Пірсінде Иерусалимде Иисус кізілерге Иегова Пабазынаңар чоохтаан паза религиознай устағҷыларның чойын ілезіне сығарған (Иоанн 8:12—30). Аның сӧстері амғы туста Худайдаңар тарап парған ӱгредіглер орта ба, чох па, сыныхтабызарға полысчалар. Иисус теен: «Сірер, сӧзімні толдырзаңар, Минің сын ӱгренҷілерім поларзар. Сынны піліп алзаңар, сын киртініс сірерні пос чуртастығ кізілер ит салар» (Иоанн 8:31, 32).

Иисустың «сірер, сӧзімні толдырзаңар» теен сӧстері религиознай ӱгредіг орта ба, чох па, піліп аларға полысчалар. Худайдаңар пірее ниме ис салзар, позыңарны сурыбызыңар: «Анзы Иисустың сӧстеріне паза Библияның ӱгредіглеріне килісче бе?» Павел илҷінің чооғын истіп, «кӱннің сай Худай Пічиин хығырып, андағ ба, андағ нимес пе тіп сыныхтааннардаң» кӧзідім алыңар (Илҷілернің 17:11).

Марко, Роза паза Раймонда, олардаңар пастағы статьяда пазылған, Иегованың киречілерінең Библияны ӱгреніп, кӧрістерін сыныхтааннар. Олар ниме піліп алғаннар?

Марко: «Миннең паза ипчімнең Библия ӱгренген кізілер прай пістің сурығларыбысха Библия хоостыра нандырғаннар. Аннаңар піс Иеговаа хын сыххабыс паза сӧбіребіс пик пол парған!»

Роза: «Пастап Библия — ол олаңай философскай кинде тіп сағынғам. Худайдаңар, кізі хыйғазына тӧстеніп, чоохтапча тіп санаам. Че соонаң прай сурығларыма нандырығларны Библияда таап алғам. Иегова мағаа тіріг, ізестіг Худай пол парған».

Раймонда: «Мин Худайға, аны піліп аларға полыс пирзін тіп, пазырғам. Ӱр ниместең піс ирімнең Библия ӱгрен сыххабыс. Иеговадаңар сынны, ол сынында хайдағ Худай полчатханын піліп аларға уғаа ӧріністіг полған!»

Библия Худайдаңар чой ӱгредігні ілезіне сығарча паза аның чахсы качестволарынаңар сынны чоохтапча. Пу киндені пазарынаң Худай устаан, аннаңар Худайның прай сыйыхтарын алай аның сынын піс піл полчабыс (1 Коринфтегілерге 2:12). Худайдаңар, аның сағынчатхан сағызынаңар паза пістің алнынзархы чуртазыбыстаңар сурығларға Библия хайди нандырчатханын кӧр кӧріңер. Пірее аарлығ сурығларға нандырығларны www.pr418.com/kjh тіп сайтта «Библияның ӱгредіглері > Библия нандырчатхан сурығлар» тіп пӧлікте таап аларзар. Ідӧк ол сайт пастыра алай Иегованың киречілерінің піреезінзер айланып, Библия ӱгредиин иртерге сурынып алыңар. Мының алнында Худайға хынарға сидік тіп сағынғазар, арса. Піс ікінҷілебинчебіс, Библияны ӱгреніп, сірер піліп аларзар: Худайға хынарға сынында сидік нимес!