Tëgok, ko Jesus ojts tnigajpxy tnimaytyaˈagyë Tyeety jam Jerusalén, ta jyënany ko kyaj nety oy tijaty ttundë pënaty nyiwintsënˈäjttëbë relijyonk (Fwank 8:12-30). Extëm ojts jyënaˈany, yëˈë xytyukˈijxëm wiˈix mbäät nbayoˈoyëm tijatyë jäˈäy myëbëjktëp mä Dios. Jesus jyënany: “Pën mbadiimpy extëmëts miits nˈanëëmëdë, nˈëxpëjkpëˈatëpts miitsëty, es mˈixyˈattëp ja tëyˈäjtën, es yëˈë tëyˈäjtën yëˈë myajwëˈëmëdëp awäˈätstuuy” (Fwank 8:31, 32).

Ko jyënaˈany “pën mbadiimpy extëmëts miits nˈanëëmëdë”, yëˈë Jesus xytyukˈijxëm wiˈix mbäät nnijäˈäwëm pën tëyˈäjtën o kyaj diˈibë jäˈäy myëbëjktëp. Ko pën tnimaytyäˈägëdë Dios, nayajtëwëdë: “¿Nanduˈun tyukniˈˈixë extëmë Jesus tyukniˈˈijxë o extëmë Biiblyë jyënaˈany?”. Tun nanduˈun extëm ttuundë ja jäˈäyëty diˈibë Pablo myëtmaytyak. Payoˈoy yajxon wiˈixë Biiblyë jyënaˈany parë xynyijawët pën tëyˈäjtën extëm myaˈˈanëëmë (Apostʉlʉty 17:11).

Duˈun ttuundë Marco, Rosa etsë Raimunda, diˈib të yˈokˈyajmaytyakpë: yˈëxpëjktë Biiblyë mëdë Jyobaa tyestiigëty. ¿Ti jyäjttë?

Marco: “Ja Testiigë diˈibëts xyaˈëxpëjktë, yëˈë yajtuunë Biiblyë parë tˈatsoojëmbijty tijatyëts nayajtëëwëdë mëdëtsë nnëdoˈoxy. Wanaty wanatyëtsë ntsojkën myëjwindëjkë mä Jyobaa, axtë këktëjkëtsë ntsënäˈäy njukyˈäjtën”.

Rosa: “Duˈunëtsë nety nwinmay ko Biiblyë, yëˈë tuˈugë liibrë diˈib myëmiimbyë ëxpëkyjyaˈayë wyijyˈäjtën, diˈib jyanimaytyäˈägaampy pënën Dios. Per ok, tajëts wanaty wanaty nnijäˈäwë wiˈixë Biiblyë tˈatsoojëmbity tijatyëts nayajtëëwë. Tyam, nˈijxypyëtsë Jyobaa extëm tuˈugë jäˈäy diˈibëts mbäät ndukˈijxpety”.

Raimunda: “Nˈanmääyëtsë Dios parëts xypyudëkët etsëts nˈixyˈatët. Ko waanë tiempë nyajxy, tajëts mëdë nyaˈay nˈëxpëjktsondaktë Biiblyë. ¡Taanëmëts nnijäˈäwëdë ja tëyˈäjtën mä pënën Jyobaa! Agujk jotkujkëts njantsy nnayjäˈäwëdë kojëts nnijäˈäwëdë wiˈix jyaˈayˈaty”.

Biiblyë, Diosë yˈAyuk, kyaj jeˈeyë tnigajpxy ko kyaj tyëyˈäjtënëty extëmë jäˈäy tniwäämbattë Dios, nan nyigajpxypy wiˈixë Dios jyaˈayˈaty. Ets nan xypyudëjkëm parë “njaygyujkëm tëgekyë diˈibë Dios xynyamoˈoyëm” (1 Korintʉ 2:12). ¿Tiko këˈëm xykyayajtëyˈäjtëndëkë wiˈixë Biiblyë tyukniˈˈixë mä pënën Dios, tijaty tyuknibëjtakëp ets tijaty miin këdakp? Parë xynyijawët, mbäät niˈigyë xykyajpxy mä www.pr418.com/es mä jyënaˈany “Enseñanzas bíblicas > Preguntas sobre la Biblia”. Nan mbäät jap xyˈamdoy parë myaˈëxpëkëdët tuˈugë Jyobaa tyestiigë. Ko duˈun xytyunët, ta xypyëkäˈänyë kuentë ko mbäät xytsyekyë Dios.