Nthiki imwe mo Jelusalei, Jesus ankho ukahi nokupopia konthele ya Tate yae, Jeova, iya ahololola omatutu ononkhalamutwe mbonongeleya pononthiki mbae. (João 8:12-30) Etyi apopile tyitulongesa okuti tuesukisa okutala nawa etyi ovanthu hono vapopia konthele ya Huku. Jesus wati: “Tyotyili muvalongwa vange, inkha mutualako okukala mondaka yange, iya mamunoñgonoka otyili, iya otyili atyimuyovola.”​—João 8:31, 32.

Etyi Jesus ati “tualeiko okukala mondaka yange,” ankho ukahi nokulekesa okuti tyesukisa okutala nawa inkha omalongeso onongeleya o “otyotyili.” Tyina wiva ovanthu vapopia konthele ya Huku, lipula okuti: ‘Okuti otyo tyelikuata nonondaka mba Jesus, nonondaka ononkhuavo Mbovihonekwa Vikola?’ Hetekela vana veivile etyi apostolu Paulu ankho apopia, iya “avakaovolola nawa Movihonekwa kese nthiki, opo vatale inkha ovipuka ovio viapopiwa [ovipuka ankho vekahi nokulilongesa] otyili umwe.”​—Atos 17:11.

Marco, na Rosa, na Raymonde, vapopiwa mononthele mbotete, velilongesa Ombimbiliya no Nombangi mba Jeova opo vatale nawa omatavelo avo. Oityi velilongesa?

Marco: “Ou wokutulongesa Ombimbiliya ankho uundapesa Ovihonekwa opo akumbulule omapulo aeho ame nomukai wange ankho tumulinga. Ohole yetu na Jeova aihimbika okuliyawisa, iya atukala vali noupanga motyinepo tyetu!”

Rosa: “Potete, ankho ndyisoka okuti Ombimbiliya omukanda upopia vala omalusoke ovanthu konthele yoñgeni Huku ekahi. Mahi, katutu-katutu, navasa omakumbululo omapulo ange Mombimbiliya. Pahe, kuame Jeova omunthu wotyotyili. Omunthu ndyipondola okuyumba onthumbi.”

Raymonde: “Nelikuambelele okuita ku Huku ankhuateseko okulilongesa konthele yae. Pakala vala katutu, ame nomulume wange atuhimbika okulilongesa Ombimbiliya. Pahe, tuelilongesa otyili konthele ya Jeova! Tuahambukilwe unene etyi tuanoñgonoka oñgeni Huku ekahi.”

Ombimbiliya kaihololola vala omatutu konthele ya Huku, mahi tupu ihololola otyili konthele yovituwa viae oviwa. Ombimbiliya, Ondaka yae atuma okuhoneka, iya itukuatesako “okunoñgonoka ovipuka Huku etuavela noluembia.” (1 Coríntios 2:12) Omokonda yatyi wehelitalelako ove muene oñgeni Ombimbiliya ipondola okukumbulula omapulo akolela konthele ya Huku, nevangelo liae, netyi matyiketumonekela komutwe wandyila? Tanga omakumbululo amwe omapulo oo posapi yati “Omalongeso Ombimbiliya > Omapulo Ombimbiliya Akumbululwa” mo www.pr418.com. Tupu upondola okuita mo Internete opo ulongeswe Ombimbiliya ine wiita Kombangi imwe ya Jeova. Tuna onthumbi yokuti inkha ulinga ngotyo, matyikupepukila unene okukala nohole na Huku tyipona etyi ankho usoka.