Likumbi limwe omu Yesu apwile muYelusalema, apwile nakuhanjika hali Ise Yehova, nakusopolola vyuma vyamakuli vize vanangwilenga vatwamina vamukwitava vamumakumbi enyi. (Yowano 8:12-30) Vyuma ahanjikile halikumbi kana vyatunangula nge twatela kukekesanga vyuma vafwelela vatu hali Kalunga makumbi ano. Yesu ambile ngwenyi: “Kachi nge namutwamanga mumazu ami, kaha chikupu vene munapu mutumbaji twami. Namutachikiza muchano, kaha muchano naumilingisa kupwa vakulihehwa.”—Yowano 8:31, 32.

Yesu hakuhanjika ngwenyi ‘twamenunga mumazu ami,’ asolwele ngwenyi twatela kukekesanga tumone numba nge vyuma veji kunangulanga vatwamina vamukwitava vyapwa ‘vyamuchano’ nyi chiku. Nge nawivwa vatu navahanjika vyuma vimwe hali Kalunga, lihulise ngwove, ‘Uno vyuma kana vyalitombola namazu ahanjikile Yesu naVisoneka Vyajila vyosena tahi?’ Fwilanga kulondezeza vatu vaze “vakekeselenga kanawa Visoneka hakumbi hakumbi mangana vamone numba nge vyuma kana [vyuma vize vapwilenga nakulinangula] muvyaya vene ngana,” hanyima yakwivwa vyuma anangwile kaposetolo Paulu.—Vilinga 17:11.

Marco, naRosa, naRaymonde, vaze twashimutwilanga muchihande chakulivanga muvihande vino, vakekeselenga kanawa vyuma vafwelelele hakulinangula Mbimbiliya naVinjiho jaYehova. Vyuma muka vawanyine?

Marco ambile ngwenyi: “Muka-kutunangula Mbimbiliya azachishilenga Visoneka hakukumbulula vihula twamuhulishilenga napuwami. Twaputukile jino kuzanga Yehova, nakulizanga nawa chikuma muulo wetu.”

Rosa ambile ngwenyi: “Hakavanga ngwamwenenga ngwami Mbimbiliya yapwa kaha mukanda uze wazala namangana autu, uze wahanjika vyuma vyakuhumikiza hali Kalunga. Kutwala muze, ngwaputukile kuwana omwo Mbimbiliya yakumbulwilenga vihula vyami. Oholyapwa jino Yehova ngwamumona kupwa himutu nahenyi, uze ngunahase kufwelela.”

Raymonde ambile ngwenyi: “Ngwalombelenga Kalunga mangana angukafwe ngumutachikize. Nakushimbula chiku, ami nalunga lyami twaputukile kulinangula Mbimbiliya. Kutwala muze twatachikijile jino vyuma vyamuchano hali Yehova. Twawahililile chikuma hakutachikiza jino vilinga atwama navyo Kalunga.”

Mbimbiliya yasopolola vyuma vyamakuli vize veji kuhanjikanga vatu hali Kalunga, nakutulweza nawa vilinga vyamwaza vize atwama navyo. Mbimbiliya yapwa Mazu aKalunga ahwima, kaha yeji kutukafwanga “tutachikize vyuma vize vanatuhane kuli Kalunga mujila yalikoji.” (Wavaka-Kolinde 1, 2:12) Wana omwo Mbimbiliya yakumbulula vihula veji kuhulisanga vatu hali Kalunga, navyuma ajina, navize mwakatulingila kulutwe. Yako ha www.pr418.com haze vanavuluka ngwavo “Vyuma Yanangula Mbimbiliya > Kukumbulula Vihula Vyakupandama kuMbimbiliya” mangana uwane muvakumbulula vihula vimwe havihula kanevi. Unahase nawa kuzachisa keyala ya www.pr418.com mangana ulombe vakunangule Mbimbiliya chipwe kulweza Chinjiho chaYehova mangana akunangule Mbimbiliya. Tunafwelela ngwetu nge naulinga ngocho kaha nachikwashiwila kuzanga chikuma Kalunga.