Na nu paa ma e Jesús mi b’ꞹbʼꞹ a Jerusalén, ma ñaa ja ga kjaa nu Jyoo Jehová, kʼo go mama go tsjapꞹ ke kʼo ntee ro unꞹji nguenda ke dya ma kjuana kʼo mi jizhiji kʼo mi otrʼꞹ axojñi kja kʼo religión kʼo pakʼo (Juan 8:​12-​30). Ra nuji pje go mama e Jesús, akjanu ma ra ⱥrgøji pje nde manji yo ntee ja ga kjaa e Diosi, ra kjijñigøji na joo, ra pa̱rgøji kjo na kjuana maxke iyo. E Jesús go mama: “Ma sido ri ñejmeji yo jñaa yo ri ñaa, nuʼma, na kjuana in ⱥtkøjima. Ma ri ñejmezꞹgøji yo jñaa yo ri ñaa, ri pa̱ra̱ji kʼꞹ na kjuanama. Ma ri pa̱ra̱ji kʼꞹ na kjuana, ra tʼempkʼeji librema” (Juan 8:​31,​32).

Ma e Jesús bo mama “Sido ri ñejmeji yo jñaa yo ri ñaa”, Jesús mi nee ro mama ja rgua unkʼøji nguenda mꞹ na kjuana kʼo pje nde kreoji yo ntee. Ma pje ra xitsʼiji ja ga kjaa e Diosi, dyønꞹtsjɇ: “¿Chjentjui kʼo go jizhi e Jesús ñe kʼo jizhi kja o Jñaa e Tsʼitajensʼe?”. Ri tsjaa nzakja kʼo ntee ke o dyⱥrⱥji nu apóstol Pablo: pama ri xørꞹ ne Biblia ngekʼua ri unꞹ nguenda ma na kjuana kʼo gi pjechi maxke iyo (Hechos 17:11).

Nge kʼo bo tsjaji e Marco, e Rosa, ñe e Raimunda, ke ya ro manji: go xørꞹji ne Biblia ko yo testigo e Jehová. ¿Pje go unꞹji nguenda?

E Marco: “Nu kʼꞹ mi xøpꞹbʼe in sugø ñezgø, mi jitsʼkøbʼe ko ne Biblia ngekʼua ro ndꞹrꞹ kʼo tʼønꞹ ke mi kjabʼe. Akjanu ro pjꞹrꞹbʼe ro sʼiyabʼe e Jehová, xo me ri potka sʼiyagøbʼe in sugø”.

E Rosa: “Mi kjijñigø ke nu Biblia mi ngejetrjo na skuama ke nee ra xitskʼøji kjo ngeje e Mizhokjimi ja ga manji yo ntee. Pe ma go kjogꞹ kʼo paa, ro tøtrʼꞹ­kʼo mi ønꞹtsjɇgø. Nudya, ri pa̱rgø ke e Jehová na kjuana bʼꞹbʼꞹ. Xo na kjuana ri enchʼe kja in mꞹbʼꞹ ke angeze me nezꞹ”

E Raimunda: “Ro øtꞹ e Tsʼitajensʼe ke ro mbøxkꞹ ro pa̱rgø angeze. Ma go kjogꞹ janzi paa, in xiragø ñezgø ro pjꞹrꞹ ro xørꞹbʼe ne Biblia. ¡Kja ro pa̱rgøbʼedya kʼo na kjuana ja ga kjaa e Jehová! Me ro mⱥkjøbʼe ma ro pa̱rgøbʼe kʼo na kjuana ja ga ngeje angeze”.

Ne Biblia dya ngextrjo pjøxkꞹji ra unꞹji nguenda pje nge kʼo dya na kjuana ke pje nde manji jaga kjaa e Palesito ajensʼe, xo jitskʼøji kʼo na kjuana ja ga kjaa angeze. Nu Jñaa angeze, pjøxkꞹji “ra pa̱rgøji kʼua ja ba sʼiyazgøji Mizhokjimi, ñe kʼua ja ga mbøxkøji” (1 Corintios 2:12). Nutʼskʼe søø ri jyodʼꞹ kʼꞹ na kjuana pje jizhi ne Biblia ja ga kjaa e Diosi, pje nee ra tsjaa ñe pje ra kjogꞹ yo paa yo ba e̱je̱. Søø ri xørꞹyo kja www.pr418.com /maz nuja mama “Kʼo jizhi o Jñaa e Yose > Yo trʼønꞹ kja o Jñaa e Yose”. Xo søø ri dyøtꞹ ke na testigo e Jehová ra jitsʼi kʼo mama ne Biblia. Ma ri tsjage, ri unꞹ nguenda ke na kjuana søø ri chɇzhi ko e Mizhokjimi ñe ri sʼiya angeze.