Juon raan ke Jijej ear pãd ilo Jerusalem, ear kõnono kõn Jemãn,Jeova, im ear bar kwal̦o̦k kõn katak ko reriab me ri tõl in kabuñ ko rar kwal̦o̦ki. (Jon 8:12-30) Naan ko me Jijej ear ba rej katakin kõj ta ko jen kõm̦m̦ani ñan jel̦ã ñe em̦ool juon katak kõn Anij ak jab. Jijej ear ba: “El̦aññe kom̦ij pokake katak ko aõ, em̦ool kom̦ij rũkal̦oora; kom̦ naaj jel̦ã m̦ool eo, im m̦ool eo enaaj kanemkwõj kom̦.”​—Jon 8:31, 32, UBS.

Jijej ear ba bwe jen ‘pokake katak ko an.’ Naan kein an rej kaalikkar bwe jej aikuj etale el̦aññe katak ko an kabuñ ko ‘rem̦ool.’ Kõn men in, ñe kwõj roñjake juon katak kõn Anij, em̦m̦an ñe kwõj kajjitõk ippam̦ make, ‘Katak in ej ke errã ilo naan ko an Jijej im eoon ko jet ilo Baibõl̦?’ Em̦m̦an bwe jen bar kajjioñe ro me rar roñjake an rijjilõk Paul kwal̦o̦k naan im “raan otemjej rekõn liñõre im katak Jeje ko bwe ren lale m̦ool ke men ko Paul ej kõnono kaki.”​—Jerbal 17:11, UBS.

Ilo katak eo jinointata ilo bok in, kar kwal̦o̦k kõn armej rein jilu etaer Marco, Rosa, im Ramona. Erjel kar lukkuun etale katak ko an kabuñ ko aer ke rar katak Baibõl̦ ippãn Ri Kõnnaan ro an Jeova. Ta ko rar ba ke rar katak Baibõl̦?

Marco: “Eo me ear katak Baibõl̦ ippemro lio pãleeõ ear uwaaki aolep kajjitõk ko am̦ro ilo an kõjerbal eoon ko ilo Baibõl̦. Jidik kõn jidik ear l̦apl̦o̦k am̦ro yokwe Jeova im kõmro ar jino epaakel̦o̦k wõt doon!”

Rosa: “Ilo jinoin, iar l̦õmn̦ak bwe Baibõl̦ ej juon bok jãn armej im bwe kõmel̦el̦e ko ie kõn Anij rej ekkar ñan l̦õmn̦ak ko an armej. Bõtab jidik kõn jidik, iar loi uwaakin kajjitõk ko aõ ilo Baibõl̦. Kiiõ ilukkuun epaake Jeova im el̦ap aõ lõke e.”

Ramona: “Iar jar ñan Anij im kajjitõk bwe en jipañ eõ ñan katak kõn e. Ejjabto tokãlik, kõmro l̦eo pãleeõ ar jino katak Baibõl̦. Eñin ej iien eo me kõmro ej kab katak m̦ool eo kõn Jeova! Kõmro ar lañlõñ ke kõmro kar katak bwe ej juon Anij in yokwe im jouj.”

Ealikkar bwe eoon ko ilo Baibõl̦ rej kwal̦o̦k ñe em̦ool ak eriab juon katak kõn Anij. Baibõl̦ ej bar kwal̦o̦k bwe Jeova ej juon Anij in yokwe, jouj, im ko ãierl̦o̦kwõt. Naan ko ilo Baibõl̦ rej an Anij im rej jipañ kõj ñan “jel̦ã men ko Anij ear wũjleptok ñan kõj.” Men kein rej katak ko rem̦ool kõn Anij im kõn karõk ko an. (1 Korint 2:12) Ekkã an armej ro kwal̦o̦k kajjitõk ko kõn Anij im ta ankilaan Anij. Rej bareinwõt kajjitõk kõn ta eo enaaj wal̦o̦k ilju im jekl̦aj. Baibõl̦ ej uwaaki aolep kajjitõk kein. Etke kwõjjab kajjitõk bwe juon en iwõj im katak Baibõl̦ ippam̦? Kwõmaroñ etal ñan Internet im lale Web site eo etan im jilkinl̦o̦k kajjitõk eo am̦ bwe juon en iwõj im katak Baibõl̦ ippam̦. Ak kwõmaroñ kajju kajjitõk ippãn juon iaan Ri Kõnnaan ro an Jeova. Ejjel̦o̦k pere bwe ñe kwõnaaj jino am̦ katak Baibõl̦, enaaj l̦apl̦o̦k am̦ yokwe im epaake Anij.