Tsayer. Was hon se kelërnt?

Marco: “Ti kanse frooche woo ich un mayn fraa hate sin keantwort woer in te Piipel. Meyer hon aan kefang Yeehoowa liipe un meyer sin aach een eeniche pheyerche kewoer.”

Rosa: “Ich hon ketacht tas ti Piipel weyer een puuch fon filosofii woo teet fersuuche Kot aus leye torich mënxlich ketanke. Awer mit te tsayt hon ich ti antworte fer mayn frooche kefun. Yets mërke ich tas Yeehoowa wërklich een persoon is, yemant woo ich traue khan.”

Roberta: “Ich hon tsu Kot kepeet un ferlangt ich wolt tee khëne lërne. Xpeeter hon ich un mayne man aan kefang ti Piipel xtutiire. Ëntlich hon mer kelërnt ti woerheet iwich Yeehoowa. Meyer hon uns kefrayt wii mer ferxtan hon was fer sort Kot tee is.”

Ti Piipel macht mee wii tsayche ti woerheet iwich Kot; ti tsaycht aach sayn xeene kwaliteete. Kot hot kexikt sayn wort uf xraype fer uns tas mer ti ‘tinge wiste woo Kot uns hërtslich kep hot’. (1 Korinter 2:12) Teest tuu net kërn selepst raus kriin was ti Piipel xprecht iwich Kot, sayne wile un unser tsukhunft? Fer ti antwort raus kriin, kuk “Piiplixe inlërnunge >Frooche iwer ti Piipel woo keantwort kep sin”, im site www.pr418.com. Tuu khanst aach een Piipel xtuutyum ferlange torich te selwiche site orer tsu een Yeehoowa sayn Tsayer. Wëns tuu tas machst, sin mer uns sicher tas tuu aach ferxteest tas es laychter is Kot liipe wiis tuu wërklich tenkst.