Hĩndĩ ĩmwe Jesu arĩ Jerusalemu, nĩ eerire andũ ũhoro wĩgiĩ Ithe, Jehova, na akĩonania morutani ma maheeni marĩa atongoria a ndini maarutanaga. (Johana 8:12-30) Maũndũ marĩa oigire hĩndĩ ĩyo nĩ matũrutaga ũrĩa tũngĩthuthuria morutani marĩa andũ aingĩ metĩkĩtie megiĩ Ngai ũmũthĩ. Jesu oigire ũũ: “Inyuĩ mwatũũra o mwĩtĩkĩtie uuge wakwa, mũrĩ arutwo akwa kũna, na nĩmũkamenya ũhoro-ũrĩa-wa-ma, naguo ũhoro-wa-ma ũmũkũũre ũkombo-inĩ.”—Johana 8:31, 32.

“Mwatũũra o mwĩtĩkĩtie uuge wakwa.” Kũgerera ciugo icio, Jesu nĩ aatuonirie ũrĩa tũngĩmenya kana ũrĩa ndini ĩrarutana nĩ “ũhoro-wa-ma.” Rĩrĩa waigua ũhoro wĩgiĩ Ngai, wagĩrĩirũo kwĩyũria ũũ: ‘Hihi ũhoro ũyũ nĩ ũratwarana na ũrutani wa Jesu na Maandĩko marĩa mangĩ ma Bibilia?’ Wĩgerekanagie na andũ arĩa maathikagĩrĩria Paulo akĩaria na ‘magatuĩragia Maandĩko o mũthenya, mamenye kana maũndũ macio maarutagwo nĩguo maatariĩ.’—Atũmwo 17:11.

Marco, Rosa, na Raymonde, arĩa magwetetwo gĩcunjĩ-inĩ kĩa mbere, nĩ maathuthuririe morutani marĩa meetĩkĩtie na njĩra ya kwĩruta Bibilia hamwe na Aira a Jehova. Hihi meerutire maũndũ marĩkũ?

Marco oigire ũũ: “Mũira wa Jehova ũrĩa watũrutaga Bibilia aahũthagĩra Maandĩko gũcokia kĩũria o gĩothe niĩ na mũtumia wakwa twamũragia. Tũkĩambĩrĩria kwenda Jehova, o na tũkĩgĩa na ũrata wa hakuhĩ na mũtumia wakwa!”

Rosa oigire ũũ: “Mbere-inĩ ndonaga Bibilia ta arĩ o ibuku rĩtungĩtwo nĩ andũ rĩa kũgeria gũtaarĩria ũrĩa Ngai ahaana. O na kũrĩ ũguo, o kahora ngĩambĩrĩria kuona Bibilia nĩ ĩracokia ciũria iria ndakoragwo nacio. Rĩu nĩ ngĩĩte na ũrata wa hakuhĩ na Jehova, na ngamwĩhoka biũ.”

Raymonde oigire ũũ: “Ndaahoire Ngai andeithie ndĩmũmenye. Kahinda kanini thutha ũcio, tũrĩ na mũthuri wakwa tũkĩambĩrĩria kwĩruta Bibilia. Na tũkĩĩruta ma ĩgiĩ Jehova! Nĩ twakenire mũno twataũkĩrũo nĩ ũrĩa Ngai ahaana.”

Bibilia nĩ ĩguũragia morutani ma maheeni megiĩ Ngai; na makĩria ma ũguo ĩgatũguũrĩria ngumo ciake cia magegania. Bibilia nĩ Kiugo gĩake, kĩrĩa aandĩkithirie kũgerera roho, na nĩ gĩtũteithagia “kũmenya maũndũ marĩa Ngai atũtugĩte namo.” (1 Akorintho 2:12) Na githĩ ti wega wĩyonere wee mwene ũrĩa Bibilia ĩcoketie ciũria imwe cia bata ciũragio kaingĩ ciĩgiĩ Ngai, muoroto wake, na ũhoro wĩgiĩ mahinda marĩa mokĩte? Thoma macokio ma ciũria imwe ta icio Rĩarĩro-inĩ rĩa rungu rwa “Morutani ma Bibilia > Macokio ma Ciũria cia Bibilia.” Ningĩ Rĩarĩro-inĩ rĩu, no wandĩke ihoya rĩa kũũria ũrutwo Bibilia, kana ũũrie Mũira wa Jehova itũũra-inĩ rĩanyu akũrute. Tũrĩ na ma atĩ weka ũguo, nĩ ũkuona ũrĩ ũndũ mũhũthũ gũkuhĩrĩria Ngai gũkĩra ũrĩa ũrĩ weciria.